សៀមរាប ៖ សមត្ថកិច្ចបានឲ្យដឹងថា មានករណីគ្រោះថ្នាក់ចរាចរមួយបានកើតឡើងដោយសារ អ្នកបើកគោយន្តកែច្នៃដឹកដីបើកថយក្រោយ មិនប្រុងប្រយ័ត្នបណ្ដាលឲ្យមនុស្សម្នាក់ស្លាប់ភ្លាមៗនៅនឹងកន្លែង និង មនុស្សចំនួន០២នាក់ផ្សេងទៀត បានរងរបួសស្រាល។ ចំណែកជនបង្ករត់គេចខ្លួនបាត់។
ហេតុការណ៍បង្កការភ្ញាក់ផ្អើលនេះ កើតឡើងនៅវេលាម៉ោង០៩និង៣០នាទីព្រឹក ថ្ងៃទី០១ ខែឧសភា ឆ្នាំ២០១៩ តាមផ្លូវលំក្រាលគ្រួសក្រហម ស្ថិតក្នុងភូមិស្នួល ឃុំស្នួល ស្រុកក្រឡាញ់។
អធិការនគរបាលស្រុកក្រឡាញ់ គឺ លោកវរសេនីយ៍ឯក ជី បេងជន បានឲ្យដឹងថា មានករណីគ្រោះថ្នាក់ចរាចរណ៍មួយបានកើតឡើង រវាងគោយន្តកែច្នៃពណ៌ខៀវ គ្មានស្លាកលេខ ជាមួយនឹងម៉ូតូ នៅលើផ្លូវលំក្រាលគ្រួសក្រហម ស្ថិតក្នុងភូមិស្នួល ឃុំស្នួល ស្រុកក្រឡាញ់ បណ្ដាលឲ្យមនុស្សម្នាក់ស្លាប់ភ្លាមៗនៅនឹងកន្លែង និង មនុស្សចំនួន០២នាក់ផ្សេងទៀត បានរងរបួសស្រាល។
លោកបន្តថា ករណីនេះគឺអ្នកបើកបរគោយន្តកែច្នៃដឹកដី ឈ្មោះ លន់ លីន ភេទប្រុស អាយុ២៨ឆ្នាំ រស់នៅភូមិល្បើក ឃុំរោងគោ ស្រុកក្រឡាញ់ បានបើកគោយន្តថយក្រោយ ក្នុងទិសដៅពីជើងទៅត្បូង ក៏បានបុកម៉ូតូម៉ាក ហុងដាឌ្រីម ពណ៌ខ្មៅ ស៊េរីឆ្នាំ២០១៦ ពាក់ស្លាកលេខ ពោធិ៍សាត់ 1F-7834 បើកបរដោយឈ្មោះ យាត យ៉ា ភេទស្រី អាយុ១៣ឆ្នាំ ស្លាប់ភ្លាមៗនៅនឹងកន្លែង និងអ្នកជិះជាមួយពីរនាក់ទៀត គឺអ្នកទី១. ឈ្មោះ យាត សារិកា ភេទស្រី អាយុ១៤ឆ្នាំ រងរបួសស្រាល និងអ្នកទី២. ឈ្មោះង៉ា វីសា ភេទប្រុស អាយុ១១ឆ្នាំ រងរបួសស្រាល ដែលអ្នកទាំង៣នាក់នេះ រស់នៅភូមិព្រៃគាប ឃុំរោងគោ ស្រុកក្រឡាញ់ បើកក្នុងទិសដៅពីត្បូងទៅជើង រួចឈប់ រីឯម៉ូតូខូចខាតធ្ងន់ធ្ងរ។ នៅគ្រានោះអ្នកបើកបរបានចុះរត់គេចខ្លួនបាត់។
ក្រោយពេលកើតហេតុ កម្លាំងជំនាញបានចុះទៅដល់កន្លែងកើតហេតុ បានធ្វើការត្រួតពិនិត្យ និងវាស់វែង និងបាននាំយកវត្ថុតាំងមករក្សាទុកនៅអធិការរដ្ឋាននគរបាលស្រុក ដើម្បីកសាងសំណុំរឿង និងធ្វើការដោះស្រាយតាមនីតិវិធីច្បាប់បន្ត រីឯសាកសពជនរងគ្រោះ ត្រូវបានប្រគល់ជូនក្រុមគ្រួសារយកទៅធ្វើបុណ្យតាមប្រពៃណី៕
Source: Kampuchea Thmey Daily
0 Comments