ភ្នំពេញ ៖ បុរសម្នាក់ ដែលគេស្គាល់ថា ជាគ្រូបង្រៀនភាសាកូរ៉េ បានដាច់ខ្យល់ស្លាប់ក្នុងផ្ទះសំណាក់បន្ទាប់ពីបុរសរងគ្រោះដឹកដៃគូស្នេហ៍ឡើងឋានសួគ៌បានមួយលើក។
ហេតុការណ៍នេះ បានកើតឡើងកាលពីវេលាម៉ោង២និង៣០នាទីយប់រំលងអធ្រាត្រ ឈានចូលថ្ងៃទី២៥ ខែមេសា នៅក្នុងផ្ទះសំណាក់យីហោម្កុដមាស មានទីតាំងស្ថិតនៅតាមបណ្ដោយផ្លូវបេតុង ភូមិទ្រា សង្កាត់ស្ទឹងមានជ័យទី១ ខណ្ឌមានជ័យ រាជធានីភ្នំពេញ។
ជនរងគ្រោះ ឈ្មោះ អឿន ប៊ុនធឿន ភេទប្រុស អាយុ៣៨ឆ្នាំ មុខរបរគ្រូបង្រៀនភាសាកូរ៉េ មានស្រុកកំណើត ភូមិកោះវត្ត ឃុំខ្នារទទឹង ស្រុកបាកាន ខេត្តពោធិ៍សាត់។
តាមប្រភពពីនារីជាសង្សារ ដែលមិនប្រាប់ឈ្មោះ អាយុ៣០ឆ្នាំ មុខរបរលក់គ្រឿងក្រអូប ស្នាក់នៅភូមិដំណាក់ធំ៣ សង្កាត់ស្ទឹងមានជ័យទី៣ ខណ្ឌមានជ័យ បានឲ្យដឹងថា ជនរងគ្រោះ និងនាងបានលួចទំនាក់ទំនងស៊ីជម្រៅអស់រយៈពេលជាងមួយឆ្នាំមកហើយ ដោយខាងប្រុសមានប្រពន្ធ និងកូន ឯខ្លួននាង ក៏មានប្ដីដែរ តែមិនចុះសម្រុងនឹងគ្នា។ មុនពេលកើតហេតុ ជនរងគ្រោះ បានបើករថយន្តបាឡែន ពណ៌ស ពាក់ស្លាកលេខពោធិ៍សាត់2B 15 83 ចេញពីខេត្តពោធិ៍សាត់ ដោយណាត់ជួបគ្នានៅផ្ទះសំណាក់ម្កុដមាសនេះឯង។
នារីជាសង្សារបានបន្តថា មុនពេលចូលសម្រាកក្នុងផ្ទះសំណាក់ ជនរងគ្រោះជាសង្សារ បានជួបជុំមិត្តភ័ក្ដិ ផឹកប៊ីយែរអស់២កំប៉ុង។ នៅពេលចូលដេក គឺពួកគេបានរួមដំណេកបានម្តង រួចក៏នាំគ្នាដេកទៅ។ លុះដល់ម៉ោង២និង៣០នាទីរំលងអធ្រាត្រ ឈានចូលថ្ងៃទី២៥នេះ ស្រាប់តែឮជនរងគ្រោះត្រដរខ្យល់ ពេលនោះនារីជាសង្សារ បានស្រែកហៅម្ចាស់ផ្ទះសំណាក់ឲ្យជួយដឹកបញ្ជូនជនរងគ្រោះទៅមន្ទីរពេទ្យ ប៉ុន្តែនៅពេលសែងមកដល់ក្រោម ទើបដឹងថា ជនរងគ្រោះបានដាច់ខ្យល់ស្លាប់ទៅហើយ។
ទាក់ទិននឹងហេតុការណ៍នេះ កម្ពុជាថ្មី បានធ្វើការសាកសួរព័ត៌មានទៅសមត្ថកិច្ច ប៉ុន្តែសមត្ថកិច្ចមិនទាន់ហ៊ានសន្និដ្ឋាន ដោយរង់ចាំគ្រូពេទ្យមកធ្វើកោសល្យវិច័យសិន។ បើតាមការពិនិត្យបឋម គឺជនរងគ្រោះអាចស្លាប់ដោយសារគាំងបេះដូង៕
Source: Kampuchea Thmey Daily
0 Comments