ការធ្លាក់ចុះនៃចំនួនអ្នកទេសចរចិន ដែលមកលេងប្រទេសវៀតណាមក្នុងរយៈពេល៤ខែដំបូងនៃឆ្នាំ២០១៩នេះ កំពុងបណ្ដាលឱ្យមានការថយចុះនៃកំណើនឧស្សាហកម្មទេសចរណ៍នៅវៀតណាមកាន់តែធ្ងន់ធ្ងរ។
យោងតាមរដ្ឋបាលទេសចរណ៍ជាតិរបស់វៀតណាមបានឱ្យដឹងថា ភ្ញៀវទេសចរចិនជិត ១,៧១លាននាក់បានមកដល់ប្រទេសវៀតណាមនៅរយៈពេល៤ខែដំបូងនៃឆ្នាំ២០១៩ ដែលស្មើនឹង៤% មានការធ្លាក់ចុះធៀបនឹងរបាយការណ៍ឆ្នាំមុនសម្រាប់ទីផ្សារសំខាន់ និងស្មើ៣០%នៃចំនួនភ្ញៀវទេសចរសរុបទាំងអស់ដែលមកលេងប្រទេសវៀតណាម ពោលគឺជាចំនួនច្រើនជាងប្រទេសដទៃ។
ការធ្លាក់ចុះដ៏គំហុកនេះបានធ្វើឱ្យចំនួនភ្ញៀវទេសចរសរុបដែលបានមកលេងនៅប្រទេសវៀតណាមសម្រាប់រយៈពេល៤ខែដំបូងមានការកើនឡើងត្រឹមតែ៧,៦%ប៉ុណ្ណោះ។
តាមការរាយការណ៍ថា កាលពីឆ្នាំមុន ចំនួនភ្ញៀវទេសចរអន្តរជាតិដែលចូលមកក្នុងប្រទេសនេះកើនឡើងជិត៣០% ក្នុងរយៈពេលដូចគ្នា ខណៈទេសចរកូរ៉េខាងត្បូង និងតៃវ៉ាន់ដែលជាទីផ្សារសំខាន់ទី២ និងទី៣សម្រាប់វិស័យទេសចរណ៍វៀតណាមបានបន្តកើនឡើងដល់ ២៣,២% និង២៥%ក្នុងរយៈពេលដូចគ្នានេះ។
ទីភ្នាក់ងារទេសចរណ៍ក្នុងស្រុកនានារបស់វៀតណាមបានឱ្យដឹងថា ចំនួនភ្ញៀវទេសចរចិនចូលមកក្នុងប្រទេសបានបន្តធ្លាក់បែបនេះតាំងពីខែតុលា ឆ្នាំ២០១៨មកម្ល៉េះ។ ដោយឡែក រដ្ឋបាលទេសចរណ៍ជាតិរបស់វៀតណាមមានគម្រោងបង្កើតព្រឹត្តិការណ៍ជាបន្តបន្ទាប់ក្នុងទីក្រុងនានារបស់ចិន ដោយសង្ឃឹមថានឹងអាចទាញឱ្យមានការចាប់អារម្មណ៍លើប្រទេសវៀតណាមជាគោលដៅទេសចរណ៍ដំបូងគេសម្រាប់ប្រជាជនចិនដែលចូលចិត្តដើរកម្សាន្តពេលសម្រាកពីការងារ៕ TUOI TRE NEWS
Source: Kampuchea Thmey Daily
0 Comments