អង្គការ UNICEF បាននិយាយកាលពីថ្ងៃសុក្រថា គ្រោះមហន្តរាយបរិស្ថាន ដែលទាក់ទងទៅនឹងការប្រែប្រួលអាកាសធាតុកំពុងគំរាមកំហែងដល់អាយុជីវិតនិងអនាគតរបស់កុមារជាង១៩លាននាក់នៅក្នុងប្រទេសបង់ក្លាដែសរួមទាំងជំរុញឲ្យក្រុមគ្រួសារជាច្រើនត្រូវបង្ខំចិត្តឲ្យកូនស្រីរបស់ពួកគេរៀបការទាំងវ័យក្មេងផងដែរ។
ភ្នាក់ងារកុមាររបស់អង្គការសហប្រជាជាតិបាននិយាយនៅក្នុងរបាយការណ៍មួយថា “ការប្រែប្រួលអាកាសធាតុកំពុងធ្វើឲ្យការគំរាមកំហែងផ្នែកបរិស្ថានកាន់តែខ្លាំងឡើងដែលក្រុមគ្រួសារក្រីក្រនៅប្រទេសបង់ក្លាដែសត្រូវប្រឈមមុខហើយធ្វើឲ្យពួកគេមិនអាចរក្សាកូនរបស់ពួកគេឲ្យមានសុខភាពល្អ ផ្តល់ចំណីអាហារនិងមានការអប់រំល្អ”។
របាយការណ៍នេះបានឲ្យដឹងថា កុមារដែលរងផលប៉ះពាល់ខ្លាំងបំផុតប្រហែល១២លាននាក់គឺបានរស់នៅក្នុងនិងជុំវិញប្រព័ន្ធទន្លេដ៏មានឥទ្ធិពលដែលហូរកាត់ប្រទេសបង់ក្លាដែស។
កុមារចំនួន៤.៥លាននាក់ទៀតដែលរស់នៅក្នុងតំបន់ឆ្នេរគឺត្រូវបានវាយប្រហារជាបន្តបន្ទាប់ដោយខ្យល់ព្យុះដ៏ខ្លាំងក្លាដែលរាប់បញ្ចូលទាំងកុមារភៀសខ្លួនរ៉ូហ៊ីងយ៉ាជិតកន្លះលាននាក់មកពីប្រទេសជិតខាងមីយ៉ាន់ម៉ាផងដែរដែលបានរស់នៅក្នុងខ្ទមធ្វើពីឫស្សីនិងតង់កៅស៊ូ។ កុមារ៣លាននាក់ទៀតបានរស់នៅលើដីគោកដែលជាកន្លែងសហគមន៍កសិកម្មជួបគ្រោះរាំងស្ងួត។
ផ្ទៃដីដែលមានរាងសំប៉ែតរបស់ប្រទេសបង់ក្លាដែស ប្រជាពលរដ្ឋច្រើននិងហេដ្ឋារចនាសម្ព័ន្ធដែលទន់ខ្សោយបានធ្វើឲ្យវាងាយរងគ្រោះនឹងព្រឹត្តិការណ៍អាកាសធាតុដ៏សាហាវជាយូរមកហើយប៉ុន្តែក្រុមអ្នកជំនាញបាននិយាយថា វាបានក្លាយទៅជាភាពញឹកញាប់នៅក្នុងរយៈពេលប៉ុន្មានឆ្នាំចុងក្រោយនេះនៅពេលសីតុណ្ហភាពទូទាំងពិភពលោកកើនឡើង។
ក្នុងឆ្នាំ២០០៧ ព្យុះស៊ីក្លូនដ៏ខ្លាំងមួយបានសម្លាប់មនុស្សជិត៤,០០០នាក់និងប៉ះពាល់ដល់មនុស្សរាប់សែននាក់ទៀត។
ទឹកជំនន់ដ៏ធំបំផុតនៃទន្លេ Brahmaputra ក្នុងឆ្នាំ២០១៧បានជន់លិចបណ្តាញសុខភាពសហគមន៍យ៉ាងតិច៤៨០និងបំផ្លាញអណ្តូងចំនួន៥០,០០០ដែលចាំបាច់សម្រាប់បំពេញតម្រូវការទឹកស្អាតរបស់សហគមន៍។
របាយការណ៍នេះបាននិយាយថា ការផ្លាស់ប្តូរអាកាសធាតុគឺជាកត្តាសំខាន់មួយដែលជំរុញឲ្យប្រជាជនបង់ក្លាដែសក្រីក្រធ្វើដំណើរទៅកាន់រដ្ឋធានីដាកានិងទីក្រុងសំខាន់ៗដទៃទៀតដែលជាកន្លែងកុមារត្រូវប្រឈមនឹងការធ្លាក់ចូលទៅក្នុងទម្រង់នៃពលកម្មដ៏គ្រោះថ្នាក់និងអាពាហ៍ពិពាហ៍មុនអាយុ៕ AFP
Source: Kampuchea Thmey Daily
0 Comments