សៀមរាប ៖ ផ្ទុះប្រអប់ភ្លើងរបស់ភោជនីយដ្ឋានអាប៉ូឡូប្លាហ្សា បង្កជាអគ្គិភ័យឆាបឆេះយ៉ាងសន្ធោសន្ធៅឡើង ធ្វើឲ្យម្ចាស់ដើមការ និងភ្ញៀវកិត្តិយសជាច្រើនរយនាក់បានរត់ចែកជើងគ្នា ចោលរោងការមិនបានចងដៃ ខណៈកំពុងទទួលទានអាហារយ៉ាងសប្បាយរីករាយ។
ហេតុការណ៍អគ្គិភ័យនេះ បានកើតឡើងនៅវេលាម៉ោង២០និង០០នាទី យប់ថ្ងៃទី០៥ខែឧសភាឆ្នាំ២០១៩ នៅទីតាំងភោជនីយដ្ឋានអាប៉ូឡូប្លាហ្សា តាមបណ្តោយផ្លូវជាតិលេខ៦ ក្នុងភូមិខ្នារ សង្កាត់ជ្រាវ ក្រុងសៀមរាប។
ប្រភពបានឲ្យដឹងថា នៅមុនពេលកើតហេតុ នៅអគារA របស់ភោជនីយដ្ឋាន មានពិធីជប់លៀងអាពាហ៍ពិពាហ៍។ លុះដល់ម៉ោងកើតហេតុខណៈដែលភ្ញៀវកំពុងសប្បាយរីករាយ ស្រាប់តែដាច់ចរន្តអគ្គិសនី និងឃើញមានបែកផ្កាភ្លើងចេញពីប្រអប់ភ្លើង ក្បែររោងម៉ាស៊ីនភ្លើង។ ប្រភពបន្តថា ពេលឃើញដូច្នោះ ទាំងភ្ញៀវទាំងម្ចាស់ដើមការ បានរត់ចែកជើងគ្នាយកតែរួចរៀងៗខ្លួន។
លោកឧត្តមសេនីយ៍ទោ ទិត្យ ណារ៉ុង ស្នងការនគរបាលខេត្តសៀមរាបបានឲ្យដឹងថា បន្ទាប់ពីទទួលបានព័ត៌មានភ្លាម លោកបានបញ្ជាឡានទឹកជាច្រើនគ្រឿង ដើម្បីពន្លត់អគ្គិភ័យនេះ។ ប៉ុន្តែដោយសារនៅជិតម៉ាស៊ីនភ្លើងនេះមានស៊ីទែនប្រេង រហូតដល់៥ពាន់លីត្រ បណ្តាលឲ្យឆេះខ្លាំង ហើយពិបាកក្នុងការពន្លត់ តែសមត្ថកិច្ចបានបាញ់ទឹកអស់ជាច្រើនឡាន និងប្រើពេលអស់ប្រមាណ១ម៉ោងទើបពន្លត់អគ្គិភ័យនេះបានរលត់ទាំងស្រុងវិញ។ លោកទិត្យ ណារ៉ុង ឲ្យដឹងថា ករណីអគ្គិភ័យនេះគឺឆាបឆេះតែម៉ាស៊ីនភ្លើង និងរោងដាក់ម៉ាស៊ីនភ្លើងនោះតែប៉ុណ្ណោះ វាមិនបានឆេះរាលដាដល់កន្លែងផ្សេង ឬ បង្កឲ្យមានគ្រោះថ្នាក់ដល់អាយុជីវិតមនុស្សណាម្នាក់នោះទេ។ ម្ចាស់ហាងឈ្មោះ សាំង សុខឈៀង ភេទប្រុស អាយុ៧៧ឆ្នាំ មានទីលំនៅភូមិខ្នារ សង្កាត់ជ្រាវ ក្រុង-ខេត្តសៀមរាប។
លោកស្នងការបញ្ជាក់ថា ករណីអគ្គិភ័យនេះបណ្តាលមកពីផ្ទុះប្រអប់ភ្លើងដែលនៅជិតម៉ាស៊ីនហើយឆាបទៅឆេះស៊ីតែនប្រេង និងបន្តឆេះម៉ាស៊ីន និងរោងដាក់ម៉ាស៊ីនតែម្តង។
ក្នុងនោះដែរក៏មាន វត្តមាន លោក ទៀ សីហា អភិបាលខេត្តសៀមរាប បានទៅពិនិត្យកន្លែងកើតហេតុ ព្រមទាំងបានសម្របសម្រួល ដល់កម្លាំងចម្រុះចំណុះឲ្យខេត្ត ជួយអន្តរាគមន៍ដើម្បីពន្លត់ អគ្គិភ័យនេះបានរលត់ទាំងស្រុង។
លោកទៀ សីហា បានអំពាវនាវឲ្យប្រជាពលរដ្ឋ មានការប្រុងប្រយ័ត្នទាំងអស់គ្នាព្រោះថា ពេលនេះរដូវក្តៅងាយនិងមានគ្រោះអគ្គិភ័យកើតឡើង។
យោងរបាយការណ៍របស់ស្នងការដ្ឋាននគរបាលខេត្តសៀមរាប ទទួលបាននៅព្រឹកថ្ងៃទី៦ ខែឧសភា ឆ្នាំ២០១៩ បានឲ្យដឹងថា សម្ភារខូចខាតរួមមាន ម៉ាស៊ីនភ្លើងខ្នាតធំតម្លៃប្រហែល ៣៨០០០ដុល្លារ, ម៉ាស៊ីនភ្លើងខ្នាតតូច តម្លៃប្រហែល ២០០០០ដុល្លារ, បារ៉ែតកាច់ផ្លាស់ប្តូរភ្លើងចំនួន០៥គ្រាប់ ០១គ្រាប់តម្លៃ៥០០ដុល្លារ, ម៉ាស៊ូតចំនួន ១០០០លីត្រ, ម៉ូតូរឺម៉ក់ចំនួន០១តម្លៃប្រហែល ៣០០០ដុល្លារ រួមទាំងសម្ភារមួយចំនួន។
សម្រាប់ប្រតិបត្តិការខាងលើនេះ កម្លាំងសមត្ថកិច្ចបានប្រើប្រាស់រថយន្តសរុប ១៤គ្រឿង ប្រើទឹកអស់ ២៤រថយន្ត រួមមាន រថយន្តស្នងការនគរបាលខេត្តចំនួន ៥គ្រឿង, រថយន្តកងរាជអាវុធហត្ថ ៤គ្រឿង, រថយន្តបេតិកភណ្ឌ១គ្រឿង, រថយន្តអធិការដ្ឋាននគរបាលស្រុកបាគងចំនួន ១គ្រឿង, រថយន្តអគ្គិភ័យអាកាសយាន្តដ្ឋានអន្តរជាតិ ១គ្រឿង, រថយន្តអគ្គិភ័យភូមិវប្បធម៌ ២គ្រឿង សរុបរថយន្តពន្លត់អគ្គិភ័យប្រើប្រាស់អស់ចំនួន ១៤គ្រឿង បាញ់ទឹកអស់២៤ឡាន។ ចំណែកការខាតបង់របស់ម្ចាស់ដើមការទាំង២រោង ដែលបានជួលភោជនីយដ្ឋានអាប៉ូឡូប្លាហ្សា ធ្វើកម្មវិធីនេះ សមត្ថកិច្ចនៅមិនទាន់បញ្ជាក់ថា ខាងណាជាអ្នកជួយសងថ្លៃបង់ខាតនោះទេ៕
Source: Kampuchea Thmey Daily
0 Comments