យោធាសហរដ្ឋអាមេរិក បាននិយាយថា ខ្លួនបានបញ្ជូននាវាចម្បាំងកងទ័ពជើងទឹកចំនួនពីរគ្រឿងឆ្លងកាត់ច្រកសមុទ្រតៃវ៉ាន់ កាលពីថ្ងៃអាទិត្យ ស្របពេលដែលមន្ទីរបញ្ចកោណ បានបង្កើនភាពញឹកញាប់នៃចលនាតាមរយៈផ្លូវទឹកជាយុទ្ធសាស្ត្របើទោះបីជាមានការប្រឆាំងពីប្រទេសចិនក៏ដោយ។
ការធ្វើដំណើរនេះអាចបង្កើនភាពតានតឹងជាមួយប្រទេសចិនប៉ុន្តែទំនងជាត្រូវបានមើលឃើញដោយកោះតៃវ៉ាន់ថាជាសញ្ញាមួយនៃការគាំទ្រពីរដ្ឋបាលរបស់លោក Trump ខណៈមានការប៉ះទង្គិចគ្នាកាន់តែខ្លាំងឡើងរវាងទីក្រុងតៃប៉ិនិងទីក្រុងប៉េកាំង។
កោះតៃវ៉ាន់គឺជាផ្នែកមួយនៃទំនាក់ទំនងតានតឹងរវាងសហរដ្ឋអាមេរិកនិងចិនដែលក៏រួមបញ្ចូលទាំងសង្គ្រាមពាណិជ្ជកម្ម ការដាក់ទណ្ឌកម្មរបស់សហរដ្ឋអាមេរិកនិងឥរិយាបទបង្ហាញសាច់ដុំកាន់តែខ្លាំងឡើងរបស់កងទ័ពចិននៅក្នុងសមុទ្រចិនខាងត្បូងផងដែរ។
នាវាពិឃាដទាំងពីរគ្រឿងនេះត្រូវបានកំណត់អត្តសញ្ញាណថាមានឈ្មោះ William P. Lawrence និង Stethem។ ច្រកសមុទ្រតៃវ៉ាន់ប្រវែង១៨០គីឡូម៉ែត្រគឺពុះចែកកោះតៃវ៉ាន់ពីប្រទេសចិន។
លោកមេបញ្ជាការ Clay Doss ដែលជាអ្នកនាំពាក្យកងនាវាចរទី៧របស់កងទ័ពជើងទឹកអាមេរិកបាននិយាយនៅក្នុងសេចក្តីថ្លែងការណ៍មួយថា “ការឆ្លងកាត់របស់នាវាតាមច្រកសមុទ្រតៃវ៉ាន់បានបង្ហាញពីការប្តេជ្ញាចិត្តរបស់សហរដ្ឋអាមេរិកចំពោះតំបន់ឥណ្ឌូចិនដោយសេរីនិងបើកចំហ”។
លោក Doss បាននិយាយថា មិនមានអន្តរកម្មគ្មានសុវត្ថិភាពឬគ្មានវិជ្ជាជីវៈជាមួយនាវារបស់ប្រទេសដទៃទៀតក្នុងអំឡុងពេលឆ្លងកាត់នោះទេ។
ស្របពេលជាមួយគ្នានោះដែរ ក្រសួងការពារជាតិកោះតៃវ៉ាន់បាននិយាយថា នាវារបស់សហរដ្ឋអាមេរិកបានធ្វើដំណើរឆ្លងកាត់ភាគខាងជើងតាមច្រកសមុទ្រនេះ។
ក្រសួងបាននិយាយថា កងកម្លាំងប្រដាប់អាវុធរបស់កោះតៃវ៉ាន់បានឃ្លាំមើលការឆ្លងកាត់នេះហើយគ្មាន រឿងខុសប្លែកពីធម្មតាបានកើតឡើងក្នុងអំឡុងពេលនោះទេ។
ទោះបីជាយ៉ាងណាក៏ដោយ មិនមានសេចក្តីអធិប្បាយភ្លាមៗពីប្រទេសចិនឡើយ។
គួរបញ្ជាក់ថា សហរដ្ឋអាមេរិកមិនមានទំនាក់ទំនងផ្លូវការជាមួយកោះតៃវ៉ាន់ទេប៉ុន្តែត្រូវបានចងភ្ជាប់ដោយច្បាប់ដើម្បីជួយផ្តល់ឲ្យកោះនេះនូវមធ្យោបាយដើម្បីការពារខ្លួននិងជាប្រភពអាវុធដ៏សំខាន់របស់ខ្លួន។
មន្ទីរបញ្ចកោណនិយាយថា ក្រុងវ៉ាស៊ីនតោនបានលក់អាវុធឲ្យក្រុងតៃប៉ិគិតជាទឹកប្រាក់ជាង១៥ពាន់លានដុល្លារចាប់តាំងពីឆ្នាំ២០១០មក៕ REUTERS
Source: Kampuchea Thmey Daily
0 Comments