កាលពីថ្ងៃព្រហស្បតិ៍កន្លងទៅ ក្រុម Atalanta បានឡើងដល់វគ្គផ្តាច់ព្រ័ត្រ Coppa Italia ជាលើកដំបូងចាប់តាំងពីឆ្នាំ១៩៩៦រហូតមក ពេលដែលកីឡាករ Alejandro Gomez ជួយឲ្យពួកគេសម្រេចបានជ័យជំនះ២-១លើក្រុម Fiorentina នៅជើងទី២វគ្គពាក់កណ្តាលផ្តាច់ព្រ័ត្រ។
ការស៊ុតបាល់ទាបរបស់កីឡាករអាហ្សង់ទីនម្នាក់នេះ បានផុតដៃរបស់អ្នកចាំទី Alban Lafont នៅនាទី៦៩ ពេលដែលក្រុម Atalanta បញ្ចប់ជ័យជំនះទាំង២ជើង៥-៤ ដើម្បីបន្តរដូវកាលដ៏គួរឲ្យចាប់អារម្មណ៍របស់ពួកគេ។
កីឡាករ Luis Muriel បានធ្វើឲ្យក្រុម Fiorentinaនាំមុខមុន ក្រោយលេងបាន៣នាទីប៉ុណ្ណោះ ជាមួយនឹងការស្លាយបាល់ផុតអ្នកចាំទី Pierluigi Gollinក្រោយការបញ្ជូនបាល់របស់កីឡាករ Federico Chiesa។
ក្រុមAtalantaតាមបានស្មើវិញនៅ១១នាទីបន្ទាប់ ពេលដែលកីឡាករ JosipIlicic ពេនមួយជើងបានសម្រេចពីការស៊ុតបាល់ប៉េណាល់ទី ក្រោយកីឡាករ Gomez ដួលក្នុងតំបន់គ្រោះថ្នាក់ បង្កឡើងដោយសារកីឡាករ Federico Ceccherini ។
ក្រុម Atalanta ដែលនឹងប៉ះជាមួយក្រុម Lazioនៅវគ្គផ្តាច់ព្រ័ត្រនាថ្ងៃទី១៥ ខែឧសភា ខាងមុខនេះ នៅក្នុងទីក្រុងរ៉ូម បានឈ្នះការប្រកួតនេះតែម្តងគត់ កាលពីឆ្នាំ១៩៦៣៕
Source: Kampuchea Thmey Daily
0 Comments