ភ្នំពេញ ៖ បុរសម្នាក់ត្រូវបានសមត្ថកិច្ចនគរបាលនាយកដ្ឋានព្រហ្មទណ្ឌកម្រិតធ្ងន់ក្រសួងមហាផ្ទៃឃាត់ខ្លួនតាមដីកា និងបញ្ជូនមកកាន់សាលាដំបូងរាជធានីភ្នំពេញ កាលពីរសៀលថ្ងៃទី០១ខែឧសភា ឆ្នាំ២០១៩ ពាក់ព័ន្ធការប្រព្រឹត្តបទល្មើសក្លែងឯកសារ។
តាមរបាយការណ៍របស់សមត្ថកិច្ច ជនសង្ស័យដែលត្រូវចាប់ខ្លួនមានឈ្មោះ ភ័ណ្ឌ សុភ័ក្រ ភេទប្រុស អាយុ ៣៧ឆ្នាំ មានទីលំនៅភូមិចំណោតរាម ឃុំបិតត្រាំង ស្រុកព្រៃនប់ ខេត្ដព្រះសីហនុ។
សមត្ថកិច្ចបានឃាត់ខ្លួនជនសង្ស័យកាលពីព្រឹកថ្ងៃទី០១ ខែឧសភា ឆ្នាំ២០១៩ តាមដីកាបញ្ជាឲ្យចូលខ្លួនរបស់លោក សេង គឹមឡាក់ ព្រះរាជអាជ្ញារងអមសាលាដំបូងរាជធានីភ្នំពេញ ពាក់ព័ន្ធបទល្មើស ក្លែងឯកសារ និងប្រើប្រាស់លិខិតសាធារណៈក្លែង ប្រព្រឹត្តិកាលពីអំឡុងខែតុលាឆ្នាំ២០១៨នៅចំណុចភូមិចំណោតរាម ឃុំបិតត្រាំង ស្រុកព្រៃនប់ ខេត្ដព្រះសីហនុ។
រឿងក្ដីនេះត្រូវចាត់បញ្ជូនឲ្យលោកព្រះរាជអាជ្ញារង ប្លង់ សុផល ដើម្បីសាកសួរ។ ប្រភពព័ត៌មានពីសាលាដំបូងរាជធានីភ្នំពេញ បានឲ្យដឹងថា នៅរសៀលថ្ងៃទី ០២ឧសភា ឆ្នាំ២០១៩ លោកប្លង់សុផល បានសម្រេចចោទប្រកាន់ឈ្មោះ ភ័ណ្ឌ សុភ័ក្រ ពីបទក្លែងឯកសារ ហើយបញ្ជូនសំណុំរឿង និង ជនត្រូវចោទ ឲ្យចៅក្រមស៊ើបសួរសម្រេចតាមនីតិវិធី៕
Source: Kampuchea Thmey Daily
0 Comments