គ្រូបង្រៀន​ច្បាប់​ជ្វីហ្វ​ ដែល​រងរបួស​ក្នុងការ​បាញ់ប្រហារ​នៅ​ព្រះវិហារ​អាមេរិក ​បាន​និយាយថា ជនជាតិ​ជ្វី​ហ្វ​នឹងមិន​ភ័យខ្លាច​ឡើយ

គ្រូបង្រៀន​ច្បាប់​ជ្វី​ហ្វ​ម្នាក់​ដែល​បាន​បន្តធ្វើ​ការអធិប្បាយ​បើទោះបីជា​រងរបួស​នៅក្នុង​ការបាញ់ប្រហារ​ចុងក្រោយ​បំផុត​នៅ​ព្រះវិហារ​អាមេរិក ​បាន​និយាយ​កាលពី​ថ្ងៃអាទិត្យ​ថា ជនជាតិ​ជ្វី​ហ្វ​នឹងមិន​ត្រូវបាន​បំភិតបំភ័យ​ដោយ​ការ​ស្អប់ខ្ពើម​មិន​សមរម្យ​ពី​អ្នកប្រឆាំង​អម្បូរ​សេ​មី​ត​ទេ​។​

ស្ត្រី​ម្នាក់​អាយុ​៦០​ឆ្នាំឈ្មោះ Lori Kaye ត្រូវបាន​សម្លាប់​និង​មនុស្ស​៣​នាក់​បាន​រងរបួស​នៅពេល​ខ្មាន់កាំភ្លើង​ម្នាក់​សម្រុកចូល​ព្រះវិហារ​នៅ​ទីក្រុង Poway ភាគខាងត្បូង​រដ្ឋ​កាលី​ហ្វ័​រ​នីញ៉ា​កាលពី​ថ្ងៃ​សៅរ៍​ហើយ បើក​ការបាញ់ប្រហារ​នៅ​ថ្ងៃ​ចុងក្រោយ​នៃ​ពិធីបុណ្យ Passover ។​

ប៉ូលិស​បានកំណត់​អត្តសញ្ញាណ​អ្នកបាញ់​ប្រហារ​ថា​មានឈ្មោះ John Earnest អាយុ​១៩​ឆ្នាំ​ដែល​បាន​បង្ហោះ​ពាក្យពេចន៍​ប្រឆាំងនឹង​ជនជាតិ​ជ្វី​ហ្វ​លើ​អន​ឡាញ​មុនពេល​បើក​ការបាញ់ប្រហារ​ហើយ​អះអាងថា គាត់​នៅ​ពីក្រោយ​ការដុត​វិហារ​ឥស្លាម​មួយ​កាលពី​សប្តាហ៍​មុន​។​

យោងតាម​កំណត់ត្រា​របស់​នាយកដ្ឋាន​តម្រួត​តំបន់ San Diego បាន​និយាយថា លោក Earnest ត្រូវ​ប្រឈម​នឹង​ការចោទប្រកាន់​មួយ​ករណី​ពីបទ​ឃាតកម្ម​និង​បី​ករណី​ពីបទ​ប៉ុនប៉ង​ឃាតកម្ម​ហើយនឹង​បង្ហាញខ្លួន​នៅ​ចំពោះមុខ​ចៅក្រម​ដែល​នឹង​ត្រូវបាន​ចោទប្រកាន់​ជា​ផ្លូវការ​នៅ​ថ្ងៃទី​១​ខែឧសភា​។​

ប្រាំ​មួយខែ​បន្ទាប់ពី​ជន​ជ្រុលនិយម​ស្បែក​ស​បាញ់សម្លាប់​មនុស្ស​១១​នាក់​នៅឯ​ព្រះវិហារ​ក្រុង Pittsburgh, វា​បានលើកឡើង​នូវ​សំណួរ​ថ្មីៗ​អំពី​ការកើនឡើង​ទូទាំងប្រទេស​នៃ​ការប្រឆាំង​នឹង​អម្បូរ​សេ​មី​ត​និង​ឧក្រិដ្ឋកម្ម​ស្អប់ខ្ពើម​ជាទូទៅ​និង​អំពី​ការឆ្លើយតប​ដ៏​ចម្រូងចម្រាស​ជា​ញឹកញាប់​របស់លោក​ប្រធានាធិបតី Donald Trump ចំពោះ​ពួកគេ​។​

មុន​ពិធី​បុណ្យសព​របស់ Kaye, មិត្តភក្តិ​ម្នាក់​របស់​នាង​បាន​និយាយថា ការស្លាប់​របស់​នាង​ត្រូវតែ​ក្លាយទៅជា​ការ​ក្រោកឈរឡើង​តទល់​ខណៈដែល​គ្រូបង្រៀន​ច្បាប់​ជ្វី​ហ្វ​របស់​ព្រះវិហារ​បាន​និយាយថា អាជ្ញាធរ​ត្រូវតែ​ធ្វើ​បន្ថែមទៀត​ដើម្បី​ការពារ​កន្លែង​គោរពបូជា​។​

គ្រូបង្រៀន​ច្បាប់​ជ្វី​ហ្វ​ឈ្មោះ Yisroel Goldstein បាន​និយាយ​នៅក្នុង​បទសម្ភាសន៍​មួយ​ជាមួយ​ទូរទស្សន៍ NBC ពីលើ​គ្រែ​មន្ទីរពេទ្យ​របស់គាត់​ថា “​អំពើ​ភេរវកម្ម​នឹងមិន​ឈ្នះ​ទេ​។ ក្នុងនាម​ជា​ជនជាតិ​អាមេរិក យើង​មិនអាច​ឱនក្បាល​នៅ​ចំពោះ​មុខការ​ស្អប់ខ្ពើម​មិន​សមរម្យ​ដែល​ប្រឆាំងនឹង​ជនជាតិ​ជ្វី​ហ្វ​ទេ​”​។​

គ្រូបង្រៀន​រូបនេះ​បានទទួល​រងរបួស​យ៉ាងធ្ងន់ធ្ងរ​ចំ​ដៃ​របស់គាត់​នៅពេលដែល​ខ្មាន់កាំភ្លើង​បាញ់​គាត់​នៅ​ចម្ងាយ​ជិត​អំឡុងពេល​ការធ្វើ​សេចក្ដីអធិប្បាយ​របស់គាត់​មុនពេល​សំដៅទៅ​នាង Kaye​។​
​ខណៈពេលដែល​ខ្មាន់កាំភ្លើង​បាន​ភៀសខ្លួន​ចេញ លោក Goldstein បាន​ដឹកនាំ​ក្រុម​ជំនុំ​របស់គាត់​នៅ​ខាងក្រៅ​ហើយ​បាន​បន្ត​ផ្សព្វផ្សាយ​រហូតដល់​សេវា​សង្គ្រោះបន្ទាន់​មកដល់​៕ AFP

​

Source: Kampuchea Thmey Daily