ប្រទេសរុស្ស៊ីកាលពីថ្ងៃពុធ បានបង្កភាពងាយស្រួលសម្រាប់ប្រជាពលរដ្ឋដែលរស់នៅក្នុងទឹកដីបំបែកខ្លួនរបស់អ៊ុយក្រែនភាគខាងកើតក្នុងការទទួលបានលិខិតឆ្លងដែនរុស្ស៊ី។ រឿងនេះបានបណ្ដាលឲ្យមានការថ្កោលទោសភ្លាមៗពីរដ្ឋាភិបាលក្រុងគៀវក្នុងរយៈពេលត្រឹមតែបីថ្ងៃប៉ុណ្ណោះបន្ទាប់ពីប្រទេសនេះបោះឆ្នោតជ្រើសរើសប្រធានាធិបតីថ្មី។
លោកប្រធានាធិបតី Vladimir Putin បានចុះហត្ថលេខាលើអនុក្រឹត្យនេះដែលសំដៅទៅលើប្រជាពលរដ្ឋនៃសាធារណរដ្ឋ Donetsk និង Lugansk ដែលគេមិនទទួលស្គាល់ដែលបានបែកចេញពីទីក្រុងគៀវនៅក្នុងឆ្នាំ២០១៤ហើយត្រូវបានគ្រប់គ្រងដោយពួកឧទ្ទាមដែលគាំទ្រដោយក្រុងមូស្គូ។ ឥឡូវនេះ ប្រជាជនដែលកំពុងរស់នៅ ក្នុងតំបន់បំបែកខ្លួនទាំងពីរនេះនឹងមានសិទ្ធិទទួលបានលិខិតឆ្លងដែនរុស្ស៊ីក្នុងរយៈពេលបីខែបន្ទាប់ពីបានដាក់ពាក្យស្នើសុំ។
ជម្លោះរវាងរដ្ឋាភិបាលអ៊ុយក្រែននិងពួកឧទ្ទាមបំបែកខ្លួនបានចាប់ផ្តើមឡើងបន្ទាប់ពីទីក្រុងមូស្គូបានកាត់យកឧបទ្វីប Crimea នៅក្នុងឆ្នាំ២០១៤។ សង្គ្រាមនេះបានសម្លាប់មនុស្សប្រហែល១៣,០០០នាក់។ ក្រុមមន្ត្រីនៅទីក្រុងគៀវបានរិះគន់ទង្វើនេះដោយនិយាយថា ពេលវេលាគឺមានបំណងធ្វើឲ្យអស្ថិរភាពដល់ប្រទេសអ៊ុយក្រែនក្នុងអំឡុងពេលនៃការផ្លាស់ប្តូរ។ប្រទេសនេះបានបោះឆ្នោតជ្រើសរើសតារាកំប្លែងលោក Volodymyr Zelensky ឲ្យក្លាយជាប្រធានាធិបតីកាលពីសប្តាហ៍មុន។ ទោះបីជាយ៉ាងណាក៏ដោយ លោក Putin បាននិយាយថា ច្បាប់ថ្មីនេះគឺជាបញ្ហាមនុស្សធម៌សុទ្ធសាធ។
លោកបាននិយាយនៅក្នុងជំនួបមួយជាមួយសមាជិកសភានៅទីក្រុង Saint Petersburg ថា “យើងគ្មានបំណងបង្កើតបញ្ហាសម្រាប់អាជ្ញាធរអ៊ុយក្រែនថ្មីទេ”។មេដឹកនាំរុស្ស៊ីរូបនេះបានបន្ថែមថា ប្រជាជនដែលរស់នៅក្នុងសាធារណរដ្ឋឧទ្ទាមគឺត្រូវបានដកហូតទាំងស្រុងពីសិទ្ធិស៊ីវិល។ យោងតាមច្បាប់ចម្លងនៃអនុក្រឹត្យដែលបានចេញផ្សាយនៅលើវេបសាយវិមានក្រឹមឡាំងបានឲ្យដឹងថា ច្បាប់នេះមានគោលដៅការពារសិទ្ធិនិងត្រូវបានដឹកនាំដោយបទដ្ឋានច្បាប់អន្តរជាតិ៕ AFP
Source: Kampuchea Thmey Daily
0 Comments