ភ្នំពេញ ៖ ការច្រានចោលរបស់ក្រសួងការពារជាតិនេះ ធ្វើឡើងកិច្ចប្រជុំបូកសរុបលទ្ធផលការងារប្រចាំខែមេសា និងលើកទិសដៅការងារបន្តសម្រាប់ ខែឧសភា ឆ្នាំ២០១៩ កាលពីព្រឹកថ្ងៃទី០២ ខែឧសភា ឆ្នាំ២០១៩ ដែលកិច្ចប្រជុំនេះ មានការអញ្ជើញចូលរួមពីនាយឧត្តមសេនីយ៍ នាង ផាត រដ្ឋលេខាធិការប្រចាំការក្រសួងការពារជាតិ តំណាងសម្តេចពិជ័យសេនា ទៀ បាញ់ ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ នេះបើតាមការបញ្ជាក់របស់អ្នកនាំពាក្យ។
នាយឧត្តមសេនីយ៍ ឈុំ សុជាតិ អ្នកនាំពាក្យក្រសួងការពារជាតិបានបញ្ជាក់ថា ក្នុងកិច្ចប្រជុំនោះ នាយឧត្តមសេនីយ៍ នាង ផាត បានគូសបញ្ជាក់ និងបដិសេធចំពោះពាក្យចចាមអារ៉ាមដែលលើកឡើងថា ក្រសួងការពារជាតិមានគម្រោងទម្លាក់ ស័ក្តិ ដែលព័ត៌មាននេះមិនមែនជាការពិតនោះទេ ហើយនាយឧត្តមសេនីយ៍បានសុំឲ្យនាយទាហានទាំងអស់ កុំមានការភ្ញាក់ផ្អើល តាមការបកស្រាយខុសគោលបំណងរបស់រាជ រដ្ឋាភិបាលកម្ពុជា ក្នុងផែនការកែទម្រង់កងយោធពលខេមរភូមិន្ទរយៈពេល៥ឆ្នាំ ២០១៥-២០១៩។ នាយឧត្តមសេនីយ៍បន្ដថា ការកែទម្រង់ឋានន្តរស័ក្តិក្នុងកងយោធពល ខេមរភូមិន្ទ មានផែនការយុទ្ធសាស្ត្រយូរអង្វែង ជាជំហានៗ ដើម្បីកសាងកងទ័ពមួយមានគុណភាព និងប្រសិទ្ធភាព ដើម្បីដឹកនាំបញ្ជាឲ្យសមស្របតាមការវិវឌ្ឍន៍ នៃសភាពការណ៍ជាតិ និងអន្តជាតិ។ ជាមួយគ្នានេះ មិនមែនកាត់ ឬទម្លាក់ស័ក្តិ ដូចការបកស្រាយភាន់ច្រឡំនោះទេ។
គួររម្លឹកថា សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ធ្លាប់បានមានប្រសាសន៍លើកឡើងកាលពីពេលថ្មីៗនេះថា នៅថ្ងៃអនាគត ខាងមុខនេះ ក្នុងជួរកងទ័ពមានតែរដ្ឋមន្ត្រីការពារជាតិ និងអគ្គមេបញ្ជាការកងយោធពលខេមរភូមិន្ទប៉ុណ្ណោះ ដែលពាក់ផ្កាយ៤។ ជាមួយគ្នានេះ សម្រាប់អគ្គមេបញ្ជាការរង និងអគ្គនាយកនៃអគ្គនាយកដ្ឋាននានា ត្រូវពាក់ផ្កាយ៣, អគ្គនាយករងពាក់ត្រឹមផ្កាយ២ប៉ុណ្ណោះ។
សម្តេចតេជោបានបញ្ជាក់ទៀតថា មេបញ្ជាការកងទ័ពជើងគោក ជើងអាកាស ជើងទឹក គឺពាក់ត្រឹមផ្កាយ៣ និងតាមបណ្តាមេបញ្ជាការភូមិភាគនានា ផ្តល់ត្រឹមតែផ្កាយ២។ ដោយឡែក អគ្គមេបញ្ជាការរង នៃកងយោធពលខេមរភូមិន្ទទាំងអស់ នឹងត្រូវពាក់ត្រឹមផ្កាយ៣។ សម្តេចតេជោ បានថ្លែងបន្ថែមថា នៅពេលខាងមុខមន្ត្រីថ្នាក់រដ្ឋលេខាធិការ និងអនុរដ្ឋលេខាធិការ ដែលពាក់ផ្កាយ៤ និងទម្លាក់មកត្រឹមផ្កាយ៣ លើកលែងតែមន្ត្រីចាស់ៗ មួយចំនួនប៉ុណ្ណោះរក្សាទុកផ្កាយ៤។ ពាក់ព័ន្ធនឹងកំណែទម្រង់វិស័យកងកម្លាំងប្រដាប់អាវុធនេះដែរ សម្តេចតេជោ ហ៊ុន សែន បានមានប្រសាសន៍បន្ថែមទៀតថា នឹងធ្វើកំណែទម្រង់លើកម្លាំងនគរបាលផងដែរ ហើយទាំងក្រសួងការពារជាតិ និងក្រសួងមហាផ្ទៃ នឹងសិក្សាលម្អិតបន្ថែមលើការកែទម្រង់នេះ៕
Source: Kampuchea Thmey Daily
0 Comments