នៅថ្ងៃចន្ទ មេដឹកនាំប៉ាឡេស្ទីនក្នុងតំបន់ហ្គាហ្សាបានយល់ព្រមចំពោះបទឈប់បាញ់មួយជាមួយអ៊ីស្រាអែលដើម្បីបញ្ចប់អំពើហិង្សាសម្លាប់មនុស្សរយៈពេល២ថ្ងៃដែលបានគំរាមរីករាលដាលទៅជាសង្គ្រាម។ នេះបើតាមសម្តីរបស់ក្រុមមន្ត្រីដែលដឹងអំពីកិច្ចព្រមព្រៀងនេះ។ អ្នកនាំពាក្យយោធាអ៊ីស្រាអែលបានបដិសេធធ្វើអត្ថាធិប្បាយលើកិច្ចព្រមព្រៀងនេះប៉ុន្តែហាក់ដូចជាមិនមានការបាញ់រ៉ុកកែតឬការវាយប្រហាររបស់អ៊ីស្រាអែលទេបន្ទាប់ពីកិច្ចព្រមព្រៀងនេះចូលជាធរមាន។
មន្ត្រីម្នាក់មកពីក្រុមហាម៉ាសនិងម្នាក់ទៀតមកពីសម្ព័ន្ធមិត្តឥស្លាមជីហាដបាននិយាយក្នុងលក្ខខណ្ឌអនាមិកថា ប្រទេសអេហ្ស៊ីបបានសម្របសម្រួលកិច្ចព្រមព្រៀងដើម្បីបញ្ឈប់អរិភាពពីម៉ោង៤:៣០នាទីព្រឹក។ មន្ត្រីអេហ្ស៊ីបម្នាក់ក៏បានបញ្ជាក់ពីកិច្ចព្រមព្រៀងនេះក្នុងលក្ខខណ្ឌអនាមិកផងដែរ។
កិច្ចព្រមព្រៀងនេះបានកើតឡើងបន្ទាប់ពីមានការផ្ទុះអំពើហឹង្សាដ៏ធ្ងន់ធ្ងរបំផុតរវាងអ៊ីស្រាអែលនិងក្រុមសកម្មប្រយុទ្ធប៉ាឡេស្ទីននៅតំបន់ហ្គាហ្សាចាប់តាំងពីសង្គ្រាមឆ្នាំ២០១៤មក។អំពើហិង្សាបានចាប់ផ្តើមកាលពីថ្ងៃសៅរ៍ជាមួយនឹងគ្រាប់រ៉ុក្កែតដ៏ធំមួយគ្រាប់មកពីតំបន់ហ្គាហ្សាដែលជាហេតុនាំឲ្យមានរលកនៃការសងសឹកពីអ៊ីស្រាអែលហើយបានបន្តដល់ពេញមួយថ្ងៃអាទិត្យ។
ជនជាតិប៉ាឡេស្ទីនយ៉ាងតិច២៣នាក់រួមទាំងសកម្មប្រយុទ្ធយ៉ាងតិច៩នាក់ផងដែរត្រូវបានសម្លាប់។ ជនស៊ីវិលបួននាក់នៅប្រទេសអ៊ីស្រាអែលត្រូវបានសម្លាប់ដោយក្នុងនោះមានយ៉ាងតិចបីនាក់ជាពលរដ្ឋអ៊ីស្រាអែល។អំពើហិង្សានេះបានកើតឡើងខណៈក្រុមហាម៉ាសបានស្វែងរកវិធានការបន្ថែមទៀតពីប្រទេសអ៊ីស្រាអែលដើម្បីបន្ធូរបន្ថយការរាំងស្ទះរបស់ខ្លួននៅក្រោមបទឈប់បាញ់គ្នាលើកមុនដែលត្រូវបានសម្របសម្រួលដោយប្រទេសអេហ្ស៊ីបនិងអង្គការសហប្រជាជាតិ។ ប្រទេសអ៊ីស្រាអែលបានប្រឈមនឹងសម្ពាធឲ្យស្វែងរកភាពស្ងប់ស្ងាត់ឡើងវិញនិងបញ្ចប់ការបាញ់គ្រាប់រ៉ុក្កែតទៅលើសហគមន៍នៅភាគខាងត្បូងរបស់ប្រទេសនេះ៕ AFP
Source: Kampuchea Thmey Daily
0 Comments