ត្បូងឃ្មុំ ៖ ក្រោយពីមានបទបញ្ជាយ៉ាងម៉ឺងម៉ាត់របស់អាជ្ញាធរខេត្តត្បូងឃ្មុំ ជំនាញការិយាល័យបសុព្យាបាល និងផលិតកម្មសត្វខេត្ត បានពង្រឹង និងទប់ស្កាត់ការនាំចូលជ្រូកពីប្រទេសវៀតណាមខ្លះៗដែរ ហើយក៏បានត្អូញត្អែរដែរថា មានកម្លាំងតិចមិនអាចទប់ស្កាត់បាន សមត្ថកិច្ចពាក់ព័ន្ធដែលបានទទួលសេចក្តីជូនដំណឹងរបស់ខេត្ត ពិសេសប៉ូលិសចរាចរណ៍ពេលឃើញជ្រូកដឹកតាមផ្លូវមិនឃាត់ផង រករឿងអីតែពេទ្យសត្វ ចឹងបានមានរថយន្តដឹកជ្រូកជាហូរហែ។ ពលរដ្ឋព្រួយ ហើយថ្ងូរថា សកម្មភាពនេះ អាចនាំជំងឺជ្រូកអាហ្វ្រិក ជាបញ្ហាអាចប៉ះពាល់ដល់អ្នកបរិភោគ។
បើតាមការឲ្យដឹងពីមន្ត្រីជំនាញពេទ្យសត្វខេត្តកំពង់ចាមឲ្យដឹងថា នៅព្រឹកថ្ងៃទី២៧ ខែមេសា ឆ្នាំ ២០១៩ មន្ត្រីជំនាញ នៃការិយាល័យផលិតកម្មសត្វ និងបសុព្យាបាលខេត្តកំពង់ចាម បានឃាត់ចាប់រថយន្តដឹកជ្រូក១គ្រឿង មានជ្រូកចំនួន៥ក្បាល ដឹកចេញពីប្រទេសវៀតណាមឆ្លងកាត់ស្ពានគីហ្សូណា ក្រុងកំពង់ចាម ខេត្តកំពង់ចាម ហើយរថយន្ត និងជ្រូកទាំងអស់នោះ មន្ត្រីជំនាញបានឃាត់ ហើយអូសយកទៅរក្សាទុកនៅការិយាល័យផលិតកម្ម និងបសុព្យាបាល ដើម្បីធ្វើការត្រួតពិនិត្យ និងស្វែងរកជំងឺបេស្តជ្រូកអាហ្វ្រិក នៅវិទ្យាស្ថានស្រាវជ្រាវបសុព្យាបាល នៃអគ្គនាយកដ្ឋានសុខភាពសត្វ និងផលិតកម្មសត្វ។ ស្របពេលដែលមន្ត្រីជំនាញការិយាល័យ ផលិតកម្មសត្វ និងបសុព្យាបាលខេត្តកំពង់ចាមដែលកំពុងល្បាតជាប្រចាំ ហើយបានឃាត់បានបញ្ជាក់ឲ្យដឹងថា ប្រសិនបើរកឃើញវីរុសជំងឺបេស្តជ្រូកអាហ្វ្រិកកើតមានក្នុងជ្រូកទាំងនេះ ត្រូវដុតបំផ្លាញតែម្តង ហើយករណីមិនមានវីរុសជំងឺបេស្តជ្រូកអាហ្វ្រិកនេះ គឺមន្ត្រីជំនាញ នឹងអនុវត្តន៍បន្តតាមនីតិវិធីច្បាប់៕
Source: Kampuchea Thmey Daily
0 Comments