តំបន់ភាគខាងជើងរបស់ប្រទេសឥណ្ឌាបានចាប់ផ្ដើមបោះឆ្នោតកាលពីថ្ងៃចន្ទក្នុងដំណាក់កាលទី៥ នៃការបោះឆ្នោតទូទៅដ៏ធំមួយខណៈដែលលោកនាយករដ្ឋមន្ត្រី Narendra Modi មានសង្ឃឹមថា កំណត់ត្រារបស់លោកស្ដីពីសន្តិសុខជាតិនឹងធ្វើឲ្យលោកឈ្នះអាណត្តិរយៈពេល៥ឆ្នាំជាលើកទីពីរ។ មនុស្សជាង៨៧លាននាក់នៅទូទាំងរដ្ឋចំនួនប្រាំពីរគឺមានសិទ្ធិបោះឆ្នោតកាលពីថ្ងៃចន្ទរួមទាំងនៅរដ្ឋភាគខាងជើង Jammu and Kashmir ផងដែរដែលជាកន្លែងក្រុមមូស្លីមបំបែកខ្លួនប្រយុទ្ធជាមួយនឹងកងកម្លាំងសន្តិសុខអស់រយៈពេលជាច្រើនទសវត្សមកហើយ។
ប៉ូលិសបាននិយាយថា ក្រុមបំបែកខ្លួនបានអំពាវនាវឲ្យធ្វើពហិការកុំចូលរួមការបោះឆ្នោតនៅក្នុងតំបន់កាស្មៀរហើយក្រុមអ្នកតវ៉ាបានគប់ដុំថ្មដាក់ការិយាល័យបោះឆ្នោតខណៈមនុស្សយ៉ាងតិចម្នាក់ត្រូវបាន បាញ់ឲ្យរងរបួសនៅពេលដែលប៉ូលិសបើកការបាញ់កាំភ្លើង។ពួកសកម្មប្រយុទ្ធក៏បានគប់គ្រាប់បែកនិងគ្រាប់បែកសាំងនៅការិយាល័យបោះឆ្នោតផងដែរប៉ុន្តែមិនមានអ្នករងរបួសទេ។ការបោះឆ្នោតទូទៅ៧ដំណាក់កាលបានចាប់ផ្តើមនៅថ្ងៃទី១១ខែមេសា។ ការបោះឆ្នោតចុងក្រោយនឹងត្រូវធ្វើឡើងនៅថ្ងៃទី១៩ខែឧសភា។
ការបោះឆ្នោតកាលពីថ្ងៃចន្ទគឺរួមបញ្ចូលទាំងតំបន់សំខាន់បំផុតមួយចំនួនផងដែរនៅភាគខាងជើងជាពិសេសរដ្ឋ Uttar Pradesh ដែលជារដ្ឋមានសមាជិកសភាភាគច្រើន។រដ្ឋ Uttar Pradesh ក៏ជាកន្លែងដែលក្រុមជាតិនិយមហិណ្ឌូបានជំរុញយ៉ាងខ្លាំងចំពោះការកសាងប្រាសាទនៅលើវិហារឥស្លាមសតវត្សទី១៦ក្នុងទីក្រុងអយុធ្យាផងដែរដែលបានក្លាយទៅជាចំណុចក្តៅនៃភាពតានតឹងជាមួយប្រជាជនមូស្លីមភាគតិច។
កងទ័ពរាប់រយនាក់បន្ថែមទៀតត្រូវបានដាក់ពង្រាយនៅតំបន់កាស្មៀសម្រាប់ការបោះឆ្នោតនេះហើយបុគ្គលិកបោះឆ្នោតនិងសម្ភារៈបោះឆ្នោតត្រូវបានដឹកជញ្ជូនតាមយន្តហោះ។មន្ត្រីបោះឆ្នោតម្នាក់បាននិយាយថា អ្នកចេញទៅបោះឆ្នោតគឺមានកម្រិតទាបខ្លាំងណាស់ក្នុងរយៈពេល ១ម៉ោងដំបូងនៃការបោះឆ្នោតនៅក្នុងតំបន់ហិមាល័យមួយនេះ។នៅទីក្រុង Pulwama ក្រុមអ្នកតវ៉ាបានគប់ដុំថ្មហើយបានបំផ្លាញរថយន្តក្រុង២៣គ្រឿងដែលដឹកបុគ្គលិកបោះឆ្នោត៕ REUTERS
Source: Kampuchea Thmey Daily
0 Comments