ក្រុមបាល់ទាត់អង្គរថាយហ្គឺរ ត្រូវទទួលក្រុមវិសាខា ហើយក្រុមអគ្គស្នងការដ្ឋាននគរបាលជាតិ (ប៉ូលីស) ត្រូវប៉ះក្រុមសូលទីឡូអង្គរ ខណៈក្រុមគីរីវង់សុខសែនជ័យ ជួបក្រុមណាហ្គាវើលនិងក្រុមភ្នំពេញក្រោន ប៉ះក្រុមអាស៊ីអឺរ៉ុប នៅល្ងាចថ្ងៃអាទិត្យទី២៨ ខែមេសា ឆ្នាំ២០១៩ សម្រាប់សប្ដាហ៍ទី៥នៃពានរង្វាន់លីគកំពូលកម្ពុជា (Metfone Cambodian League 2019)។
*អង្គរថាយហ្គឺរ ប៉ះវិសាខា
ក្រុមបាល់ទាត់អង្គរថាយហ្គឺរ ត្រូវប៉ះក្រុមវិសាខា នៅវេលាម៉ោង៣និង៣០នាទីរសៀលលើទីលានកីឡដ្ឋានខេត្តសៀមរាប ហើយប្រកួតនេះមានផ្សាយផ្ទាល់តាមហ្វេសប៊ុករបស់សារព័ត៌មានកម្ពុជាថ្មីផងដែរ។ ប្រវត្តិប៉ះគ្នាចំនួន២លើកកន្លងមករបស់ក្រុមទាំង២ឃើញថាក្រុមអង្គរថាយហ្គឺរ មិនធ្លាប់ឈ្នះវិសាខា នោះទេក្នុងឆ្នាំ២០១៨ កន្លងទៅដោយជើងទី១វិសាខា ឈ្នះទល់០ ហើយជើងទី២វិសាខា បន្តឈ្នះ៤ទល់១។
ក្រុមអង្គរថាយហ្គឺរ ជាក្រុមមួយដែលរកគ្រាប់បាល់បញ្ចូលទីគូប្រកួតបានច្រើនហើយមិនទាន់ស្គាល់បរាជ័យនោះទេ។ ក្រុមនេះបានព្យាយាមកៀងគររកអ្នកគាំទ្រឲ្យគ្រប់ចំនួន៥០០០នាក់ដើម្បីបំបែកកំណត់ប្រកួតដែលមានអ្នកទស្សនាបានច្រើនជាងគេប្រចាំលីគកំពូលកម្ពុជាបច្ចុប្បន្ន។ ចំណែកក្រុមវិសាខា វិញក៏ជាក្រុមមិនទាន់ស្គាល់បរាជ័យនៅឡើយដែរ ក្រោយកាន់កាប់កៅអីលេខ៣កំពូលតារាង។ លោក ហុក សុជីវ័ន្ត ចង់បន្តរកជ័យជម្នះដើម្បីបន្ថែមពិន្ទុប្រជែងយកជើងឯកប្រចាំរដូវកាលផងដែរ។
*អគ្គស្នងការដ្ឋាននគរបាលជាតិប៉ះសូលទីឡូអង្គរ
ក្រុមអគ្គស្នងការដ្ឋាននគរបាលជាតិ ដែលខ្ចីកីឡដ្ឋានអគ្គីសនីកម្ពុជា នឹងត្រូវបើកទ្វារទីលានទទួលស្វាគមន៍ក្រុមសូលទីឡូអង្គរ មកពីខេត្តសៀមរាប នៅវេលាម៉ោង៣និង៣០នាទីរសៀល ប្រកួតនេះក៏មានផ្សាយផ្ទាល់តាមប៉ុស្តិ៍ BTV News ផងដែរ។ ក្រុមទាំង២ធ្លាប់មានប្រវត្តិប៉ះគ្នាតែ៤លើកនោះទេ ព្រោះសូលទីឡូអង្គរ ជាក្រុមថ្មី ខណៈប៉ូលិស ធ្លាប់ឈ្នះបាន៣លើកនិងធ្លាប់ស្មើគ្នា១លើក។
ក្រុមអគ្គស្នងការដ្ឋាននគរបាលជាតិ ក្រោមការដឹកនាំពីសំណាក់លោក ប្រាក់ សុវណ្ណារ៉ា អតីតគ្រូបង្វឹកក្រុមជម្រើសជាតិកម្ពុជា ដែលកំពុងតែកាន់អាជ្ញាប័ណ្ណ Pro License។ យ៉ាងណាក្តីក្រុមនេះនៅតំបន់បាតតារាងនៅឡើយនោះទេ ក្រោយប្រកួតឈ្នះតែ១លើក និងចាញ់រហូតដល់៣លើក។ ចំណែកក្រុមសូលទីឡូអង្គរ វិញក៏ស្ថិតនៅដុនដាបនៅឡើយដែរ ព្រោះថាទើបតែមាន១ពិន្ទុកាន់ប៉ុណ្ណោះ ខណៈក្រុមនេះបានប្តូរផ្លាស់តំណែងគ្រូបង្វឹកតែប៉ុន្មានថ្ងៃមុនរដូវកាលចាប់ផ្តើមប៉ុណ្ណោះ។
*គីរីវង់សុខសែន ប៉ះណាហ្គាវើល
ក្រុមគីរីវង់សុខសែនជ័យ ដែលមានមូលដ្ឋាននៅខេត្តតាកែវ ត្រូវប្រកួតជាមួយក្រុមជើងឯកឆ្នាំចាស់ណាហ្គាវើល នៅវេលាម៉ោង៣និង៣០នាទី លើទីលានបាល់ទាត់មជ្ឈមណ្ឌលគុរកោសល្យភូមិភាគខេត្តតាកែវ ព្រោះកីឡដ្ឋានគីរីវង់សុខសែនជ័យ ជាប់រៀបចំព្រះរាជពិធីច្រត់ព្រះនង្គល់។ ជំនួបចុងក្រោយរវាងក្រុមទាំង២កាលពីឆ្នាំ២០១៧ ណាហ្គាវើល បានយកឈ្នះដោយលទ្ធផល៣ទល់១។
ក្រុមគីរីវង់ នៅរដូវកាលនេះបានយកគ្រូបង្វឹកជនជាតិថៃ Ekapob Potisai មកដឹកនាំក្រុមខណៈក្រុមនេះរកបានពិន្ទុតាំងពីប្រកួតបើកឆាកម្តងតែប៉ុណ្ណោះ ហើយ៣ប្រកួតចុងក្រោយបរាជ័យទាំងអស់។ កីឡាករជនជាតិម៉ាលី Souleymane Coulibaly ជាខ្សែប្រយុទ្ធគួរឲ្យចាប់អារម្មណ៍នៅក្នុងក្រុម។ យ៉ាងណាក្តីការស្វែងរក៣ពិន្ទុបន្ថែមពីក្នុងប្រកួតនេះពិតជាមានសារៈសំខាន់ណាស់សម្រាប់កាដូជូនអ្នកគាំទ្រលើទឹកដីរបស់ខ្លួន។ ចំណែកក្រុមណាហ្គាវើល របស់លោក មាស ចាន់ណា វិញមានសម្ពាធជាងរាល់ឆ្នាំព្រោះត្រូវរៀបចំក្រុមប្រកួត៣ពានរង្វាន់ផ្សេងគ្នាគឺក្នុងពានរង្វាន់ AFC Cup,ពានរង្វាន់លីគកំពូលកម្ពុជា និងពានរង្វាន់សម្តេចតេជោ ហ៊ុន សែន ផងដែរ។
*ភ្នំពេញក្រោន ប៉ះអាស៊ីអឺរ៉ុប
ក្រុមជើងឯក៦សម័យកាលភ្នំពេញក្រោន ត្រូវបើកទ្វារកីឡដ្ឋាន RSN Stadium របស់ខ្លួនទទួលក្រុមអាស៊ីអឺរ៉ុប នៅវេលាម៉ោង៦ល្ងាច ហើយប្រកួតនេះមានផ្សាយផ្ទាល់តាមប៉ុស្តិ៍ BTV News ផងដែរ។ ជំនួបចុងក្រោយក្នុងជើងទី២កាលពីរដូវកាលមុនក្រុមអាស៊ីអឺរ៉ុប បានយកឈ្នះលើក្រុមភ្នំពេញក្រោន ដោយលទ្ធផល៣ទល់២។
លោក Leonardo Vitorino គ្រូបង្វឹករបស់ក្រុមភ្នំពេញក្រោន កំពុងតែមានសម្ពាធខ្លាំងដែលប៉ុន្មានប្រកួតបើកឆាកហាក់ចាប់ផ្តើមមិនសូវបានល្អ ខណៈក្លិបមានកីឡាករចាកចេញច្រើនកាលពីចុងឆ្នាំ២០១៨។ ភ្នំពេញក្រោន ទើបតែឈ្នះ១ប្រកួតប៉ុណ្ណោះក្នុង៤ប្រកួតនេះខណៈបរាជ័យរហូតដល់៣ប្រកួត។ ចំណែកក្រុមអាស៊ីអឺរ៉ុប វិញគឺមានការសហការដឹកនាំពីសំណាក់គ្រូបង្វឹក២នាក់មានលោក សុក វាសនា និងលោក សំ វ៉ាន់ដេត។ ៤ប្រកួតមកនេះអាស៊ីអឺរ៉ុប ឈ្នះបាន២លើកនិងចាញ់២លើក៕
Source: Kampuchea Thmey Daily
0 Comments