ភ្នំពេញ ៖ បុរសជនជាតិបារាំងម្នាក់ និងបុរសជនជាតិខ្មែរម្នាក់ទៀត ត្រូវបានគេប្រទះឃើញស្លាប់ក្នុង ករណីផ្សេងពី គ្នា នៅក្នុងមូលដ្ឋានខណ្ឌដូនពេញ។
សមត្ថកិច្ចខណ្ឌដូនពេញបានឲ្យដឹងថា ករណីមនុស្សស្លាប់លើកទី១.ត្រូវបានភ្ញាក់ផ្អើលឡើងនៅថ្ងៃទី ១កើត ខែពិសាខ ឆ្នាំកុរ ឯកស័ក ព.ស២៥៦២ ត្រូវនឹងថ្ងៃ សៅរ៍ ទី៤ ខែឧសភា ឆ្នាំ២០១៩ វេលាម៉ោង១៥និង៣០នាទី នៅចំណុចក្រុមហ៊ុនបញ្ច២៤ ផ្ទះ១៤៩ ផ្លូវ៦៣ ភូមិ៨ សង្កាត់ចតុមុខ ខណ្ឌដូនពេញ រាជធានីភ្នំពេញ។
សមត្ថកិច្ចបន្តថា សព ឈ្មោះ សាន់ មនោរិទ្ធ ហៅពេជ្យ ភេទប្រុស អាយុ២២ឆ្នាំ មុខរបរបុគ្គលិកក្រុមហ៊ុនបញ្ច២៤ ផ្នែកទទួលទូរស័ព្ទ (Call Center) មានស្រុកកំណើតភូមិផ្សារចាស់ សង្កាត់ស្វាយក្រវាន់ ក្រុងច្បារមន ខេត្តកំពង់ស្ពឺ ស្នាក់នៅម្ដុំវត្តទួល ខណ្ឌឫស្សីកែវ។
សមត្ថកិច្ចបន្តទៀតថា ក្រោយពីសភាពការណ៍កើតឡើង កម្លាំងជំនាញខណ្ឌ និងប៉ុស្តិ៍ បានចុះដល់ គ្រប់គ្រងកន្លែងកើតហេតុ ហើយរាយការណ៍ជូនព្រះរាជអាជ្ញា និងការិយាល័យ បច្ចេកទេសវិទ្យាសាស្ត្រ និង ការិយាល័យព្រហ្មទណ្ឌកម្រិតធ្ងន់ ដើម្បីបង្កើតគណៈកម្មាធិការធ្វើកោសល្យវិច័យ ពិនិត្យសព។
ជាលទ្ធផលតាមការពិនិត្យការិយាល័យ ជំនាញបច្ចេកទេសបានបញ្ជាក់ថា សពស្លាប់ដោយសារខ្សោះឈាម (បណ្ដាលមកពីក្អកធ្លាក់ឈាមយ៉ាងខ្លាំងដោយសារជំងឺសួតធ្ងន់ធ្ងរ)។
ក្រោយពី ពិនិត្យរួច ខាងជំនាញបច្ចេកទេស បានប្រគល់សពឲ្យសាច់ញាតិយកទៅធ្វើបុណ្យនៅក្រុងច្បារមន ខេត្តកំពង់ស្ពឺ។
សមត្ថកិច្ចបញ្ជាក់ទៀតថា ករណីមនុស្សស្លាប់លើកទី២.បានកើតឡើងនៅថ្ងៃទី០៤ ខែធ្នូ ឆ្នាំ២០១៩ វេលាម៉ោង២២និង២០នាទី ដោយប៉ុស្តិ៍នគរបាលរដ្ឋវត្តភ្នំបានទទួលព័ត៌មានថា មានជនបរទេសស្លាប់ សពឈ្មោះ DUPRE ECHSNER MANUEL JACQES ភេទប្រុស អាយុ៥៧ឆ្នាំ ជនជាតិបារាំង មុខរបរលក់ដូរ ស្នាក់នៅផ្ទះលេខ៨០អឺ០ ផ្លូវលេខ១០៨ កែងផ្លូវលេខ៥១ ភូមិ០៣ សង្កាត់វត្តភ្នំ ខណ្ឌដូនពេញ រាជធានីភ្នំពេញ។ លិខិតឆ្លងដែនលេខ 12AD13669។ តាមការពិនិត្យរបស់ការិយាល័យបច្ចេកទេស និងលោកឧកញ៉ា វេជ្ជបណ្ឌិត នង សុវណ្ណរ័ត្ន បានបញ្ជាក់ថា ជនរងគ្រោះស្លាប់ដោយសារគាំងបេះដូង(អាចបណ្ដាលមកពីជំងឺលើសឈាម និងជំងឺតម្រងនោម)។
បច្ចុប្បន្ន សព បានដឹកតាមរថយន្តសង្គ្រោះបន្ទាន់យកទៅតម្កល់ទុកនៅមន្ទីរពេទ្យរុស្ស៊ី៕
Source: Kampuchea Thmey Daily
0 Comments