ភ្នំពេញ៖ លោកស្រី ហ៊ុន ដានី រដ្ឋលេខាធិការក្រសួងទេសចរណ៍បានស្នើឲ្យមន្ទីរទេសចរណ៍រាជធានី-ខេត្ត សហការជាមួយអាជ្ញាធរ កម្លាំងសមត្ថកិច្ចគ្រប់លំដាប់ថ្នាក់ ពង្រឹងការការពារសន្តិសុខ សុវត្ថិភាពជូនភ្ញៀវទេសចរណ៍ឲ្យបានល្អប្រសើរនៅក្នុងពិធីបុណ្យចូលឆ្នាំប្រពៃណីជាតិខ្មែរខាងមុខនេះ។
ដោយសារបុណ្យចូលឆ្នាំប្រពៃណីជាតិខ្មែរ ឆ្នាំកុរ ឯកស័ក ព.ស ២៥៦៣ ត្រូវនឹងថ្ងៃទី១៤-១៥-១៦ ខែមេសា កាន់តែខិតជិតមកដល់ លោកស្រីរដ្ឋលេខាធិការបានស្នើឲ្យមន្ទីរទេសចរណ៍ខេត្ត ត្រូវសហការជាមួយអាជ្ញាធរដែនដី និងសមត្ថកិច្ចគ្រប់លំដាប់ថ្នាក់ ចាត់វិធានការការពារសន្តិសុខ សុវត្ថិភាពជូនភ្ញៀវទេសចរឲ្យបានល្អប្រសើរ មួយវិញទៀតត្រូវសហការជាមួយប្រតិបត្តិករទេសចរ ពន្យល់ អប់រំ ណែនាំ ឲ្យមានការថែរក្សាអនាម័យ ដោយលុបបំបាត់ការបោះចោលសំរាម កាកសំណល់ផ្សេងៗ វេចខ្ចប់ទុកដាក់សំរាមឲ្យបានត្រឹមត្រូវ និងមានកន្ត្រកសម្រាប់ដាក់សំរាមនៅក្រោមតុ បន្ទប់ទឹក បន្ទប់គេងជាដើម។
លោកស្រីថ្លែងបែបនេះក្នុងឱកាសចុះផ្សព្វផ្សាយអនុសាសន៍ សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា អមជាមួយវគ្គបណ្តុះបណ្តាលស្តីពី ការបញ្ជ្រាបយេនឌ័រក្នុងវិស័យទេសចរណ៍ ដែលបានប្រារព្ធធ្វើឡើងកាលពីថ្ងៃទី១១ ខែមេសា ឆ្នាំ២០១៩ នៅខេត្តកំពត។
លោកស្រីរដ្ឋលេខាធិការ ក៏បានធ្វើការណែនាំ និងផ្តល់អនុសាសន៍មួយចំនួនដល់អាជ្ញាធរ ក៏ដូចជាអ្នកពាក់ព័ន្ធ ត្រូវយកចិត្តទុកដាក់បន្ថែមទៀត ដល់ការពង្រឹងគុណភាពផលិតផលទេសចរណ៍ ដើម្បីជាយន្តការទាក់ទាញ និងរក្សាបាននូវកំណើនទេសចរ តាមរយៈការផ្តល់បដិសណ្ឋារកិច្ច សេវាកម្ម អនាម័យ ភាពស្អាត និងបៃតង រួមទាំងតម្លៃក៏ត្រូវសមរម្យផងដែរ។
ក្រៅពីនេះ ត្រូវចូលរួមទប់ស្កាត់ការជួញដូរ ការប្រើប្រាស់គ្រឿងញៀន ការធ្វើអាជីវកម្មផ្លូវភេទលើស្ត្រី និងកុមារក្នុងវិស័យទេសចរណ៍ ដោយមិនត្រូវយកទេសចរណ៍ជាខែលបិទបាំងនូវអំពើខុសច្បាប់ទាំងនេះឡើយ។
លោកស្រី ហ៊ុន ដានី ក៏បានផ្តាំផ្ញើដល់ក្រុមនារីឯកជនឲ្យចេះស្រលាញ់ខ្លួនស្រលាញ់ប្រពៃណី កុំស្លៀកពាក់សិចស៊ីខើចលើខើចក្រោម ជាពិសេសត្រូវប្រកាន់ឥរិយាបថជាស្ត្រីខ្មែរ កុំធ្វើអ្វីដែលជ្រុលហួសហេតុ នាំឲ្យបាត់បង់តម្លៃ កិត្តិយស និងសេចក្តីថ្លៃថ្នូរក្នុងនាមជាស្ត្រី ហើយរួមគ្នាបង្កើនការប្រើប្រាស់ផលិតផលក្នុងស្រុក ជំនួសឲ្យការនាំចូល និងការប្រើប្រាស់ថង់ប្លាស្ទិច ដូចជា របស់របរដែលធ្វើពីឫស្សី ផ្តៅ លំពាក់ ស្លឹកឈូក ស្លឹកចេក និងបន្លែផ្លែឈើដែលមានក្នុងសហគមន៍៕
Source: Kampuchea Thmey Daily
0 Comments