សៀមរាប ៖ សមត្ថកិច្ចមូលដ្ឋាន បានឲ្យដឹងថា ផ្ទះលក់ចាប់ហួយមួយខ្នង ទំហំ៤ម៉ែត្រ គុណ នឹង៦ម៉ែត្រ ធ្វើអំពីឈើ ប្រក់ស័ង្កសី ជញ្ជាំងក្ដារ ត្រូវបានអគ្គិភ័យឆាបឆេះអស់ទាំងស្រុង និងរបួសស្រាលក្មេងម្នាក់ ព្រមទាំងខូចខាតទ្រព្យសម្បត្តិមួយចំនួនធំផងដែរ។ ហេតុការណ៍នេះ កើតឡើងនៅវេលាម៉ោង១៨និង៥៥នាទី ថ្ងៃទី២៤ ខែមេសា ឆ្នាំ២០១៩ នៅភូមិរហាល ឃុំតាសៀម ស្រុកស្វាយលើ ខេត្តសៀមរាប។
លោកវរសេនីយ៍ឯក ស៊ុន អេង អធិការនគរបាលស្រុកស្វាយលើ បានឲ្យដឹងនៅរសៀលថ្ងៃទី២៥នេះថា ជនរងគ្រោះ ឈ្មោះ រឿន សារ៉ាត់ ភេទប្រុស អាយុ២៩ឆ្នាំ និង ប្រពន្ធ ឈ្មោះ ឈៀត ស៊ីយាំ អាយុ ២៥ឆ្នាំ ទីលំនៅភូមិរហាល ឃុំតាសៀម ស្រុកស្វាយលើ ខេត្តសៀមរាប។ កូន ឈ្មោះ រ៉ាត់ រ៉ាយុត្តិ ភេទប្រុស អាយុ៧ឆ្នាំ របួសជើងទាំងពីរស្រាល។
លោកបន្តថា មូលហេតុបណ្តាលមកពី ឈ្មោះ ឈៀត ស៊ីយាំ បានដាំបាយ នឹងចង្ក្រានហ្គាស៍ ហើយកូន ឈ្មោះ រ៉ាត់ រ៉ាយ៉ុត្តិ ភេទប្រុស អាយុ៧ឆ្នាំ បានជញ្ជូនដបសាំង ស្រាប់តែធ្លាក់ដបសាំង ហើយក៏ឆាបឆេះផ្ទះភ្លាមៗតែម្តង។
លោកបន្ថែមថា ខូចខាតឆេះអស់ផ្ទះ ទំហំ៤ម៉ែត្រ គុណ នឹង ៦ម៉ែត្រ១ខ្នង ធ្វើអំពីឈើ ប្រក់ស័ង្កសីជញ្ជាំងក្តារ ចាក់សាបក្រោម ឆេះអស់ស្រូវ២០ការុង និង អីវ៉ាន់ ដែលទិញមកទុកលក់ ឆេះប្រាក់ដុល្លារ ៥០០,ឆេះខ្សែដៃប្លាទីន ទម្ងន់៣ ជី,ឆេះអស់ខ្សែកមាសទម្ងន់៣ជី ឆេះប្លង់ដីដែលនិស្សិតចែកឲ្យ និង សៀវភៅគ្រួសារ។ ក្នុងហេតុការណ៍ពន្លត់នោះ ប្រើប្រាស់រថយន្តពន្លត់អគ្គិភ័យរបស់អធិការដ្ឋានស្រុក ប្រើប្រាស់អស់ទឹកចំនួន២ឡាន៕
Source: Kampuchea Thmey Daily
0 Comments