ភ្នំពេញ ៖ មន្ត្រីជាន់ខ្ពស់អង្គភាពប្រឆាំងអំពើពុករលួយ (ACU) បានអះអាងថា អង្គភាពប្រឆាំងអំពើពុករលួយ ត្រូវការពេលវេលា និងការតាំងចិត្ត ដើម្បីប្រយុទ្ធប្រឆាំងអំពើពុករលួយ ឲ្យមានប្រសិទ្ធភាព និងជោគជ័យ។
ការអះអាងរបស់លោក ឃាង សេង អនុប្រធានអង្គភាពប្រឆាំងអំពើពុករលួយ បានធ្វើឡើងនៅក្នុងជំនួបជាមួយលោកស្រី រ៉ូណា ស្មីត អ្នករាយការណ៍ពិសេសរបស់ឧត្តមស្នងការអង្គការសហប្រជាជាតិស្តីពីសិទ្ធិមនុស្សប្រចាំកម្ពុជា កាលពីរសៀល ថ្ងៃទី០៦ ខែឧសភា ឆ្នាំ២០១៩។
លោក ឃាង សេង បានថ្លែងប្រាប់អ្នកសារព័ត៌មានក្រោយពីបញ្ចប់ជំនួបពិភាក្សានោះថា នៅក្នុងកិច្ចពិភាក្សានេះ លោកស្រី រ៉ូណា ស្មីត ចង់ដឹងពីតួនាទីរបស់អង្គភាពប្រឆាំងអំពើពុករលួយ គឺមានអ្វីខ្លះ ហើយបានរៀបរាប់ពីការងាររបស់ ACU ដែលបានធ្វើកន្លងមក។ ជាពិសេសការងារបង្ការ អប់រំ ទប់ស្កាត់ បង្ក្រាបបទល្មើស និងការងារប្រយុទ្ធប្រឆាំងអំពើពុករលួយ។
លោក ឃាង សេង បញ្ជាក់ថា “គាត់គ្រាន់តែថា ទី១របាយការណ៍ខ្លះដែលត្រូវបានផ្ញើទៅអង្គការសហប្រជាជាតិទៅលើចំណុចទី១៦ ក្រៅពីហ្នឹងដូចជាមិនមានអ្វីទេ គ្រាន់តែថា ការងាររបស់យើងត្រូវការពេលវេលា ត្រូវការការតាំងចិត្តសព្វបែបយ៉ាង ដើម្បីប្រយុទ្ធប្រឆាំងអំពើពុករលួយនៅប្រទេសរបស់យើងឲ្យមានប្រសិទ្ធភាព ឬនិយាយឲ្យចំ គឺជោគជ័យ”។
លោកបញ្ជាក់ដែរថា “នៅក្នុងក្របខណ្ឌច្បាប់របស់យើង គឺយើងអនុវត្តការប្រយុទ្ធប្រឆាំងអំពើពុករលួយជុំទី១ ជុំទី២ យើងជាសមាជិកនៃអង្គការសហប្រជាជាតិស្រាប់ហើយ ដូច្នេះអ្វីដែលជាលទ្ធផលនៃការវាយតំលៃការងារប្រយុទ្ធប្រឆាំងអំពើពុករលួយរបស់យើង ដាក់ទៅអង្គការសហប្រជាជាតិ មានពីរជុំ គឺជុំទី១ និងជុំទី២ ហើយឆ្នាំនេះ ក៏មានជុំទី២ដែរ គេនឹងគ្រោងមកធ្វើការត្រួតពិនិត្យយើងនៅឆ្នាំហ្នឹង ហើយយើងក៏ត្រូវទៅត្រួតពិនិត្យគេនៅឆ្នាំហ្នឹងដែរ”។
តាមលោក ឃាង សេង នៅក្នុងជំនួបនោះ "គាត់មានតែផ្តាំផ្ញើថា ធ្វើម៉េចឲ្យរាជរដ្ឋាភិបាលយើងប្រយុទ្ធប្រឆាំងអំពើពុករលួយឲ្យបានជោគជ័យ ឲ្យមានតម្លាភាព ប្រសិទ្ធភាព”។
សូមបញ្ជាក់ថា លោកស្រី រ៉ូណា ស្មីត មកបំពេញទស្សនកិច្ចនៅប្រទេសកម្ពុជា ចាប់ពីថ្ងៃទី២៩ ខែមេសា ដល់ថ្ងៃទី០៩ ខែឧសភា ឆ្នាំ ២០១៩ តាមការអញ្ជើញរបស់រាជរដ្ឋាភិបាល ហើយទស្សនកិច្ចនេះផ្តោតទៅលើស្ថានភាពសិទ្ធិមនុស្សនាពេលបច្ចុប្បន្ន និងតាមដានពីដំណើរវិវត្តន៍នានាចាប់តាំងពីបេសកកម្មរបស់លោកស្រី កាលពីខែវិច្ឆិកាកន្លងមក។ ជាមួយគ្នានោះលោកស្រី មានបំណងបន្តការពិនិត្យផងដែរ ទៅលើវិស័យសិទិ្ធមនុស្ស ទាក់ទងនឹងគោលដៅអភិវឌ្ឍន៍ប្រកបដោយចីរភាព ដោយពិនិត្យជាពិសេសទៅលើការមិនរើសអើង និងសមភាព ព្រមទាំងការចូលរួម និងគណនេយ្យភាព។
នៅក្នុងអំឡុងពេលដំណើរទស្សនកិច្ចរយៈពេល១១ ថ្ងៃនេះ លោកស្រី គ្រោងជួបប្រជុំជាមួយមន្ត្រី ជាន់ខ្ពស់របស់រដ្ឋាភិបាល តំណាងសង្គមស៊ីវិល និងសមាជិកសហគមន៍ការទូតនានា ហើយលោកស្រី នឹងបំពេញទស្សនកិច្ចផងដែរទៅតាមតំបន់ផ្សេងៗ ដើម្បីប្រមូលព័ត៌មានដោយផ្ទាល់៕
Source: Kampuchea Thmey Daily
0 Comments