តុលាការជាន់ខ្ពស់មីយ៉ាន់ម៉ានៅថ្ងៃអង្គារ បានច្រានចោលការប្ដឹងឧទ្ធរណ៍របស់អ្នកយកព័ត៌មាន Reuters ពីរនាក់ ដែលត្រូវបានកាត់ទោសឲ្យជាប់ពន្ធនាគាររយៈពេល៧ឆ្នាំពី បទរំលោភច្បាប់អាថ៌កំបាំងផ្លូវការនៅក្នុងរឿងក្ដីដ៏សំខាន់មួយដែលបានលើកឡើងនូវសំណួរអំពីការផ្លាស់ប្តូររបស់ប្រទេសនេះទៅរកលទ្ធិប្រជាធិបតេយ្យ។
ចៅក្រមតុលាការកំពូលលោក Soe Naing បានប្រាប់តុលាការនៅក្នុងរដ្ឋធានី Naypyitaw ថា “ពួកគេត្រូវបានផ្ដន្ទាទោសរយៈពេលប្រាំពីរឆ្នាំហើយសេចក្ដីសម្រេចនេះនៅតែបន្ត។ ការប្ដឹងជំទាស់ត្រូវបានច្រានចោល”។លោក Wa Lone អាយុ៣៣ឆ្នាំនិងលោក Kyaw Soe Oo អាយុ២៩ឆ្នាំ បានជាប់ឃុំឃាំងអស់រយៈពេលជាង១៦ខែមកហើយចាប់ តាំងពីពួកគេត្រូវបានចាប់ខ្លួនកាលពីខែធ្នូឆ្នាំ២០១៧ខណៈកំពុង ធ្វើការស៊ើបអង្កេតលើការសម្លាប់បុរសនិងក្មេងប្រុសមូស្លីមរ៉ូហ៊ីងយ៉ាចំនួន១០នាក់។
មេធាវីសម្រាប់អ្នកយកព័ត៌មានទាំងពីរបានប្ដឹងឧទ្ធរណ៍ទៅតុលាការកំពូលដោយលើកឡើងពីកង្វះភស្តុតាងនៃអំពើឧក្រិដ្ឋកម្មនិងមានភស្តុតាងដែលថា រឿងរបស់អ្នកទាំងពីរនេះត្រូវបានរៀបចំដោយប៉ូលិស។ប៉ូលិសម្នាក់បានប្រាប់តុលាការជាន់ទាបកាលពីឆ្នាំមុនថា ក្រុមមន្ត្រីបានដាក់ឯកសារសម្ងាត់ទៅលើអ្នកយកព័ត៌មានទាំងពីររូប។
ចៅក្រមតុលាការសង្កាត់មួយរូបនៅទីក្រុង Yangon បានរកឃើញថា អ្នកកាសែតទាំងពីរមានកំហុសក្រោមច្បាប់អាថ៌កំបាំងផ្លូវការកាលពីខែកញ្ញាហើយបានកាត់ទោសពួកគេឲ្យជាប់ពន្ធនាគាររយៈពេល៧ឆ្នាំ។ តុលាការជាន់ខ្ពស់ទីក្រុង Yangon បានច្រានចោលបណ្ដឹងឧទ្ធរណ៍លើកមុនកាលពីខែមករា។
ការជាប់ពន្ធនាគាររបស់អ្នកយកព័ត៌មានទាំងពីរបានបង្កឲ្យមានការថ្កោលទោសពីក្រុមតស៊ូមតិសេរីភាពសារព័ត៌មាន អ្នកការទូតលោក ខាងលិចនិងមេដឹកនាំពិភពលោកដែលជាហេតុបន្ថែមសម្ពាធទៅលើមេដឹកនាំមីយ៉ាន់ម៉ាលោកស្រី Aung San Suu Kyi ដែលជាម្ចាស់ជ័យលាភីពានរង្វាន់ណូបែលដែលបានឡើងកាន់អំណាចក្នុងឆ្នាំ២០១៦ចំពេលមានការផ្លាស់ប្តូររបបគ្រប់គ្រងយោធា។
ក្រុមអ្នកស៊ើបអង្កេតអង្គការសហប្រជាជាតិបានអំពាវនាវឲ្យមន្ត្រីយោធាជាន់ខ្ពស់ត្រូវទទួលការកាត់ទោសពី បទឧក្រិដ្ឋកម្មប្រឆាំង នឹងមនុស្សជាតិនិងអំពើប្រល័យពូជសាសន៍ពាក់ព័ន្ធការបង្ក្រាបក្នុងឆ្នាំ២០១៧លើជនជាតិរ៉ូហ៊ីងយ៉ា៕ REUTERS
Source: Kampuchea Thmey Daily
0 Comments