ភ្នំពេញ ៖ នៅរសៀលថ្ងៃទី៨មេសានេះ លោក កែវ សាវឿន ចៅសង្កាត់ចាក់អង្រែលើ និងជាប្រធានគណៈបញ្ជាការឯកភាពសង្កាត់ បានដឹកនាំកម្លាំងចុះរដ្ឋបាលក្នុងមូលដ្ឋាន ដើម្បីចាប់ប្រមូលជនវង្វេងផ្ទះ និងក្មេងស្ទាវបែកថ្នាំទៅមន្ទីរសង្គមកិច្ចរាជធានីភ្នំពេញឲ្យធ្វើការអប់រំ និងបន្សាបថ្នាំញៀន។
លោក កែវ សាវឿន បានឲ្យកម្ពុជាដឹងថា ការចុះប្រមូលក្រុមជនវង្វេងផ្ទះ និងក្មេងស្ទាវបែកថ្នាំនាថ្ងៃនេះ គឺយោងតាមសំណូមពរដ៏ទទូចពីប្រជាពលរដ្ឋ ដោយសារតែក្រុមក្មេងទាំងនេះ តែងតែបង្កជម្លោះ និងអុកឡុកក្នុងមូលដ្ឋានម្យ៉ាងទៀតខ្លាចក្រុមវាបង្កជាអគ្គិភ័យបំផ្លាញលំនៅដ្ឋានប្រជាពលរដ្ឋ។ ហើយនៅពេលកម្លាំងចម្រុះចុះមកដល់ គឺប្រជាពលរដ្ឋបាននាំសមត្ថកិច្ចទៅចង្អុលមុខជនបង្កអុកឡុកធ្វើឲ្យជនបង្កមិនអាចប្រកែកបាន។
លោក កែវ សាវឿន បានបញ្ជាក់ថា បើសិនជាយើងមិនចុះប្រមូលក្រុមនេះទៅមន្ទីរសង្គមកិច្ចទេគឺអាចជួបផលលំបាកទៅថ្ងៃមុខ ព្រោះពួកគេមិនស្គាល់ពាក្យថាល្អនោះទេ។ ម្យ៉ាងទៀត ពួកគេរស់នៅគ្មានអ្នកគ្រប់គ្រង ព្រោះត្រូវម្តាយឪពុកបំបោះបង់ចោលធ្វើឲ្យពួកគេកាន់តែប្រព្រឹត្តិនូវអំពើខុសឆ្គងដែលប្រជាពលរដ្ឋលោកមានការភ័យខ្លាចណាស់។ ដូច្នេះ មានតែឲ្យពួកគេទៅរៀនសូត្រ និងកែប្រែខ្លួនឲ្យទៅជាមនុស្សល្អដើម្បីអនាគតពួកគេទៅថ្ងៃមុខ៕
Source: Kampuchea Thmey Daily
0 Comments