ភ្នំពេញ ៖ យុវជនម្នាក់ ត្រូវបានកម្លាំងនគរបាលប៉ុស្តិ៍នគរបាលជ័យជំនះឃាត់ខ្លួន ពីបទក្លែងបន្លំ(ប្រើប្រាស់នូវឯកសណ្ឋាននគរបាលជាតិ) កាលពីថ្ងៃសៅរ៍ ០៨រោច ខែចេត្រ ឆ្នាំកុរ ឯកសក្ដិ២៥៦៣ត្រូវនឹងថ្ងៃទី២៧ ខែមេសា ឆ្នាំ២០១៩ វេលាម៉ោង២១និង៣០នាទី នៅចំណុចផ្លូវព្រះនរោត្តមកែងលេខ១៥៤ ភូមិ៧ សង្កាត់ជ័យជំនះ ខណ្ឌដូនពេញ រាជធានីភ្នំពេញ។
សមត្ថកិច្ចបានឲ្យដឹងថា ជនសង្ស័យដែលឃាត់ខ្លួនពីក្លែងបន្លំ(ប្រើប្រាស់ឯកសណ្ឋាននគរបាលជាតិ)ឈ្មោះ ប្រាក់ ចន្ទ័ដារាវង្ស ភេទប្រុស អាយុ២៥ឆ្នាំ មុខរបរសន្តិសុខឯកជន ស្នាក់នៅមិនពិតប្រាកដ។រីឯវត្ថុតាងចាប់យករួមមាន ឯកសណ្ឋាននគរបាលជាតិ ពណ៌ទឹកដោះគោ ខោ០១ អាវ០១ សក្ដិ២មួយគូ សញ្ញាសឹង្ហ០១ និងម៉ូតូ០១គ្រឿងម៉ាកZOOMER. X ពណ៌បៃតងបិតស្គុតប៉ារ៉ាស្លាកលេខ នប1 4652(ពណ៌ក្រហម) លេខតួ5105847លេខម៉ាស៊ីន0105847។
សមត្ថកិច្ចបានឲ្យដឹងទៀតថា ដំណើររឿងហេតុនោះ គឺពីថ្ងៃទី២៧ ខែមេសា ឆ្នាំ២០១៩ ម៉ោង១៤ ជនសង្ស័យ ឈ្មោះ ប្រាក់ច័ន្ទ ដារាវង្ស ភេទប្រុស អាយុ២៥ឆ្នាំ ជាសន្តិសុខឯកជន បានទៅយាមនៅ
ហាងបបរមួយកន្លែង ម្ដុំផ្សារដើមគរ ដោយស្លៀកពាក់ឯកសណ្ឋានជាសន្តិសុខ ពណ៌ខ្មៅ លុះដល់ម៉ោង២០យប់ ចប់ម៉ោងការងារ ក៏បានដូរឯកសណ្ឋានសន្តិសុខចេញ ដាក់ឯកសណ្ឋាននគរបាលជាតិ(ពណ៌ទឹកដោះគោ) ដែលដាក់ក្រោមកែបម៉ូតូ ដែលទិញនៅផ្សារទឹកថ្លា ខោ០១ អាវ០១ តម្លៃ១០ដុល្លារ សក្ដិ០១គូ តម្លៃ០៣ដុល្លារ ស្លាកឈ្មោះតម្លៃ០៥ដុល្លារ ពេលដូរឯកសណ្ឋានប៉ូលិសរួចហើយ ក៏បានជិះម៉ូតូដើរលេង មួយសន្ទុះមកដល់ចំណុចផ្លូវព្រះនរោត្តម កែងផ្លូវលេខ១៥៤ភូមិ៧ សង្កាត់ជ័យជំនះ ខណ្ឌដូនពេញ ក៏ត្រូវបានជួបកម្លាំងល្បាតប៉ុស្តិ៍ជ័យជំនះ ត្រួតពិនិត្យ ហើយបានធ្វើការឃាត់ខ្លួនជនសង្ស័យឈ្មោះ ប្រាក់ ចន្ទ័ដារាវង្ស រួមជាមួយម៉ូតូ០១គ្រឿងម៉ាកZOOMER X ពណ៌ប៉ារ៉ាស្លាកលេខ នប14652(ពណ៌ក្រហម) យកមកធ្វើការសាកសួរនៅប៉ុស្តិ៍ជ័យជំនះតែម្ដង។
បច្ចុប្បន្ន ជនសង្ស័យ កំពុងឃាត់ខ្លួននៅអធិការនគរបាលខណ្ឌដូនពេញដើម្បីចាត់ការតាមនីតិវិធី៕
Source: Kampuchea Thmey Daily
0 Comments