ភ្នំពេញ ៖ នារសៀលថ្ងៃទី២៨មេសានេះ លោក ចេង មុនីរ៉ា អភិបាល នៃគណៈអភិបាលខណ្ឌច្បារអំពៅ បានបន្តចុះសាកសួរសុខទុក្ខដល់មន្ត្រីសាលាខណ្ឌ ដែលកំពុងសម្រាលបុត្រ។
ក្នុងឱកាសចុះសាកសួរសុខទុក្ខនោះដែរ លោក ចេង មុនីរ៉ា បាននាំយកថវិកាចំនួន២លានរៀល និងភេសជ្ជៈផ្តល់ដល់ស្ត្រី ឈ្មោះ នួន សុភក្ត្រ័ ដែលជាមន្ត្រីបម្រើការនៅការិយាល័យរដ្ឋបាលសាលាខណ្ឌច្បារអំពៅទៀតផង។
លោក ចេង មុនីរ៉ា បានមានប្រសាសន៍ថារាល់ពេលដែលមន្ត្រីរាជការដែលបម្រើការងារនៅក្នុងសាលាខណ្ឌ ឬ ក៏តាមបណ្តាសង្កាត់ទាំង៨ ក្នុងមូលដ្ឋានខណ្ឌច្បារអំពៅ មានជំងឺ ឬជួបការខ្វះខាតក្នុងជីវភាព គឺលោកតែងតែចុះទៅជួយភ្លាមៗ ដោយមិនពន្យារឡើយ ព្រោះធ្វើយ៉ាងណាឲ្យអ្នកជំងឺឆាប់ជាសះស្បើយ។
លោកអភិបាលខណ្ឌបានបញ្ជាក់ថា មន្ត្រីរាជការទាំងអស់ នៅពេលដែលគាត់មានកម្លាំងកំហែងបំពេញការងារជូនដល់អង្គភាព គឺគាត់ខិតខំប្រឹងប្រែងណាស់។ ដូច្នេះហើយ នៅពេលដែលគាត់មានទុក្ខធុរៈ គឺដាច់ខាត ត្រូវតែចុះទៅជួយគាត់ ដើម្បីលើកកម្លាំងចិត្តជូនគាត់ ពិសេសឲ្យគ្រួសាររបស់គាត់មានភាពកក់ក្តៅ។
គួររំលឹកថា ឲ្យតែមានមន្ត្រីរាជការ ឬប្រជាពលរដ្ឋក្នុងមូលដ្ឋានខណ្ឌច្បារអំពៅមានទុក្ខលំបាក គឺតែងតែមានវត្តមាន លោក ចេង មុនីរ៉ា អភិបាល នៃគណៈអភិបាលខណ្ឌច្បារអំពៅ ចុះជួយដោយផ្ទាល់ទោះថ្ងៃ ឬយប់ក៏ដោយ ឲ្យតែលោកអភិបាលខណ្ឌទទួលព័ត៌មាន ដោយលោកមិនពន្យារពេលឡើយ។ នេះគឺជាសន្តានចិត្តដ៏ល្អរបស់លោកផ្ទាល់៕
Source: Kampuchea Thmey Daily
0 Comments