ប្រដាល់ ៖ អ្នកប្រដាល់ជើងខ្លាំងរបស់កម្ពុជា ផាន់ គ្រាន់ អ្នកប្រដាល់ក្លិបពុទ្ធសេរីវង្សកីឡា និងជាម្ចាស់ខ្សែក្រវាត់Barrley Black ទម្ងន់៦៣,៥០០គីឡូក្រាម ត្រូវគេផ្គូឲ្យជួបប្រកួតជាមួយថៃសេន ឃុម (Sen Khum) នៅរសៀលថ្ងៃសៅរ៍ ទី២៧ ខែមេសា ឆ្នាំ២០១៩នេះ នៅសង្វៀនខារ៉ាបាវរបស់អាស៊ីអាគ្នេយ៍។
សេន ឃុម នេះបានវាយចាញ់ផាន់ គ្រាន់ ដោយពិន្ទុមិនអស់ចិត្ត កាលពីជួបគ្នាលើកដំបូងនាថ្ងៃទី២២ខែកក្កដា ឆ្នាំ២០១៨ កន្លងទៅ ដែលនាំឲ្យគេសុំមកសងសឹកនឹង ផាន់ គ្រាន់ វិញនេះ។ សេន ឃុម គេក៏ធ្លាប់បានវាយស្មើពិន្ទុ ជាមួយ សេង ស្រឿន អ្នកប្រដាល់ក្លិបមហិទ្ធរិទ្ធតាដំបងដែកដែរ មុនជួបជាមួយផាន់ គ្រាន់ នោះ។ ទោះជាយ៉ាងណា សម្រាប់ជំនួបជាមួយផាន់ គ្រាន់ លើកនេះ មិនដឹងថា សេន ឃុម អាចសងសឹកបានសម្រេច ឬអត់នោះទេ?។
យ៉ាងណា ផាន់ គ្រាន់ ក៏មិនអាចមើលស្រាល ឬ ធ្វេសប្រហែសនោះទេ ព្រោះ សេន ឃុ អ្នកប្រដាល់ថៃរូបនេះ គឺមានស្នៀតប្រដាល់ និងបច្ចេកទេសមិនជាអន់នោះឡើយ។ អ្នកប្រដាល់ថៃរូបនេះ មានកំណត់ត្រាប្រកួតចំនួន៧៧លើក ឈ្នះ៦៤លើក ចាញ់១២លើក និង ស្មើ០២លើក។ រីឯប្រវត្តិប្រកួតរបស់ផាន់ គ្រាន់ វិញ គឺ ប្រកួត១១៨លើក ឈ្នះ៩៩លើក ចាញ់១៦លើក និង ស្មើ០៣លើក។
ផាន់ គ្រាន់ មិនដឹងថា អាចយកឈ្នះ សេន ឃុម បានទៀតឬអត់នោះទេ? ព្រោះថា ថ្វីត្បិតតែធ្លាប់ចាញ់ផាន់ គ្រាន់ម្តងហើយក្តី ប៉ុន្តែចាញ់ត្រឹមពិន្ទុប៉ុណ្ណោះ។ អ្នកប្រដាល់ថៃរូបនេះ គេមានផ្លែល្អ និងរឹងមាំ ហើយ។ ដូច្នេះ ចាំមើលរវាងផាន់ គ្រាន់ និង សេន ឃុម ជួបគ្នាលើកទី២នេះ តើនរណាជាអ្នកឈ្នះ ? ។
អ្នកប្រដាល់ម៉ន ព្រហ្មម៉ាញ ក្លិបការិយាល័យទី៥ កងទ័ពជើងគោក ត្រូវគេផ្គូឲ្យប្រកួតជាមួយអ្នកប្រដាល់ថៃ ពែក ធាង ក្នុងប្រភេទទម្ងន់៦៣,៥០០គីឡូក្រាមដែរ។ រវាងម៉ន ព្រហ្មម៉ាញ និង ពែក ធាងនេះ មិនធ្លាប់ជួបគ្នាទេកន្លងមក។
ពែក ធាង នេះ គេធ្លាប់មកប្រកួតនៅកម្ពុជាម្តងពីរដងហើយ។ ពែក ធាង គេមានសមត្ថភាពប្រហាក់ប្រហែលគ្នាទេ ហើយមាឌ និងកម្ពស់ ក៏ប្រហែលគ្នាដែរ ដោយពួកគេទាំងពីរ មានកម្ពស់១,៦៨ម៉ែត្រដូចគ្នា។ ប៉ុន្តែប្រវត្តិប្រកួតរបស់ ពែក ធាង គឺតិចជាងម៉ន ព្រហ្មម៉ាញ ជាង១០លើក។
អ្នកប្រដាល់ថៃរូបនេះ គេមានកំណត់ត្រាប្រកួតចំនួន៦១លើក ឈ្នះ៥០លើក ចាញ់១១លើក មិនដែលស្មើ។ ពែក ធាង គេជាអ្នកប្រដាល់ជើងថ្មី ប៉ុន្តែគេវាយល្អ និងខ្លាំងមិនចាញ់អ្នកប្រដាល់កម្ពុជានោះឡើយ។ ដូច្នេះ ម៉ន ព្រហ្មម៉ាញ មិនអាចមើលស្រាលពែក ធាង បានទេ ព្រោះអ្នកប្រដាល់ថៃរូបនេះ វាយខ្លាំង និងមានក្បាច់គុនល្អផងដែរ។ យ៉ាងណា សម្រាប់ការប្រកួតជាមួយ ពែក ធាង នេះ ម៉ន ព្រហ្មម៉ាញ ត្រូវតែប្រយ័ត្នកណ្ដាប់ដៃរបស់គេ ព្រោះថាកណ្ដាប់ដៃរបស់គេរហ័ស លឿន។
តែយ៉ាងណា ពែក ធាង ក៏មិនជាស្រួលខ្លួនប៉ុន្មានដែរ ព្រោះ ម៉ន ព្រហ្មម៉ាញ គេក៏វាយខ្លាំង និងមានបច្ចេកទេសក្នុងការប្រកួតល្អដែរ។ ហើយមួយទៀត គេវាយរហ័ស ដករហ័ស ចេញចូលលឿនមិនចាញ់ពែក ធាង ទេ។
ម៉ន ព្រហ្មម៉ាញ មានកំណត់ត្រាប្រកួតចំនួន ៧៨លើក ឈ្នះ៦៥លើក ចាញ់១០លើក និង ស្មើ០៣លើក។ ចាំមើល តើ ម៉ន ព្រហ្មម៉ាញ អាចយកឈ្នះ ពែក ធាង បាន ឬអត់នៅក្នុងជំនួបលើកដំបូងនេះ ? ។ ទោះជាយ៉ាងណាក្តី សម្រាប់ការជួបគ្នានេះ ពុំអាចសន្និដ្ឋានមុនថា អ្នកណាឈ្នះ អ្នកណាចាញ់នោះឡើយ ហើយពីរនាក់នេះ ក៏មិនអាចអ្នកណាមើលស្រាលអ្នកណាបានដែរ៕
Source: Kampuchea Thmey Daily
0 Comments