ភ្នំពេញ ៖ កាលពីថ្ងៃពុធ ៦កើត ខែចេត្រ ឆ្នាំច សំរឹទ្ធិស័ក ព.ស.២៥៦២ ត្រូវនឹងថ្ងៃទី១០ ខែមេសា ឆ្នាំ២០១៩ លោក ស៊ុន ចាន់ថុល ទេសរដ្ឋមន្ត្រី រដ្ឋមន្ត្រីក្រសួងសាធារណការ និងដឹកជញ្ជូន បានអញ្ជើញជាអធិបតី ក្នុងពិធីប្រកាសសុពលភាពថ្នាក់ដឹកនាំក្រសួង និងមន្ដ្រីរាជការដែលទើបទទួលបានការតែងតាំងថ្មី របស់ក្រសួងសាធារណការ និងដឹកជញ្ជូន ដោយមានការចូលរួមពីថ្នាក់ដឹកនាំជាន់ខ្ពស់ក្រសួងជា រដ្ឋលេខាធិការ អនុរដ្ឋលេខាធិការ អគ្គាធិការ អគ្គនាយក ប្រធាននាយកដ្ឋាន ប្រធានអង្គភាព និងមន្ដ្រីរាជការក្រសួងផងដែរ។
ថ្លែងក្នុងពិធីប្រកាសតែងតាំងនាឱកាសនោះ លោកទេសរដ្ឋមន្ត្រី ស៊ុន ចាន់ថុល បានគូសបញ្ជាក់ថា ការតែងតាំង ថ្នាក់ដឹកនាំ និងមន្ត្រីរាជការថ្មីរបស់ក្រសួងនាពេលនេះ ធ្វើឡើងដោយភាពសុក្រឹត្យតាមសមត្ថភាព និងការខិតខំប្រឹងប្រែងបំពេញការងារបម្រើប្រជាពលរដ្ឋ ក្រសួង និងប្រទេសជាតិនាពេលកន្លងមក និងដើម្បី បំពេញតាមមុខតំណែងក្នុងរចនាសម្ព័ន្ធអង្គការលេខថ្មីរបស់ក្រសួងសាធារណការ និងដឹកជញ្ជូន ដែល ទទួលបានការឯកភាពពីសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រ កម្ពុជា ហើយរចនាសម្ព័ន្ធថ្មីនេះ នឹងជួយធ្វើឲ្យកំណែទម្រង់របស់ក្រសួងអាចសម្រេចបាននូវប្រសិទ្ធភាព និងតម្លាភាពក្នុងការបំពេញការងារជូនប្រជាពលរដ្ឋ និងប្រទេសជាតិ។
លោកទេសរដ្ឋមន្ត្រី បានសម្តែងនូវការអបអរសាទរ និងបានជំរុញលើកទឹកចិត្តដល់មន្ត្រីដែលទើបបាន តែងតាំងថ្មីទាំងអស់ឲ្យខិតខំប្រឹងប្រែងធ្វើការងារឲ្យកាន់តែសកម្ម និងប្រកបដោយភាពទទួលខុសត្រូវនៅ តាមមុខតំណែងរបស់ខ្លួន ដើម្បីជាផលប្រយោជន៍ដល់ក្រសួង និងប្រទេសជាតិ។
ជាមួយគ្នានេះផងដែរលោកទេសរដ្ឋមន្ត្រី ស៊ុន ចាន់ថុល បានជំរុញឲ្យគ្រប់មន្ទីរសាធារណការ និងដឹកជញ្ជូនរាជធានី ខេត្ត ផ្សព្វផ្សាយដល់មន្ត្រីរបស់ខ្លួនក្នុងការប្រើប្រាស់កម្មវិធីថែទាំផ្លូវ ROAD CARE mobile app ឲ្យបានទូលំទូលាយ និងប្រព័ន្ធលក់លេខពិសេសផ្ទាល់ខ្លួនដែលជួយរកចំណូលបន្ថែមចូលថវិកាជិត។
លោកទេសរដ្ឋមន្ដ្រី ក៏បានស្នើឲ្យមន្ដ្រីរាជការនៃក្រសួងសាធារណការ និងដឹកជញ្ជូនទាំងអស់ ត្រូវ អនុវត្តតាមនូវអនុសាសន៍ ១១ចំណុចរបស់ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ដ្រី នៃព្រះរាជាណាចក្រកម្ពុជា ដើម្បីបម្រើការងារជូនប្រជាពលរដ្ឋ និងប្រទេសជាតិរបស់យើង៕
Source: Kampuchea Thmey Daily
0 Comments