ភ្នំពេញ ៖ នាយ នាយរង និងមន្ត្រីនគរបាលនៅតាមអង្គភាពជំនាញ និងនគរបាលនៅតាមអធិការដ្ឋាននានា ចំណុះឲ្យស្នងការដ្ឋាននគរបាលខេត្តកណ្តាល ជាង១៦០០នាក់ បាននាំគ្នាធ្វើញត្តិដាក់ជូនសម្ដេចក្រឡាហោម ស ខេង ឧបនាយករដ្ឋមន្ត្រីរដ្ឋមន្ត្រីក្រសួងមហាផ្ទៃ និងនាយឧត្តមសេនីយ៍សន្តិបណ្ឌិត នេត សាវឿន អគ្គស្នងការនគរបាលជាតិ ដោយបានប្រកាសបដិសេធនូវពាក្យបណ្ដឹង ដែលមានភាពមិនច្បាស់លាស់ (អនាមិក) មួយ ដែលបានចោទប្រកាន់លោកឧត្តមសេនីយ៍ទោ អ៊ាវ ចំរើន ស្នងការនគរបាលខេត្តកណ្ដាល ចំនួន១៦ចំណុច។
នៅក្នុងលិខិតរបស់មន្ត្រីនគរបាលខេត្តកណ្ដាល ដែលបានជម្រាបជូនសម្ដេចក្រឡាហោម ស ខេង បានសរសេរថា កាលពីថ្ងៃទី១៤ ខែមេសា ឆ្នាំ២០១៩ ក្រោមការចង្អុលបង្ហាញដឹកនាំដ៏ខ្ពង់ខ្ពស់របស់នាយឧត្តមសេនីយ៍សន្តិបណ្ឌិត នេត សាវឿន អគ្គស្នងការនគរបាលជាតិ ដោយមានការសម្របសម្រួលពីលោក ឯក ស៊ុនរស្មី ព្រះរាជអាជ្ញារងអមសាលាដំបូងខេត្តស្នងការបានបញ្ជាឲ្យកម្លាំងនគរបាលជំនាញខេត្តចុះបង្ក្រាបទីតាំងល្បែងស៊ីសងខុសច្បាប់ជល់មាន់ នៅចំណុចភូមិពាមប្រជុំ ឃុំព្រែកអំបិលស្រុកស្អាង ខេត្តកណ្ដាល ដែលដឹកនាំផ្ទាល់ដោយលោកឧត្តមសេនីយ៍ លុយ ធៀម ស្នងការរងនគរបាលខេត្តកណ្ដាលស្នងការរងនគរបាលខេត្តកណ្ដាល។
តាមញត្តិនោះ ក្រោយពីការចុះបង្ក្រាបខាងលើនេះរួចមក ស្រាប់តែបែកធ្លាយមានពាក្យបណ្ដឹងអនាមិកប្ដឹងទៅសម្ដេចក្រឡាហោម ស ខេង ដែលមិនមានប្រភពច្បាស់លាស់នៅក្នុងប្រព័ន្ធបណ្ដាញសង្គមហ្វេសប៊ុក ដែលមានខ្លឹមសារថា "យើងខ្ញុំទាំងអស់គ្នាជានាយនគរបាលនាយនគរបាលរងនិងមន្ត្រីនគរបាលនៃស្នងការនគរបាលលើខេត្តកណ្ដាលសុំប្ដឹងលោក អ៊ាវ ចំរើន ស្នងការនគរបាលខេត្តកណ្ដាលអំពីការដឹកនាំដោយប្រើអំណាចផ្ដាច់ការធ្វើបាបកូនចៅ និងប្រព្រឹត្តអំពើពុករលួយ ដែលចុះថ្ងៃទី១៩ ខែមេសា ឆ្នាំ២០១៩ នឹងមាន ស្នាមមេដៃមិនច្បាស់លាស់ចំនួន១២មេដៃ"។
នៅក្នុងញត្តិគាំទ្របានបញ្ជាក់ទៀតថា "នៅថ្ងៃទី១៩ ខែមេសា ឆ្នាំ២០១៩ មានពាក្យបណ្ដឹងអនាមិកបានយកឈ្មោះ នាយនគរបាលនាយនគរបាលរង មកវាយប្រហារលើលោកស្នងការនគរបាលខេត្តកណ្ដាលថា ប្រើអំណាចផ្ដាច់ការធ្វើបាបកូនចៅ និងប្រព្រឹត្តអំពើពុករលួយ។ នេះគឺជាចេតនាទុច្ចរិតបំបែកបំបាក់សាមគ្គីភាពផ្ទៃក្នុង នៃបុគ្គលដែលនៅជុំវិញទង្វើខុសច្បាប់ (ញៀនល្បែងស៊ីសង) របស់ពួកគេ ក្រោយពីការបង្ក្រាបល្បែងស៊ីសងជល់មាន់អាប៉ោងកាលពីថ្ងៃទី ១៤ ខែមេសា ឆ្នាំ២០១៩ របស់ពួកគេតែប៉ុណ្ណោះ។ ក្នុងនាមជនរងគ្រោះ ដែលត្រូវបានក្រុមជនអគតិ យកនាមយើងខ្ញុំទៅបង្កាច់បង្ខូចកិត្តិយសសេចក្តីថ្លៃថ្នូររបស់ស្នងការនគរបាលខេត្តកណ្ដាល យើងខ្ញុំស្នើសុំសម្ដេចក្រឡាហោមចាត់វិធានការផ្លូវច្បាប់ចំពោះក្រុមជនអគតិដែលយកនាមរបស់មន្ត្រីនគរបាលខេត្តកណ្ដាលទាំងមូលទៅបំរើក្នុងគោលបំណងខ្មៅងងឹតរបស់ខ្លួន"។
ការបដិសេធនេះ គឺបន្ទាប់ពីនៅលើបណ្ដាញសង្គមហ្វេសប៊ុករួមទាំងបណ្ដាញសារព័ត៌មានក្នុងស្រុកមួយចំនួន បានធ្វើការចុះផ្សាយ អំពីរឿងមន្ត្រីប៉ូលិសនៅខេត្តកណ្ដាល ប្តឹងលោកឧត្តមសេនីយ៍ទោ អ៊ាវ ចំរើន ស្នងការនគរបាលខេត្តកណ្ដាល ដោយផ្អែកទៅលើលិខិតពាក្យបណ្ដឹងអនាមិក ដែលបានប្តឹងលោកស្នងការទៅសម្ដេចក្រឡាហោម ស ខេង ប៉ុន្តែមកដល់ពេលនេះគ្មានមន្ត្រីណាម្នាក់ចេញមុខមកអះអាង ឬឆ្លើយបំភ្លឺប្រាប់អ្នកសារព័ត៌មានអំពីការដាក់ពាក្យបណ្ដឹងនេះទេ។
គួរបញ្ជាក់ថា នៅក្នុងពាក្យបណ្ដឹងដែលប្តឹងស្នងការខេត្តកណ្តាល គឺជនអនាមិកបានធ្វើជាលិខិតប្ដឹងទៅសម្ដេចក្រឡាហោម ស ខេង ដោយយកស្នាមមេដៃរបស់មនុស្សមួយចំនួន (ក្លែងក្លាយ) យកមកផ្តិតនៅក្រោមពាក្យបណ្ដឹងនោះនឹងមិនបង្ហាញអំពីអត្តសញ្ញាណអ្នកផ្តិតនោះទេ។ ពាក្យបណ្ដឹងនេះ ត្រូវបានធ្វើឡើងបន្ទាប់ពីលោកវរសេនីយ៍ឯក សេង សុជាតិ អធិការនគរបាលស្រុកស្អាង, លោកវរសេនីយ៍ទោ ស៊ុប លាងសែ អធិការរងនគរបាលស្រុកស្អាង, លោកអនុសេនីយ៍ទោ ជៃ សំអាត នាយប៉ុស្តិ៍នគរបាលរដ្ឋបាល ព្រែកអំបិល ត្រូវបានឲ្យមកបង្ហាញមុខនៅការិយាល័យបុគ្គលិក ដើម្បីមកត្រួតពិនិត្យការងាររដ្ឋបាល។
ទាក់ទងបញ្ហានេះ នាយឧត្តមសេនីយ៍សន្តិបណ្ឌិត នេត សាវឿន កាលពីពេលថ្មីៗកន្លងមកនេះ បានបញ្ជាឲ្យស្នងការនគរបាលរាជធានី ខេត្តទាំង២៥ ត្រូវខិតខំពង្រឹងវិន័យ សីលធម៌ កងកម្លាំងឲ្យបានហ្មត់ចត់ រួមទាំងការលើកទឹកចិត្តបន្ថែម ដើម្បីឲ្យបងប្អូនធ្វើសកម្មភាពបម្រើប្រជាពលរដ្ឋតទៅទៀត។ នាយឧត្តមសេនីយ៍សន្តិបណ្ឌិត នេត សាវឿន បានសង្កត់ធ្ងន់ថា ក្នុងករណីដែលរកឃើញថា មានកំហុសត្រូវដាក់វិន័យតាមវិន័យកងកម្លាំងនគរបាលជាតិ តែបើមានឯកសារភស្តុតាងពាក់ព័ន្ធផ្លូវច្បាប់ ត្រូវអនុវត្តទៅតាមច្បាប់របស់ជាតិ៕
Source: Kampuchea Thmey Daily
0 Comments