កំពង់ចាម ៖ បុរសប្រមឹកផឹកស្រា តាំងពីព្រឹក រហូតល្ងាច ស្រាប់តែឃើញដេកស្លាប់ ដោយសារសម្ពាធឈាមឡើងខ្ពស់។
ប្រភពព័ត៌មានពីប៉ូលិសបានឲ្យដឹងថា នៅថ្ងៃទី២៤ ខែមេសា ឆ្នាំ២០១៩ វេលាម៉ោង១៦និង៣០នាទី កម្លាំងប៉ុស្តិ៍នគរបាលរដ្ឋបាលចម្ការអណ្ដូង បានទទួលព័ត៌មាន ពីប្រជាពលរដ្ឋថា មានករណីមនុស្សស្រវឹងស្រាដេកស្លាប់ នៅចំណុចមុខផ្ទះឈ្មោះ សួន ស៊ីនួន ភេទស្រី អាយុ៥៦ឆ្នាំ ជាតិខ្មែរ ស្ថិតក្នុងភូមិចម្ការអណ្ដូង ឃុំចម្ការអណ្ដូង ស្រុកចម្ការលើ ខេត្តកំពង់ចាម។
ប៉ូលិសបានបន្តថា ក្រោយពីទទួលបានព័ត៌មានភ្លាម ជំនាញពិនិត្យ និងវិភាគកន្លែងកើតហេតុ បង្កើតគណៈកម្មាធិការត្រួតពិនិត្យសព នៅថ្ងៃទី២៤ ខែមេសា ឆ្នាំ២០១៩ វេលាម៉ោង១៧និង២០នាទី។
តាមការបំភ្លឺពីអ្នកលក់ស្រាក្នុងភូមិឲ្យដឹងថា ឃើញ ឈ្មោះ យួន ម៉ុន (ជនរងគ្រោះ) ភេទប្រុស អាយុ៣៨ឆ្នាំ ជាតិខ្មែរ នៅភូមិ/ឃុំកើតហេតុខាងលើ បានមកទិញស្រាថ្នាំនៅផ្ទះគាត់ចំនួន០២ដង ផឹក គឺនៅថ្ងៃកើតហេតុវេលាម៉ោង៧ព្រឹក និង វេលាម៉ោង១២ថ្ងៃត្រង់ពេលផឹករួច(ជនរងគ្រោះ)តែងតែទៅដេកនៅមុខផ្ទះកន្លែងកើតហេតុខាងលើ ហើយបានដេកស្លាប់នៅវេលាម៉ោង១៦និង១០នាទី ថ្ងៃខែឆ្នាំដដែល។
ប៉ូលិសបានបញ្ជាក់ថា គណៈកម្មការបានធ្វើការពិនិត្យសពឃើញថា លើរាងកាយ ជនរងគ្រោះពុំមានស្លាកស្នាមអ្វីទេ ហើយជនរងគ្រោះ ជាមនុស្សញៀនស្រាផឹកជាប្រចាំ ហើយមិនសូវហូបបាយទៀងទាត់ទេ។
ឆ្លងតាមការស្រាវជ្រាវស៊ើបអង្កេតនៅកន្លែងកើតហេតុ និងជុំវិញកន្លែងកើតហេតុ ព្រមទាំងការបំភ្លឺក្រុមគ្រួសារជនរងគ្រោះមក លោកគ្រូ និងជំនាញសន្និដ្ឋានបានថា ការស្លាប់របស់ ឈ្មោះ យួន ម៉ុននេះគ្មាន ពាក់ព័ន្ធនឹងបទល្មើសព្រហ្មទណ្ឌឡើយ គឺ ឈ្មោះ យួន ម៉ុន ពិតជាស្លាប់ដោយសារ ការផឹកស្រាធ្វើឲ្យសម្ពាធឈាមឡើងខ្ពស់បណ្តាលឲ្យគាំងបេះដូងស្លាប់ដោយខ្លួនឯងពិតប្រាកដមែន។
ក្រោយពីគណៈកម្មការពិនិត្យរួច បានប្រគល់សាកសពឲ្យទៅក្រុមគ្រួសារ ធ្វើបុណ្យតាមប្រពៃណីខ្មែរ ៕
Source: Kampuchea Thmey Daily
0 Comments