អ្នកស្រី Maria Butina ដែលជាជនជាតិរុស្ស៊ីតែម្នាក់គត់ ដែលត្រូវបានចាប់ខ្លួននិងផ្តន្ទាទោសក្នុងការស៊ើបអង្កេតរយៈពេល៣ឆ្នាំអំពីការជ្រៀតជ្រែករបស់រុស្ស៊ីក្នុងនយោបាយសហរដ្ឋអាមេរិកគឺត្រូវបានផ្តន្ទាទោសកាលពីថ្ងៃសុក្រឲ្យជាប់ពន្ធនាគាររហូតដល់ទៅ១៨ខែ។
ក្នុងនាមជាមេដឹកនាំក្រុមសិទ្ធិកាំភ្លើងដ៏តូចមួយរបស់រុស្ស៊ី, ស្ត្រីដើមកំណើតស៊ីបេរីអាយុ៣០ឆ្នាំរូបនេះបានប្រើទំនាក់ទំនងរបស់នាងជាមួយសមាគមកាំភ្លើងជាតិដើម្បីកសាងបណ្តាញទំនាក់ទំនងគណបក្សសាធារណរដ្ឋដ៏មានឥទ្ធិពលមួយ។
នាងបានសារភាពថាមានការឃុបឃិតដើម្បីធ្វើសកម្មភាពក្នុងនាមជាភ្នាក់ងាររបស់រដ្ឋាភិបាលបរទេសដោយគ្មានការចុះបញ្ជី។
រដ្ឋអាជ្ញាបាននិយាយថា ថ្វីបើនាងធ្វើការដោយបើកចំហហើយមិនត្រូវបានចងភ្ជាប់ជាមួយទីភ្នាក់ងារចារកម្មរុស្ស៊ីក៏ដោយប៉ុន្តែនាងបានបញ្ជូនរបាយការណ៍ទៅឲ្យមន្ត្រីរដ្ឋាភិបាលរុស្ស៊ីជាន់ខ្ពស់ហើយបានបង្កជាការគំរាមកំហែងដល់សហរដ្ឋអាមេរិក។
នាងបានប្រាប់តុលាការនៅទីក្រុងវ៉ាស៊ីនតោនមុនពេលការកាត់ទោសរបស់នាងត្រូវបានប្រកាសថា “ខ្ញុំសុំអភ័យទោស។ ខ្ញុំមិនមែនជាមនុស្សអាក្រក់ដូចដែលបានបង្ហាញនៅក្នុងប្រព័ន្ធផ្សព្វផ្សាយនោះទេ”។
នាងបានប្រាប់តុលាការថា នាងគ្រាន់តែចង់ធ្វើការងារដើម្បីនាំឲ្យទំនាក់ទំនងរវាងអាមេរិកនិងរុស្ស៊ីល្អជាងមុនប៉ុណ្ណោះហើយនឹងចុះឈ្មោះជាភ្នាក់ងារបរទេសប្រសិនបើនាងដឹងថាវាត្រូវបានតម្រូវដោយច្បាប់។
ស្របពេលជាមួយគ្នានោះ ក្រុងមូស្គូបានសម្តែងការខឹងសម្បាចំពោះការធ្វើដាក់នាង Butina ហើយនឹងធ្វើការនិរទេសនៅពេលដែលនាងត្រូវបានដោះលែង។
ក្រសួងការបរទេសរុស្ស៊ីបាននិយាយនៅក្នុងសេចក្តីថ្លែងការណ៍មួយថា “ការចោទប្រកាន់លើនាងដែលមានចេតនាដាក់ឥទ្ធិពលលើដំណើរការនយោបាយផ្ទៃក្នុងនៅសហរដ្ឋអាមេរិកគឺត្រូវបានរៀបចំឡើងនិងប្រឌិតឡើងទាំងស្រុង។ ជនរួមជាតិរបស់យើងត្រូវបានគេថ្កោលទោសដោយសារតែនាងជាពលរដ្ឋរុស្ស៊ី”។
ករណីរបស់ Butina បានបង្កឲ្យមានភាពតានតឹងរវាងទីក្រុងមូស្គូនិងវ៉ាស៊ីនតោនអំពីអ្វីដែលភ្នាក់ងារស៊ើបការណ៍សម្ងាត់អាមេរិកនិយាយថាគឺជាកិច្ចខិតខំប្រឹងប្រែងរួមគ្នារបស់ចារកម្មរុស្ស៊ីដើម្បីជ្រៀតជ្រែកក្នុងការបោះឆ្នោតប្រធានាធិបតីឆ្នាំ២០១៦ដោយប្រើការ Hack និងប្រព័ន្ធផ្សព្វផ្សាយសង្គមដើម្បីជួយលោកប្រធានាធិបតី Donald Trump ឲ្យឈ្នះឆ្នោត៕ AFP
Source: Kampuchea Thmey Daily
0 Comments