លោក ប៊ូ ជុំសេរី អនុរដ្ឋលេខាធិការក្រសួងអប់រំ យុវជន និងកីឡា តំណាងលោកបណ្ឌិតសភាចារ្យហង់ ជួន ណារ៉ុន រដ្ឋមន្ត្រីក្រសួងអប់រំ យុវជន និងកីឡា បានអញ្ជើញជាអធិបតីក្នុងពិធីបិទវគ្គបណ្ដុះបណ្តាល ស្ដីពីការរៀបចំផែនការ និងទ្រឹស្ដីហាត់ហ្វឹកហ្វឺនរបស់គ្រូបង្វឹក គ្រូជំនួយ គ្រូជម្រើសជាតិ និងក្រុមថ្នាល ដើម្បីពង្រឹងសមត្ថភាពដល់គ្រូបង្វឹក គ្រូជំនួយសរុបចំនួន ១៦៥នាក់ មកពីសហព័ន្ធកីឡាជាតិទាំង៣៤ និងគ្រូបង្វឹកជនពិការចំនួន ១០នាក់ ដែលបានដំណើរការទៅរយៈពេល៣ថ្ងៃ ចាប់ពីថ្ងៃទី២២ ដល់ថ្ងៃទី២៤ ខែមេសា ឆ្នាំ២០១៩ នៅសាលប្រជុំមជ្ឈមណ្ឌលជាតិហ្វឹកហ្វឺនកីឡា ។
លោកប៊ូ ជុំសេរី បានផ្ដាំផ្ញើដល់លោកគ្រូ អ្នកគ្រូ ជាសិក្ខាកាមថា ចូរយកចំណេះដឹង បច្ចេកទេសថ្មីៗ ដែលទទួលបានពីការបណ្ដុះបណ្ដាលក្នុងរយៈពេល៣ថ្ងៃ ពីអ្នកជំនាញទាំង៦រូប ដែលបានផ្ដល់ទាំងបច្ចេកទេស ទ្រឹស្ដី និងរបៀបរៀបចំផែនការ សូមធ្វើយ៉ាងណា យកទៅអនុវត្តឲ្យអស់លទ្ធភាព ចំទិសដៅ និងប្រកបដោយគុណផលខ្ពស់ ជាមួយនឹងកីឡាករ កីឡាការិនីរបស់យើង ក្នុងដំណើរត្រៀមឈានឆ្ពោះទៅដណ្ដើមយកមេដាយ ពីការប្រកួតកីឡាស៊ីហ្គេមលើកទី៣០ នៅប្រទេសហ្វីលីពីន និងការប្រកួតជាលក្ខណៈអន្ដរជាតិនានា ប្រកបដោយជោគជ័យនិងជៀសឲ្យផុតពីការប្រើប្រាស់សារធាតុញៀន បើឈ្នះៗដោយកិត្តិយស។
វគ្គបណ្ដុះបណ្ដាលស្តីពី « ផែនការ និងទ្រឹស្ដីហាត់ហ្វឹកហ្វឺនរបស់គ្រូបង្វឹកជម្រើសជាតិ » ដើម្បីបណ្តុះបណ្តាលបច្ចេកទេស និង ពង្រឹងគុណភាព បង្វឹក ដល់គ្រូបង្វឹក និង គ្រូជំនួយ ជម្រើសជាតិ។
សិក្ខាកាមជាគ្រូបង្វឹក និង គ្រូជំនួយ គ្រូជម្រើសជាតិចំនួន១៦៥រូបទទួលបានការបណ្តុះបណ្តាលពីអ្នកជំនាញចំនួន៦រូប ពី បច្ចេកទេស ទ្រឹស្តី និង របៀបធ្វើផែនការបង្វឹកកីឡាករជម្រើសជាតិ។
អ្នកជំនាញទាំង៦រូបនោះ គឺលោក ប៊ូ ជុំសេរី អនុរដ្ឋលេខាធិការក្រសួងអប់រំ យុវជន និងកីឡា ចែករំលែកពី គ្រូបង្វឹក និង ការអភិវឌ្ឍគុណផល , លោក វ៉ាត់ ចំរើន អគ្គលេខាធិការ នៃគណៈកម្មាធិការជាតិអូឡាំពិកកម្ពុជា បង្ហាញពីរបៀបធ្វើផែនការ និង វិធីសាស្ត្រ ហ្វឹកហាត់កីឡាកម្រិតខ្ពស់ , លោកវេជ្ជបណ្ឌិត ស្តើង ជា ធ្វើបទឧទ្ទេសនាមពីរបបអាហារ និង ភេសជ្ជៈ សម្រាប់អត្តពលិក , លោក ព្រំ វណ្ណា រឿន ពីការប្រឆាំងសារធាតុដូប៉ា តាមអនឡាញ , លោក ប្រាក់ សុវណ្ណារ៉ា បង្ហាញពីផែនការហាត់ ហ្វឹកហ្វឺន និង លោក រ៉ាម៉ា បង្ហាញ ពីការប្រើប្រាស់ឧបករណ៍ហ្វឹកហាត់ជំនួយសាច់ដុំ។
សិក្ខាសាលា ស្តីពី « ផែនការ និង ទ្រឹស្តី ហាត់ ហ្វឹកហ្វឺន របស់គ្រូជម្រើសជាតិ » នេះ គឺដើម្បីរួមចំណែកអភិវឌ្ឍសមត្ថភាពគ្រូបង្វឹក និង កីឡាករ សម្រាប់ត្រៀមការប្រកួតកីឡាអាស៊ីអាគ្នេយ៍ ASEAN Game s ឆ្នាំ២០១៩ នៅប្រទេសហ្វីលីពីនផងដែរ ។
លោក ប៉ុន សុខ ដែលជាប្រធានមជ្ឈមណ្ឌលជាតិហ្វឹកហ្វឺនកីឡា បានចាត់ទុក ការធ្វើផែនការល្អ ជាបច្ច័យដ៏សំខាន់ ក្នុងការរួមចំណែកឲ្យការហ្វឹកហាត់ មានប្រសិទ្ធភាព និងគុណភាពផង រីកចម្រើនផង។
លោក ប៉ុន សុខ បញ្ជាក់ថា ការហ្វឹកហាត់ របស់ក្រុមកីឡាករជម្រើសជាតិ និង ថ្នាល ត្រូវធ្វើតាមលក្ខណៈ បច្ចេកទេស មានន័យថា មានផែនការល្អ ហើយត្រូវអនុវត្តផែនការនោះ ឲ្យបាន ត្រឹមត្រូវទៀត ទើបធ្វើ ឲ្យការហ្វឹកហាត់ និង ការបង្ហាត់ ទទួលបានលទ្ធផល ល្អ និង គុណផល កើនឡើង។ វគ្គនេះ យើងរៀបចំ ដើម្បីត្រៀមកីឡាស៊ីហ្គេមលើកទី ៣០ នៅហ្វីលីពីន ពិសេសស៊ីហ្គេម ឆ្នាំ ២០២៣ នៅកម្ពុជា៕
Source: Kampuchea Thmey Daily
0 Comments