កីឡាប្រយុទ្ធចំនួន៦ប្រភេទ បានដាក់ឲ្យចូលរួមប្រកួត ដើម្បីប្រជែងក្នុងការប្រកួតកីឡាយុទ្ធសិល្ប៍ចម្រុះ ដណ្ដើមពានរង្វាន់សម្ដេចក្រឡាហោម ស ខេង លើកទី២ ឆ្នាំ២០១៩ ដែលរៀបចំដោយអង្គភាពកីឡាក្រសួងមហាផ្ទៃ កាលពីថ្ងៃទី៨មេសា នៅមណ្ឌលកីឡាក្នុងពហុកីឡដ្ឋានជាតិ។
កីឡាទាំង៦ប្រភេទនោះ រួមមានការាតេ-ដូ តេក្វាន់ដូWT(World Taekwondo) ហ្សូរិនជីកេមប៉ូ(Shorinji KemPo) កីឡាហាប់គីដូ (Hapkido) កីឡាយូដូ និង ប្រភេទកីឡាវូស៊ូ។
កីឡាមួយប្រភេទៗ មានកីឡាករ៤រូប ដោយទាំង៤រូបនេះ ចាប់ផ្ដើមប្រកួតវគ្គពាក់កណ្ដាលផ្ដាច់ព្រ័ត្រតែម្ដង ដោយអ្នកចាញ់ត្រូវប្រកួតគ្នាដណ្ដើមចំណាត់ថ្នាក់លេខ៣ ឯ អ្នកឈ្នះប្រកួតគ្នាដណ្ដើមមេដាយមាស។
ចំពោះលទ្ធផលវិញនោះ ប្រភេទកីឡាការាតេ-ដូ ចំណាត់ថ្នាក់លេខ១ កីឡាករឆេង ច័ន្ទដារ៉ារតនៈ លេខ២កីឡាករទេព ស្ទីវយុទ្ធថាណា និង លេខ៣កីឡាករជ្រុន វីរៈបុត្រ។
ប្រភេទកីឡាហាប់គីដូ លេខ១ កីឡាករគង់ ម៉ូណាមិថុរ៉ា លេខ២កីឡាករមុំ ឆៃ និង ចំណាត់ថ្នាក់លេខ ៣កីឡាករ ហៃ សុខដែន។
ប្រភេទកីឡាវូស៊ូ ចំណាត់ថ្នាក់លេខ ១ កីឡាករម៉ៅ មុយចន្ថារិទ្ធ លេខ២កីឡាករតាន់ ណារិទ្ធ និងចំណាត់ថ្នាក់លេខ៣ កីឡាករ ម៉ៅ គឹមលាង។
ប្រភេទកីឡាតេក្វាន់ដូWT ចំណាត់ថ្នាក់លេខ១ កីឡាករសំ យូដេត លេខ ២ កីឡាករឈុន សុខឡុង លេខ ៣ កីឡាករម៉ៅ គឹមលាង។
ប្រភេទកីឡាហ្ស៊ូរិនជិកេមប៉ូ លេខ១កីឡាករផាត សារ៉េន លេខ២គង់ សារវ័ន្ដ និង លេខ៣
កីឡាករឌុន សម្ផស្ស។
ប្រភេទកីឡាយូដូ ចំណាត់ថ្នាក់លេខ ១ កីឡាករនុត សេរីរដ្ឋ ចំណាត់ថ្នាក់លេខ២ កីឡាករនង គ្រឹស្នា និង ចំណាត់ថ្នាក់លេខ ៣កីឡាករកេត ពុទ្ធារិទ្ធ។
លោកឧត្ដមសេនីយ៍ឯក ជា ប៊ុនហេង ប្រធានអង្គភាពកីឡាក្រសួងមហាផ្ទៃ បានអះអាងថាព្រឹត្តិការណ៍ប្រកួតកីឡាយុទ្ធសិល្ប៍ចម្រុះនេះ ឧបត្ថម្ភទាំងស្រុងដោយសម្ដេចក្រឡាហោម ស ខេងឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ។ ព្រឹត្តិការណ៍នេះរៀបចំឡើង ដើម្បីឲ្យកីឡាករ-កីឡាការិនីបានទទួលប្រាក់ឧបត្ថម្ភ ដើម្បីចាយវាយនៅក្នុងពិធីបុណ្យចូលឆ្នាំប្រពៃណីជាតិខាងមុខនេះ៕
Source: Kampuchea Thmey Daily
0 Comments