អូឡាំពិក ៖ វគ្គរដ្ឋបាលកីឡា សម្រាប់មន្ត្រី និងគ្រូអប់រំកាយ និង កីឡានៅខេត្តស្វាយរៀង ដែលបើកឡើងនៅខេត្តស្វាយរៀងកាលពីថ្ងៃទី ២២ មកនោះ បានបញ្ចប់ហើយនៅល្ងាចថ្ងៃទី២៥ ខែមេសា ឆ្នាំ២០១៩។
លោក វ៉ាត់ ចំរើន អគ្គលេខាធិការគណៈកម្មាធិការជាតិអូឡាំពិកកម្ពុជា បានអញ្ជើញចូលរួមក្នុងពិធីបិទវគ្គនេះ។
វគ្គនេះឧបត្ថម្ភពីអង្គការសាមគ្គីអូឡាំពិកអន្តរជាតិ។ សិក្ខាកាមដែលចូលរួមចំនួន២៥រូបនោះមាន៣រូបជាស្ត្រីដែលមកពីការិយាល័យអប់រំកាយ និង កីឡា មន្ត្រីនិងគ្រូអប់រំកាយ និងកីឡាវិទ្យាល័យខេត្តស្វាយរៀង មន្ត្រីការិយាល័យអប់រំកាយ និង កីឡាក្រុងស្វាយរៀង ស្រុកស្វាយទាប ស្រុកស្វាយជ្រំ ស្រុករំដួល និងស្រុករមាសហែក។
អ្វីដែលគួរឲ្យកត់សំគាល់នោះ គឺក្នុងចំណោមសិក្ខាកាមចំនួន២៥រូប មានតែ២រូបប៉ុណ្ណោះដែលស្មើនឹង៨ភាគរយ បានទទួលនិទ្ទេសល្អ ៩រូប ស្មើនឹង៩ភាគរយ ទទួលបាននិទ្ទេសល្អបង្គួរ និង១៤រូបស្មើនឹង៥៦ភាគរយ បានទទួលនិទ្ទេសមធ្យម។
វាគ្មិនសម្រាប់វគ្គនេះ មានលោកវេជ្ជបណ្ឌិត ស្ដើង ជា ប្រធានអនុគណៈកម្មការវេជ្ជសាស្ត្រអមគណៈកម្មាធិការជាតិអូឡាំពិកកម្ពុជា ដោយលោកធ្វើបទបង្ហាញពីការប្រឆាំងដូប៉ា ឬដូពីង(សារធាតុលើកកម្លាំងដែលត្រូវហាមមិនឲ្យប្រើនៅក្នុងកីឡា )។ ភេសជ្ជៈសម្រាប់កីឡាករ-កីឡាការិនី ការបញ្ជាក់ភេទនៅក្នុងកីឡា វិធីការពាររបួសនៅក្នុងកីឡានិង ការសង្គ្រោះបន្ទាន់។
លោក បឹង គឹមតោ អនុប្រធាននាយកដ្ឋានអប់រំកាយ និង កីឡាធ្វើបទបង្ហាញពីរបៀបធ្វើការងារជាមួយអ្នកស្ម័គ្រចិត្ត វិធីក្នុងការរៀបចំអង្គប្រជុំ ការទំនាក់ទំនង និងបង្ហាពីការងារស្ត្រី និង កីឡា។
លោក វ៉ាត់ ចំរើន អគ្គលេខាធិការគណៈកម្មាធិការជាតិអូឡាំពិកកម្ពុជា ធ្វើបទបង្ហាញពីប្រវត្តិចលនាអូឡាំពិក និងរចនាសម្ព័ន្ធរបស់វា។ អង្គការសាមគ្គីអូឡាំពិក ការលេងដោយយុត្តិធម៌ ផែនការកម្មវិធីហ្វឹកហាត់កីឡា ផែនការចេញដំណើររបស់ប្រតិភូក្នុងការចេញទៅប្រកួតនៅក្រៅប្រទេស និង ភាពជាអ្នកដឹកនាំ៕
Source: Kampuchea Thmey Daily
0 Comments