ប៉ៃលិន ៖ កាលពីរសៀលថ្ងៃទី០៥ ខែឧសភា ឆ្នាំ២០១៩ លោកស្រី បាន ស្រីមុំ អ៊ី ឈាន ប្រធានមូលនិធិគាំទ្រសុខភាព និង សង្គ្រោះបន្ទាន់ និង ជាអ្នកតំណាងរាស្ត្រមណ្ឌលប៉ៃលិន បានដឹកនាំក្រុមការងារមូលនិធិ អញ្ជើញចុះសួរសុខទុក្ខ និងចែកអំណោយសង្គ្រោះបន្ទាន់ ដល់ចាស់ជរាគ្មានទីពឹង និងមានជីវភាពខ្វះខាតចំនួន៩១នាក់ ទូទាំងខេត្តប៉ៃលិន។
ថ្លែងក្នុងឱកាសនោះដែរ លោកស្រី បាន ស្រីមុំ អ៊ី ឈាន ប្រធានមូលនិធិគាំទ្រសុខភាព និងសង្គ្រោះបន្ទាន់ និងជាអ្នកតំណាងរាស្ត្រមណ្ឌលប៉ៃលិន បានពាំនាំនូវបណ្តាំសាកសួរសុខទុក្ខ ពីសំណាក់ សម្ដេចតេជោ ហ៊ុន សែន នាយករដ្ឋមន្ត្រី និងជាប្រធានគណបក្សប្រជាជនកម្ពុជា និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ព្រមទាំងថ្នាក់ដឹកនាំជាន់ខ្ពស់ របស់គណបក្សប្រជាជនកម្ពុជាទាំងអស់ ជូនចំពោះលោកយាយ លោកតា និងប្រជាពលរដ្ឋក្នុងខេត្តប៉ៃលិនទាំងអស់ ដោយសម្ដេច បានសូមជូនពរឲ្យលោកយាយ លោកតាមានសុខភាពល្អ អាយុយឺនយូរ និងសូមថែរក្សាសុខភាពឲ្យបានល្អគ្រប់គ្នា។
លោកស្រីប្រធានមូលនិធិ បានបន្តទៀតថា ៖ ការបង្កើតមូលនិធិនេះ គឺដើម្បីជួយសម្រាលការលំបាក និងលើកកម្ពស់សុខុមាលភាពលោកយាយ លោកតា ចាស់ជរា គ្មានទីពឹង និងមានជីវភាពខ្វះខាតក្នុងខេត្តប៉ៃលិន ចំពោះមូលនិធិនេះគឺជាសកម្មភាពមនុស្សធម៌សុទ្ធសាធ មិនប្រកាន់ពណ៌សម្បុរនយោបាយ ឬ គណបក្ស អ្វីឡើយ ព្រោះថាមនុស្សចាស់ លោកមានគុណបំណាច់ធំធេងណាស់ ក្នុងការជួយអប់រំ ប្រៀនប្រដៅ ដល់កូនចៅជំនាន់ក្រោយៗ ឲ្យប្រព្រឹត្តិតែ អំពើល្អហើយជាការពិតណាស់ សកម្មភាពជួយគ្នាទៅវិញទៅមក បានក្លាយទៅជាប្រពៃណីចែករំលែកនៅក្នុងសង្គមកម្ពុជានាពេលបច្ចុប្បន្ន។
លោកស្រីប្រធានបានបន្តថា ចំពោះចាស់ជរាណា ដែលសម្រាកព្យាបាលជំងឺនៅមន្ទីរពេទ្យ ឬចាស់ជរាណា ដែលមិនអាចធ្វើដំណើរមកទទួលប្រាក់ឧបត្ថម្ភនេះបាន គឺយើងដឹកនាំក្រុមការងារ ចុះទៅចែកជូនដល់ទីកន្លែង ដោយមិនពិបាកធ្វើដំណើរមកឡើយ ចំពោះការចែកប្រាក់ឧបត្ថម្ភនាថ្ងៃនេះ មានចំនួន៣ទីតាំង គឺនៅការិយាល័យតំណាងរាស្ត្រមណ្ឌលប៉ៃលិន ក្នុងភូមិវត្ត សង្កាត់ប៉ៃលិន។ ទី២,នៅសាលាឃុំអូរអណ្ដូង។ ទី៣,នៅសាលាឃុំស្ទឹងត្រង់ ស្រុកសាលាក្រៅផងដែរ។
លោកស្រីក៏បានបញ្ជាក់ដែរថា នេះជាលើកទី២ហើយ សម្រាប់ឆ្នាំ២០១៩ ដោយការបើកប្រាក់ឧបត្ថម្ភប្រចាំខែ ដល់ចាស់ជរាគ្មានទីពឹង ឬមានជីវភាពខ្វះខាត គឺនៅរៀងរាល់ថ្ងៃទី០៥ នៃខែនិមួយៗ ដោយក្នុងម្នាក់ៗ ទទួលបានថវិកាចំនួន ១០០,០០០រៀល (មួយសែនរៀលគត់)ផងដែរ។ជាទីបញ្ជាប់លោកជំទាវប្រធាន ក៏បានសូមជូនពរឲ្យពុកម៉ែទាំងអស់មានសុខភាពល្អ និងមានយឺនយូរ ផងដែរ។
គួរបញ្ជាក់ថា ជានិច្ចកាលគណបក្សប្រជាជនកម្ពុជា តែងតែគិតគូរយកចិត្តទុកដាក់ពីសុខទុក្ខ និងជីវភាពរស់នៅរបស់ប្រជាពលរដ្ឋជាប្រចាំ តាមរយៈអ្នកតំណាងរាស្ត្រគណបក្សប្រជាជនកម្ពុជាគ្រប់មណ្ឌល និងក្រុមការងាររបស់គណបក្សគ្រប់លំដាប់ថ្នាក់ផងដែរ៕
Source: Kampuchea Thmey Daily
0 Comments