ភ្នំពេញ ៖ ដើម្បីកាត់បន្ថយការលិចលង់ដោយជំនន់ទឹកភ្លៀង រដ្ឋបាលរាជធានីភ្នំពេញបានខិតខំប្រឹងប្រែងណាស់ក្នុងការស្តារ លាងសំអាតលូ និងប្រឡាយ រួមទាំងបានស្ថាបនាស្ថានីយបូមទឹកថ្មីៗជាច្រើនកន្លែងទៀតផងដែរ។
ជាក់ស្តែងនៅពេលនេះ រដ្ឋបាលរាជធានីភ្នំពេញ បាននិងកំពុងជីកស្តារប្រឡាយ និងកាយប្រមូលសំរាមពីប្រឡាយធំៗចំនួន៣កន្លែង ដែលក្នុងនោះ សម្រាប់ប្រឡាយបឹងសាឡាង និងប្រឡាយបឹងត្របែកសម្រេចបាន១០០% ខណៈការប្រឡាយបឹងទំពុនទើបតែសម្រេចបាន៥០% ស្មើនឹងជាង៣ម៉ឺនម៉ែត្រគូប។
លោក ដួង ចាន់សារ៉ាត់ ប្រធានអង្គភាពលូទឹកបូមទឹក នៃមន្ទីរសាធារណការនិងដឹកជញ្ជូនរាជធានីភ្នំពេញបានឲ្យដឹងនៅព្រឹកថ្ងៃទី០៦ឧសភានេះថា ប្រឡាយបឹងសាឡាងយើងបានចាប់ផ្ដើមស្តារ កាលពីថ្ងៃទី២៦ ខែមិនា ឆ្នាំ២០១៩។ ចំណែកប្រឡាយបឹងត្របែកយើងបានធ្វើសកម្មភាពស្តារសំរាម និងស្មៅត្រិប កាលពីថ្ងៃទី២៧ ខែកុម្ភៈ ឆ្នាំ២០១៩ ហើយបើគិតមកដល់ពេលនេះ ប្រឡាយទាំង២ខាងលើយើងសម្រេចស្តារសំរាម និងស្មៅត្រិបបាន១០០ភាគរយហើយ។ ដោយឡែកសម្រាប់ប្រឡាយបឹងទំពុន យើងបាននិងកំពុងស្តារ កើបសំរាម និងស្មៅត្រិបផងដែរ ដែលរហូតមកដល់ពេលនេះ យើងសម្រេចបាន៥០%ហើយដែរ។ បើគិតសរុបយើងប្រមូលសំរាមបានចំនួន៧០០ឡានស្មើនឹង៣៥០០ម៉ែត្រគូប។
ពាក់ព័ន្ធនិងបញ្ហានេះ លោក ដួង ចាន់សារ៉ាត់ បានអំពាវនាវដល់ប្រជាពលរដ្ឋទាំងអស់សូមបញ្ឈប់ការបោះចោលសំរាមចូលលូ ចូលប្រឡាយ ដែលនាំបង្កើតជាឧបសគ្គដល់ផ្លូវបង្ហូរទឹក និងប៉ះពាល់ដល់បរិស្ថាន និងសោភណភាពទីក្រុងយើង៕
Source: Kampuchea Thmey Daily
0 Comments