កណ្ដាល ៖ បើស្ដាប់ទៅ ពិតជាហួសហេតុបន្តិចមែន មិនមានចេតនាលំអៀងទៅខាងភាគីណាទេ តែរឿងវាមិនត្រូវនិយាយបែបនេះឡើយ ដែលប្ដីរបស់ខ្លួនដើរផឹកស៊ីជាមួយគេ មិនខឹងស្ដីជេរឲ្យប្ដីខ្លួនឯង បែរជាមកខឹងស្ដីថាឲ្យមិត្តភ័ក្ដិប្ដីខ្លួនទៅវិញ ដោយតេទៅស្ដីឲ្យបុរស ឈ្មោះ រង រស្មី ហៅ ម៉ុយ អាយុជាង៣០ឆ្នាំ រស់នៅក្នុងភូមិមនោររម្យ ឃុំបែកចាន ស្រុកអង្គស្នួល បណ្ដាលឲ្យលោកឈឺចិត្ត មិនហ៊ានស្រក់ទឹកភ្នែក តែសុខចិត្តកោរសក់ចេញពីក្បាល និងបានអុជធូបស្មាលា ឈប់ផឹកជាមួយមិត្តភ័ក្ដិម្នាក់នោះទៀតផង មិនតែប៉ុណ្ណោះបានធ្វើឲ្យទំនាក់ទំនងការងាររកស៊ីជាមួយគ្នាមានភាពល្អក់កករផងដែរ។
សកម្មភាព និងកាយវិការ រួមទាំងសារជាអក្សរផងនោះ ត្រូវបាន លោក រង រស្មី ហៅ ម៉ុយ ស្ដែងចេញឲ្យមហាជនបានឃើញ និងយល់តាមរយៈអាខោនហ្វេសប៊ុកផ្ទាល់របស់លោក ក្នុងន័យបញ្ជូនសារនេះទៅដល់ប្រពន្ធរបស់ លោក សុង ង៉ូវ ដែលគេស្គាល់ថាជាអ្នករកស៊ី ទិញ លក់ឡាន ដោយបានយកចិញ្ចើមផ្លូវសាធារណៈដាក់លក់យ៉ាងរំភើយ មិនខ្វល់ពីការកកស្ទះចរាចរណ៍រៀងរាល់ព្រឹកនោះ។
ទោះបីគេមើលទៅ កាយវិការ និងសារប៉ុន្មានម៉ាត់នេះ វាហាក់ដូចជាសាមញ្ញៗធម្មតា ប៉ុន្តែបើធ្វើការពិចារណាបន្តិច ទើបដឹងថាវាមានន័យចាក់ដោតខ្លាំងមែនទែនដល់ប្រពន្ធ លោក សុង ង៉ូវ ដែលបានទូរស័ព្ទទៅជេរស្ដីដល់មិត្តភ័ក្ដិរបស់ប្ដីខ្លួនទាំងកំរោលបែបនេះ ព្រោះថា មនុស្សសុទ្ធតែអស់ធំទៅហើយ ធ្វើប្ដី ប្រពន្ធគេ និងជាឪពុក ម្ដាយគេផងនោះ ការដើរហើរ ផឹកស៊ី ស្រីញីអូនបង ល្បែងស៊ីសងជាដើម មិនចាំបាច់មានគេដឹកនាំបបួលនោះទេ ដូច្នេះយើងមិនអាចស្ដីបន្ទោស ឬជេរឲ្យអ្នកដទៃនោះឡើយ គឺត្រូវនិយាយជាមួយប្ដី ឬ ប្រពន្ធខ្លួនឯង ទើបជាការត្រឹមត្រូវ។
ប្រភពពីមិត្តភ័ក្ដិរបស់ លោក រង រស្មី ហៅ ម៉ុយ នេះ បានបង្ហើបថា គាត់ជាមនុស្សចិត្តស្លុយគ្រាន់បើ មិនចំពោះតែរឿងកោរសក់ក្បាលប៉ុណ្ណឹងទេ បើកាលពីលោកនៅជាយុវវ័យនៅឡើយ កាលនោះគាត់ស្រឡាញ់ប្រពន្ធរបស់គាត់សព្វថ្ងៃនេះ តែនាងធ្វើចរិត (មេមាន់)ដែរ ហាក់មិនចង់ទទួលយកលោក ម៉ុយ ធ្វើជាគូអនាគត ព្រោះកាលនោះ លោក ម៉ុយ មើលទៅជាក្មេងអ្នកភូមិ មិនបានរៀនសូត្រឲ្យបាន វែងឆ្ងាយនឹងគេ ហាក់មិនសូវមានតម្លៃចំពោះនាង ទើបឪពុកម្ដាយបងប្អូននាងមិនចង់ឲ្យ។
កាលនោះ ធ្វើឲ្យ លោក ម៉ុយ ខឹងចិត្តស្ទើរឆ្កួតហើយ ក៏បានទៅរត់ដេកឲ្យឡានកិនសម្លាប់ខ្លួន តែ ឡានមិនហ៊ានកិន ត្រូវបានគេជួយសង្គ្រោះទាន់ពេលវេលា។ នេះ ស.បញ្ជាក់ឲ្យឃើញថា លោក ម៉ុយ នេះ ខឹងគេមិនទៅរករឿងគេទេ តែបែរជាមកធ្វើបាបខ្លួនឯងទៅវិញ ដូចករណីប្រពន្ធមិត្តភ័ក្ដិស្ដីឲ្យពេលនេះអីចឹង លោកមិនទៅស្ដីតប ត ជាមួយគេវិញទេ តែលោកបានមកធ្វើសកម្មភាពបំផ្លាញសក់ក្បាលខ្លួនឯង ទុកជាការព្រមានដល់ខ្លួនឯង លើកក្រោយកុំឲ្យមានរឿងបែបនេះតទៅទៀត។ គេមិនដឹងថា ប្រពន្ធ លោក សុង ង៉ូយ នោះ ជេរស្ដីឲ្យ លោក ម៉ុយ ដល់ កម្រិតណាទេ ទើបធ្វើឲ្យ លោក ម៉ុយ សម្រេចចិត្តទៅកោរសក់ និងដុតធូប ថតបង្ហោះនៅក្នុងបណ្ដាញសង្គមរបស់លោក កាលនៅថ្ងៃទី២៧ ខែមេសា ឆ្នាំ២០១៩ នេះ ហើយបានសរសេរថា ( ចុមសំដីតែមួយម៉ាត់ ធ្វើឲ្យខ្ញុំអស់សក់ក្បាលរលីង។ ខ្ញុំសូមអរគុណ បង ដែលជាប្រពន្ធបង សុង ង៉ូវ ដែលតេ មកស្តីឲ្យខ្ញុំជាកាដូឆ្នាំថ្មី ជូនចំពោះលោក រស្មី សំបូរស្នេហ៍ខ្ញុំ សុំលាហើយ គ្រប់កីឡាដើម្បីសុខភាពៗ។ អ្វីដែលខ្ញុំអន់ចិត្តបំផុត គឺរឿងប្រពន្ធ បង សុង ង៉ូវ ដែលតេមកស្ដី ឲ្យខ្ញុំពីរឿងហៅប្ដីគាត់ផឹក)។
តាមប្រភពព័ត៌មាន ពីអ្នកធ្លាប់ដើរជាមួយ និង ផឹកជាមួយ លោក សុង ង៉ូវ បានលួចខ្សឹបខ្សៀវប្រាប់ឲ្យដឹងថា សម័យនេះទៅហើយ គ្មានអ្នកណានាំប្តីអ្នកណាផឹកទេ មកពីប្តីខ្លួនឯងដែរនឹង មិនទៅស្ដីឲ្យប្ដីខ្លួនឯងទៅ បែរជាមកថាគេនាំទៅវិញ។ គេនៅចាំបានថា ករណីដូចគ្នានេះ កាលពីប៉ុន្មានឆ្នាំមុន ក៏ មាននារីរូបស្រស់ម្នាក់ ដែលមានប្ដីជាថៅកែស្រាបៀរនៅខេត្តបន្ទាយមានជ័យ កាលនោះនាងបានឡាយវីដេអូជេរស្ដី ឲ្យមិត្តភ័ក្ដិប្ដីខ្លួននូវពាក្យពេចន៍អសុរោះជាច្រើន ដែលគេមិនអាចទទួលយកបានពាក់ព័ន្ធទៅនឹងការចោទគេថា ហៅប្ដីខ្លួនផឹកអីចឹងដែរ បន្ទាប់ពីឡាយចប់ នាងបានបង្ហោះសារមួយទៀតឃើញនាងត្រូវប្ដីវាយជាំមុខមាត់ ប៉ុណ្ណឹងហើយគាត់នៅសរសេរសារឌឺដងឲ្យមិត្តភ័ក្ដិ ប្ដីនាងទៀត ថាមកពីពួកឯងរាល់គ្នានឹង ទើបប្ដីវាយអញចឹង ក្រោយមក គ្រួសារនោះ មានភាពរកាំរកូសនឹងគ្នាយ៉ាងខ្លាំងដែរ៕
Source: Kampuchea Thmey Daily
0 Comments