តារាបាល់ទាត់អន្តរជាតិរបស់ជប៉ុននិងជាម្ចាស់ភាគហ៊ុនពាក់កណ្តាលរបស់ក្លិបបាល់ទាត់សូលទីឡូអង្គរ (Soltilo Angkor FC) ក្នុងលីគកំពូលកម្ពុជា ព្រមទាំងជាអ្នកចាត់ការទូទៅក្រុមជម្រើសជាតិកម្ពុជា គឺ Keisuke Honda បានសម្រេចចិត្តនឹងចាកចេញពីក្រុមម្ចាស់ជើងឯកលីកកំពូលអូស្ដ្រាលី Melbourne Victory ក្រោយចប់រដូវកាលឆ្នាំ២០១៩នេះ។
សូមបញ្ជាក់ថា បុរសវ័យ៣៣ឆ្នាំរូបនេះ បានចុះកិច្ចសន្យារយៈពេល១ឆ្នាំជាមួយក្លិប Melbourne Victory នៅប្រទេសអូស្ត្រាលី កាលពីពាក់កណ្ដាលឆ្នាំ២០១៨ ខណៈរូបគេធ្លាប់បានរក៣៧គ្រាប់ និងលេងបាន៩៨ប្រកួតឲ្យជម្រើសជាតិជប៉ុន។ រូបគេបានចូលនិវត្តន៍ពីបាល់ទាត់ជម្រើសជាតិក្រោយ 2018 FIFA World Cup នៅប្រទេសរុស្ស៊ី ចប់នៅពេលក្រុមជម្រើសជាតិជប៉ុនធ្លាក់នៅវគ្គ១៦ក្រុមចុងក្រោយ។
កីឡាករ Honda បានប្រាប់សារព័ត៌មានរបស់អូស្ត្រាលីថា «ខ្ញុំមិនទាន់ដឹងប្រកាសថា នឹងលេងនៅទីណាឡើយនារដូវកាលបន្ទាប់នេះ ប៉ុន្តែខ្ញុំបានដឹងមកហើយថាខ្ញុំស្នាក់នៅទីនេះតែមួយរដូវកាលប៉ុណ្ណោះ។ ដូច្នេះខ្ញុំសង្ឃឹមថា មិនមាននរណាម្នាក់ភ្ញាក់ផ្អើល ឬនរណាម្នាក់អន់ចិត្តឡើយ»។ គិតត្រឹមពេលនេះ Honda ត្រូវជួយក្រុមក្នុងទីក្រុង Merlburn ប្រកួតក្នុងវគ្គជម្រុះដណ្តើមជើងឯករដូវកាលឆ្នាំ២០១៩សិនមុនផុតកិច្ចសន្យា។ កីឡាកររូបនេះមានជំនួញផ្សេងៗជាច្រើនក្រៅពីអាជីពបាល់ទាត់របស់ខ្លួន ខណៈគេក៏មានសាលាបាល់ទាត់បង្ហាត់គិតថ្លៃផងដែរ។ យ៉ាងណាក្តីទោះបីជាមានអាជីវកម្មផ្សេងក៏ដោយតែគេនៅមិនទាន់នឿយណាយពីអាជីពបាល់ទាត់នោះទេ ស្របពេលអាយុរបស់ខ្លួនក៏កាន់តែជ្រេណាស់ទៅហើយ។
កីឡាករ Keisuke Honda បានចាប់អាជីពបាល់ទាត់ដំបូងនៅក្នុងក្លិប Nagoya Grampus ក្នុងប្រទេសកំណើតរបស់ខ្លួនចាប់ពីឆ្នាំ ២០០៤ ដល់២០០៧ ស្របពេលនៅឆ្នាំ២០០៧ ដល់២០០៩ ផ្លាស់ទៅលេងក្នុងក្លិប VVV-Venlo ក្នុងប្រទេសហុល្លង់ ហើយ នៅឆ្នាំ ២០០៩ ដល់ ២០១៣ បានផ្លាស់ទៅកាន់ក្លិប CSKA Moscow របស់ប្រទេសរុស្សី មុនផ្លាស់ទៅកាន់ AC Milan របស់អ៊ីតាលី នៅចាប់ពីឆ្នាំ ២០១៤ ដល់ឆ្នាំ២០១៦ ខណៈរដូវកាល២០១៧ប្តូរទៅលេងនៅក្លិប Pachuca លីគកំពូលប្រទេសម៉ិចស៊ីកូ មុនសម្រេចទៅបន្តអាជីពនៅក្លិបMelbourne Victory នៅឆ្នាំ២០១៨ដល់បច្ចុប្បន្ន។
បើនិយាយពីក្នុងឈុតជម្រើសជាតិវិញ Honda បានជាប់ក្នុងឈុតអាយុក្រោម២០ ឆ្នាំ (U-20) កាលពីឆ្នាំ២០០៥ ហើយចាប់ពីឆ្នាំ២០០៦ ដល់២០០៨ បានចូលរួមជាមួយក្រុម U-23 ជប៉ុន និងចាប់ពីឆ្នាំ ២០០៨ ដល់បច្ចុប្បន្នជាប់ក្នុងជម្រើសជាតិជប៉ុនឈុតធំ។ ក្នុងនោះគេធ្លាប់ទទួលបានពានរង្វាន់ឯកត្តជនជាច្រើនទាំងក្នុងប្រទេស ប្រចាំតំបន់ទ្វីបអាស៊ី និងកម្រិតពិភពលោកផងដែរ៕
Source: Kampuchea Thmey Daily
0 Comments