រតនគិរី ៖ ក្មេងប្រុសម្នាក់ ត្រូវរន្ទះបាញ់បណ្តាលឲ្យស្លាប់មួយរំពេច ខណៈពេលអង្គុយនៅលើម៉ូតូក្រោមផ្ទះ។
ហេតុការណ៍គួរឲ្យរន្ធត់នេះ បានកើតឡើងកាលពីវេលាម៉ោង១៦និង០០នាទី ថ្ងៃអង្គារ ៤កើត ខែពិសាខ ឆ្នាំកុរ សំរឹទ្ធិស័ក ព.ស២៥៦២ ត្រូវនឹងថ្ងៃទី៧ ខែឧសភា ឆ្នាំ២០១៩ ស្ថិតក្នុងភូមិអុល ឃុំបាតាង ស្រុកលំផាត់។
មន្ត្រីនគរបាលប៉ុស្តិ៍បាតាងបានឲ្យដឹងថា ជនរងគ្រោះឈ្មោះ ហន ដឹន ភេទប្រុស អាយុ១១ឆ្នាំ ជនជាតិទំពួន ហើយក្មេងប្រុសរូបនោះមានស្លាកស្នាមជាំខ្មៅនៅត្រចៀកខាងឆ្វេង ខណៈពេលនោះដែរ ក្មេងប្រុសរងគ្រោះ កំពុងអង្គុយនៅលើម៉ូតូក្រោមផ្ទះ ឈ្មោះ លូ បូ ភេទប្រុស ស្ថិតនៅក្នុងភូមិ/ឃុំកើតហេតុខាងលើ។
មន្ត្រីនគរបាលប៉ុស្តិ៍បានបន្តថា នៅមុនពេលកើតហេតុ មានភ្លៀងធ្លាក់យ៉ាងធំ ស្រាប់តែមានរន្ទះបាញ់ អង់តែនទូរទស្សន៍ចំនួន១ ហើយក៏បានបាញ់ជើងសសរផ្ទះអស់ចំនួន៥ដើម និងជើងតាង១ដើមផងដែរ។
ក្រោយកើតហេតុកម្លាំងប៉ុស្តិ៍បានចុះត្រួតពិនិត្យដល់កន្លែងកើតហេតុ ហើយប្រគល់សពជូនឪពុកម្ដាយរបស់ក្មេងប្រុសរងគ្រោះដើម្បីយកទៅធ្វើបុណ្យតាមប្រពៃណី។
សូមបញ្ជាក់ថា នៅក្នុងខែឧសភានេះ គ្រោះធម្មជាតិបានប្រហារជីវិតមនុស្សអស់ចំនួន៤នាក់មកហើយ ទាំងក្មេង ចាស់ ដោយឆ្នាំនេះកាចសាហាវខ្លាំងណាស់ខុសពីឆ្នាំកន្លងទៅ សូមឲ្យបងប្អូនប្រជាពលរដ្ឋមានការប្រុងប្រយ័ត្នទាំងអស់គ្នា៕
Source: Kampuchea Thmey Daily
0 Comments