ស្ដេចស៊ុលតង់ប្រ៊ុយណេបានប្រកាសថា ការប្រហារជីវិតដោយការគប់ដុំ ថ្មសម្រាប់អ្នករួមភេទជាមួយភេទដូចគ្នានិងអំពើផិតក្បត់នឹងមិនត្រូវបានអនុវត្តទេ បន្ទាប់ពីមានប្រតិកម្មប្រឆាំងជាសកល ប៉ុន្តែក្រុមអ្នករិះគន់កាលពីថ្ងៃចន្ទបានអំពាវនាវឲ្យច្បាប់ Sharia ដ៏អាក្រក់នេះត្រូវបោះបង់ចោលទាំងស្រុង។
នៅក្នុងសុន្ទរកថាមួយកាលពីថ្ងៃអាទិត្យ ស្ដេចស៊ុលតង់ Hassanal Bolkiah មានបន្ទូលថា ការផ្អាកការកាត់ទោសប្រហារជីវិតនេះដែលអនុវត្តរួចជាស្រេចទៅហើយចំពោះក្រមព្រហ្មទណ្ឌធម្មតារបស់ប្រទេសប្រ៊ុយណេនោះក៏នឹងពង្រីកផងដែរដល់ក្រមព្រហ្មទណ្ឌ Sharia ថ្មីរបស់ខ្លួនដែលរាប់បញ្ចូលទាំងការប្រហារជីវិតដោយការគប់ដុំ ថ្មសម្រាប់ឧក្រិដ្ឋកម្មផ្សេងៗផងដែរ។
ក្រមព្រហ្មទណ្ឌនេះដែលក៏ដាក់ទោសអំពើចោរកម្មដោយការកាត់ដៃនិងជើងផងដែរនោះគឺបានចូលជាធរមានពេញលេញកាលពីខែមុននៅតំបន់ដ៏តូចមួយលើកោះ Borneo ដែលធ្វើឲ្យវាក្លាយជាប្រទេសតែមួយគត់នៅតំបន់អាស៊ីបូព៌ាឬអាស៊ីអាគ្នេយ៍ដែលមានច្បាប់ Sharia នៅថ្នាក់ជាតិ។
ទោះបីជាយ៉ាងណាក៏ដោយ រឿងនេះបានបង្កឲ្យមានកំហឹងពីរដ្ឋាភិបាលនិងក្រុមសិទ្ធិមនុស្សនានាដោយអង្គការសហប្រជាជាតិបានរិះគន់វាថាជា “ការរំលោភយ៉ាងច្បាស់ក្រឡែត” លើសិទ្ធិមនុស្ស។នៅក្នុងសុន្ទរកថាតាមទូរទស្សន៍ ស្ដេចស៊ុលតង់ដ៏មានអំណាចនេះបានធ្វើអត្ថាធិប្បាយជាសាធារណៈជាលើកដំបូងដោយមានបន្ទូលថា មានសំណួរនិងការយល់ច្រឡំជាច្រើនទាក់ទងនឹងច្បាប់ Sharia។
យោងតាមការបកប្រែជាផ្លូវការនៃសុន្ទរកថារបស់ទ្រង់បានឲ្យដឹងថា “ទាំងច្បាប់ទូទៅនិងច្បាប់ Sharia គឺមានគោលបំណងធានាសន្តិភាពនិងភាពសុខដុមរមនារបស់ប្រទេសនេះ”។ ឧក្រិដ្ឋកម្មខ្លះនៅក្នុងប្រទេសមូស្លីមប្រ៊ុយណេដូចជាអំពើឃាតកម្មនិងការជួញដូរគ្រឿងញៀនគឺត្រូវបាន ដាក់ទោសប្រហារជីវិតដោយព្យួរ.កនៅក្រោមក្រមព្រហ្មទណ្ឌជាទៀងទាត់ដែលត្រូវបានអនុវត្តរួមគ្នាជាមួយច្បាប់ Sharia ប៉ុន្តែគ្មាននរណាម្នាក់ត្រូវបានប្រហារជីវិតទេក្នុងរយៈពេលជាច្រើនទសវត្សរ៍មកនេះ។ យ៉ាងណាក្តីក្រុមសិទ្ធិមនុស្សបាននិយាយថា សេចក្តីប្រកាសនេះមិនទាន់គ្រប់គ្រាន់នៅឡើយទេ៕ AFP
Source: Kampuchea Thmey Daily
0 Comments