ព្រះសីហនុ ៖ លោកឧត្ដមសេនីយ៍ទោ ជួន ណារិន្ទ ស្នងការនគរបាលខេត្តព្រះសីហនុ នៅព្រឹកថ្ងៃទី៦ឧសភានេះ បានធ្វើការប្រគល់ទទួលម៉ូតូធុនធំ ម៉ាក Honda Wuyang កម្លាំង១២៥ CC ចំនួន ២០គ្រឿង ជាអំណោយដ៏ថ្លៃថ្លារបស់ ឯកឧត្ដម នាយឧត្ដមសេនីយ៍សន្តិបណ្ឌិត នេត សាវឿន អគ្គស្នងការនគរបាលជាតិ ជូនដល់កងកម្លាំងនគរបាលខេត្តព្រះសីហនុ សម្រាប់បម្រើឲ្យកិច្ចប្រតិបត្តិការការពារថែរក្សាសន្តិសុខ សណ្ដាប់ធ្នាប់សាធារណៈជូនប្រជាពលរដ្ឋ និងភ្ញៀវទេសចរ។
មានប្រសាសន៍នៅក្នុងឱកាសនេះដែរ លោកឧត្ដមសេនីយ៍ទោ ជួន ណារិន្ទ ស្នងការនគរបាលខេត្តព្រះសីហនុបានបញ្ជាក់ថា ម៉ូតូចំនួន២០គ្រឿងនេះ បានបែងចែកជូនទៅការិយាល័យនគរបាលចរាចរណ៍ផ្លូវគោកចំនួន១២គ្រឿង អធិការដ្ឋាននគរបាលក្រុង និងប៉ុស្តិ៍នគរបាលរដ្ឋបាលក្រុងចំនួន ៥គ្រឿង អធិការស្រុកព្រៃនប់០១គ្រឿង អធិការស្រុកស្ទឹងហាវ០១គ្រឿង និងអធិការស្រុកកំពង់សិលា០១គ្រឿង ដើម្បីជាមធ្យោបាយក្នុងកិច្ចការពារសន្តិសុខ រក្សាសណ្ដាប់ធ្នាប់សាធារណៈ ពិសេសសម្រាប់ចេញល្បាត ធ្វើអន្តរាគមន៍ទប់ស្កាត់បទល្មើសក្នុងមូលដ្ឋានបានទាន់ពេលវេលា។
លោក ជួន ណារិន្ទ ក៏បានផ្ដាំផ្ញើដល់មន្ត្រីនគរបាល ត្រូវចេះថែរក្សា និងធ្វើការជួសជុលម៉ូតូជាប់ជាប្រចាំបម្រើឲ្យការងារល្បាត និងចេញបំពេញបេសកកម្ម ការពារសន្តិសុខ សុវត្ថិភាពសង្គម ជូនដល់ប្រជាពលរដ្ឋ ក៏ដូចជាភ្ញៀវទេសចរជាតិ និងអន្តរជាតិ ក្នុងមូលដ្ឋានប្រកបដោយប្រសិទ្ធភាព និងតម្លាភាព ព្រមទាំងផ្ដោតដល់មន្ត្រីនគរបាលទាំងអស់ ត្រូវយកចិត្តទុកដាក់ ថែរក្សាសន្តិភាពសុខ សណ្ដាប់ធ្នាប់សាធារណៈ ពិសេសលុបបំបាត់គ្រឿងញៀន និង ល្បែងស៊ីសងគ្រប់ប្រភេទក្នុងមូលដ្ឋាន ដើម្បីភូមិ/ឃុំ មានសុវត្ថិភាព៕
Source: Kampuchea Thmey Daily
0 Comments