ឃាត់ខ្លួនសិស្សថ្នាក់ទី១០ នៃវិទ្យាល័យឥន្ទ្រទេវីម្នាក់ ក្នុងចំណោមគ្នា២នាក់ ពីបទឆក់ដ៏សកម្ម

ភ្នំពេញ ៖ សិស្សថ្នាក់ទី១០ នៃវិទ្យាល័យឥន្ទ្រទេវីម្នាក់ ក្នុងចំណោមគ្នា២នាក់ ត្រូវ កម្លាំងកងរាជអាវុធហត្ថខណ្ឌដូនពេញឃាត់ខ្លួន ខណៈពួកគេជិះម៉ូតូឆក់កាបូបដៃរបស់ស្ត្រីម្នាក់ដែលមានលុយរាប់រយដុល្លារ និងទូរស័ព្ទដៃទំនើប២គ្រឿង តែមិនបានសម្រេច។

ហេតុការណ៍នោះ បានកើតឡើងកាលពីវេលាម៉ោង២១នាទី ថ្ងៃទី២០ ខែមេសា ឆ្នាំ២០១៩ ចំណុចលើផ្លូវសុធារស កែងផ្លូវលេខ១៧៨ សង្កាត់ជ័យជំនះ ខណ្ឌដូនពេញ ដែលកម្លាំង អ ហ ខណ្ឌ ដូនពេញ បានឃាត់ខ្លួនជនសង្ស័យ០១នាក់ ក្នុងចំណោមបក្សពួក២នាក់ (រត់គេចខ្លួនម្នាក់) ព្រមទាំងដកហូតម៉ូតូ១គ្រឿងម៉ាក Honda C125 ស៊េរី២០១៦ ពណ៌ខ្មៅ ស្លាកលេខ1FT-8573 ភ្នំពេញ ពីបទលួច ដោយមានស្ថានទម្ងន់ទោស (ឆក់កាបូបស្ពាយ)។

មន្ត្រីអាវុធហត្ថខណ្ឌដូនពេញបានបន្តទៀតថា ជនសង្ស័យ ឈ្មោះ សុខ វឌ្ឍនៈ ហៅ មករា ភេទប្រុស អាយុ១៦ឆ្នាំ មុខរបរសិស្សថ្នាក់ទី១០ សាលាវិទ្យាល័យឥន្ទ្រទេវី ស្នាក់នៅផ្ទះលេខ៦ ផ្លូវលេខ៩០៧ ភូមិទួលសង្កែសង្កាត់ទួលសង្កែ ខណ្ឌឫស្សីកែវ រាជធានីភ្នំពេញ។ ចំណែកកាបូបស្ពាយរបស់ជនរងគ្រោះ ក្នុងនោះមានលុយចំនួន៣៤៥ដុល្លារ លុយរៀលខ្មែរចំនួន១.៥០០.០០០រៀល ទូរស័ព្ទiphoneX ពណ៌ស ១ គ្រឿងទូរស័ព្ទiphon6 ចំនួន២គ្រឿង អត្តសញ្ញាណប័ណ្ណសញ្ជាតិខ្មែរ១សន្លឹក និងឯកសារមួយចំនួន។

កម្លាំងសមត្ថកិច្ចបានឲ្យដឹងទៀតថា ជនរងគ្រោះ ឈ្មោះ វង់ ចាន់ធារ៉ា ភេទស្រី អាយុ២៧ឆ្នាំ មុខរបរលក់ដូរ ស្នាក់នៅផ្ទះលេខ៣៤៥ ផ្លូវលំ ភូមិក្តីតាកុយ សង្កាត់វាលស្បូវ ខណ្ឌច្បារអំពៅ រាជធានីភ្នំពេញ។

ក្រោយពីបានស្តាប់ចម្លើយជនសង្ស័យ ឈ្មោះ សុខ វឌ្ឍនៈ បានឲ្យដឹងថា បក្សពួករបស់គេដែលរត់គេចខ្លួន គឺ ឈ្មោះ ផេង លីគីមសួរ ភេទប្រុស អាយុ១៧ឆ្នាំ មុខរបរសិស្សថ្នាក់ទី១០ វិទ្យាល័យព្រះស៊ីសុវត្ថិ រស់នៅម្តុំផ្សាកណ្តាល (រត់គេចខ្លួន) ជាអ្នកឆក់។ ចំណែកខ្លួនគេផ្ទាល់ ជាអ្នកបើកម៉ូតូ។ នៅក្នុងឆ្នាំ២០១៩ នេះ ពួកគេទាំង២នាក់បានធ្វើសកម្មភាពឆក់ចំនួន៣លើកមកហើយ ក្នុងភូមិសាស្ត្ររាជធានីភ្នំពេញ។ ចំពោះសម្ភារៈវត្ថុតាង កម្លាំងបានធ្វើកំណត់ហេតុប្រគល់ទទួលឲ្យទៅជនរងគ្រោះវិញរួចហើយ។ ចំណែកជនសង្ស័យ និងវត្ថុតាង បានបញ្ជូនទៅការិយាល័យស្រាវជ្រាវបទល្មើសព្រហ្មទណ្ឌ អ.ហ រាជធានីភ្នំពេញ ដើម្បីចាត់ការបន្ត និងស្រាវជ្រាវចាប់ខ្លួន៕