ពានរង្វាន់លីគកំពូលកម្ពុជា (Metfone Cambodian League) ឆ្នាំ២០១៩ ដែលរៀបចំឡើងដោយគណៈកម្មការប្រកួតបាល់ទាត់ជាតិកម្ពុជា(CNCC) សេនាធិការរបស់សហព័ន្ធកីឡាបាល់ទាត់កម្ពុជា នឹងធ្វើដំណើរដល់សប្ដាហ៍ទី៥ ហើយនៅចុងសប្ដាហ៍នេះ ខណៈក្រុមបាល់ទាត់ព្រះខ័នរាជស្វាយរៀង កំពុងតែឈរកំពូលតារាងបណ្តោះអាសន្នក្រោយប្រកួតឈ្នះទាំង៤លើក មាន១២ពិន្ទុច្រើនជាងគេក្នុងដៃ។
សម្រាប់កម្មវិធីប្រកួតប្រចាំសប្ដាហ៍ទី៥ នឹងធ្វើឡើងនៅថ្ងៃសៅរ៍ ទី២៧ ខែមេសា ឆ្នាំ២០១៩ ដោយក្រុមក្រសួងការពារជាតិ ប៉ះបឹងកេតអែហ្វស៊ី វេលាម៉ោង៦និង៣០នាទីរសៀលលើទីលាន កងយោធពលខេមរភូមិន្ទ (ស្តាតចាស់)ហើយក្រុមអគ្គីសនីកម្ពុជា ជួបព្រះខ័នរាជស្វាយរៀង នៅវេលាម៉ោង៣និង៣០នាទីរសៀលលើទីលានអគ្គីសនីកម្ពុជា និងក្រុមខេត្តកំពង់ចាម ប៉ះក្រុមសាលាបាល់ទាត់ជាតិបាទី នៅវេលាម៉ោង៣និង៣០នាទីរសៀលលើទីលានវិទ្យាល័យ ប៊ុន រ៉ានី ហ៊ុន សែន មេមត់។
ចំណែក៤គូផ្សេងទៀតនឹងត្រូវប្រកួតនៅថ្ងៃអាទិត្យ ទី២៨ ខែមេសា ឆ្នាំ២០១៩ ដោយក្រុមអង្គរថាយហ្គឺរ ទទួលវិសាខា នៅវេលាម៉ោង៣និង៣០នាទីរសៀលលើទីលានកីឡដ្ឋានខេត្តសៀមរាប ហើយក្រុមអគ្គស្នងការដ្ឋាននគរបាលជាតិ ជួបក្រុមសូលទីឡូអង្គរ នៅម៉ោងដំណាលគ្នាលើទីលានកីឡដ្ឋានអគ្គីសនីកម្ពុជា ស្របពេលក្រុមគីរីវង់សុខសែនជ័យ ប៉ះក្រុមណាហ្គាវើល នៅវេលាម៉ោងដូចគ្នាដែរលើទីលានគរុកោសល្យខេត្តតាកែវ និងក្រុមភ្នំពេញក្រោន ទទួលក្រុមអាស៊ីអឺរ៉ុប នៅវេលាម៉ោង៦ល្ងាចលើទីលានកីឡដ្ឋាន Smart RSN Stadium។
ងាកមកមើលចំណាត់ថ្នាក់បណ្តោះអាសន្នក្រោយប្រកួតបាន៤លើកនេះមកឃើញថាក្រុមព្រះខ័នរាជស្វាយរៀង ឈរលេខ១ មាន១២ពិន្ទុហើយក្រុមក្រសួងការពារជាតិ ឈរលេខ២ មាន១០ពិន្ទុ ស្មើគ្នាជាមួយក្រុមវិសាខា ឈរលេខ៣ ហើយក្រុមណាហ្គាវើល ឈរលេខ៤ មាន៩ពិន្ទុ និងក្រុមអគ្គីសនីកម្ពុជា ឈរលេខ៥មាន៨ពិន្ទុ។ ចំណែកក្រុមបឹងកេត ឈរលេខ៦មាន៧ពិន្ទុ ក្រុមក្រុមអាស៊ីអឺរ៉ុប ឈរលេខ៧ មាន៦ពិន្ទុ ហើយក្រុមអគ្គីសនីកម្ពុជា ឈរលេខ៨ មាន៦ពិន្ទុ ក្រុមគីរីវង់សុខសែនជ័យ ឈរលេខ៩ មាន៣ពិន្ទុស្មើគ្នាជាមួយក្រុមភ្នំពេញក្រោន នៅលេខ១០ ,អគ្គស្នងការដ្ឋាននគរបាលជាតិ លេខ១១ និងកំពង់ចាម លេខ១២ ហើយក្រុមសូលទីឡូអង្គរ ឈរលេខ១៣មាន១ពិន្ទុ និងយុវជនសាលាបាល់ទាត់ជាតិបាទីលេខ១៤ មិនទាន់មានពិន្ទុកាន់ទេ។
តាមគម្រោងពានរង្វាន់បាល់ទាត់លីគកំពូលកម្ពុជារដូវកាលថ្មីឆ្នាំ ២០១៩ នេះនឹងចាប់ផ្ដើមពីថ្ងៃទី១៦ ខែមីនា ដល់ថ្ងៃទី១៧ ខែតុលា ឆ្នាំ២០១៩។ ក្រុមជើងឯកលីគកំពូលកម្ពុជាមានឱកាសចេញទៅប្រកួតលើឆាកអន្តរជាតិមួយចំនួនដូចជាពានរង្វាន់ AFC Cup, Mekong Championship និងពានរង្វាន់មួយចំនួនទៀត៕
Source: Kampuchea Thmey Daily
0 Comments