ឧត្តរមានជ័យ ៖ នៅវេលាម៉ោង៧និង៣០នាទីព្រឹក ថ្ងៃទី៨ ខែមេសា ឆ្នាំ២០១៩ មន្ត្រីសាខាកាំកុងត្រូល ខេត្តឧត្តរមានជ័យ និងមន្ទីរពាណិជ្ជកម្ម បន្តចុះត្រួតពិនិត្យ និងផ្សព្វផ្សាយ អំពីគុណភាព សុវត្ថិភាពម្ហូបអាហារ ដែលមានដាក់តាំងលក់នៅក្នុងផ្សារសំរោង ក្រុងសំរោង ខេត្តឧត្តរមានជ័យ។
ក្នុងសកម្មភាពត្រួតពិនិត្យ មន្ត្រីជំនាញ បានធ្វើការវិភាគបឋមរកសារធាតុគីមីហាមឃាត់នៅលើផលិតផលម្ហូបអាហារមួយចំនួនរួមមាន ៖ ត្រីងៀត នំបញ្ចុក គុយទាវ មឹកក្រៀម សាច់ក្រក និងការចុះអង្កេតនៅតាមបណ្ដាស្តង់លក់ភេសជ្ជៈក្នុងផ្សារសំរោង ជាដើម។
ជាលទ្ធផល មន្ត្រីជំនាញ ពុំបានរកឃើញ ភាពមិនប្រក្រតីណាមួយនៅក្នុងគំរូផលិតផលម្ហូបអាហារខាងលើនោះឡើយ។ បន្ទាប់មកបានដកហូត ទឹកក្រូច២១ដប និងខ្ទិះដូងកំប៉ុង២៤០កំប៉ុង ដែលហួសកាលបរិច្ឆេទប្រើប្រាស់ ហើយមន្ត្រីយើងបានធ្វើលិខិតព្រមានឲ្យឈប់ដាក់តាំងលក់បន្តទៅទៀត និងយកទំនិញខូចទាំងអស់នោះ មករក្សាទុក និងធ្វើការដុតកម្ទេចចោលនៅពេលក្រោយ។
មន្ត្រីសាខាកាំកុងត្រូល បានធ្វើការណែនាំ ផ្សព្វផ្សាយដល់អាជីវករ ឲ្យយល់ដឹង និងអនុវត្តទៅតាមច្បាប់ ស្តីពីការគ្រប់គ្រងគុណភាព សុវត្ថិភាព លើផលិតផល ទំនិញ និងសេវា ជៀសវាងបង្កផលប៉ះពាល់ដល់សុខភាពប្រជាពលរដ្ឋ៕
Source: Kampuchea Thmey Daily
0 Comments