ប្រធាន​ទេសចរណ៍​ស្រីលង្កា​ ៖​ ចំនួន​ទេសចរ​ទៅលេង​ក្រុង​កូឡុំបូ​នឹង​ធ្លាក់ចុះ​៥០% ក្រោយពី​មាន​ករណី​បំផ្ទុះ​គ្រាប់បែក

លោក​Kishu Gomes ប្រធានការិយាល័យ​ទេសចរណ៍​ស្រីលង្កា​បាន​ព្យាករណ៍​ថា​ ចំនួន​ភ្ញៀវទេសចរ​ដែល​នឹង​ចូលមក​ក្រុង​កូឡុំបូ​នឹង​ធ្លាក់ចុះ​៥០%​ក្នុង​រយៈពេល​២​ខែ​បន្ទាប់​ ក្រោយពី​មាន​ករណី​ផ្ទុះ​គ្រាប់បែក​នៅ​ថ្ងៃបុណ្យ Easter កាលពី​ថ្ងៃអាទិត្យ​មុន​ដោយបាន​សម្លាប់​មនុស្ស​ជាង​២៥០​នាក់​។​

​ថ្លែងប្រាប់​អ្នកសារព័ត៌មាន​ក្នុង​សន្និសីទ​ទេសចរណ៍​នៅ​ទីក្រុង​ឌូ​បៃ​លោក Gomes ថា​ចំនួន​ទេសចរ​នៅ​តំបន់​ក្រៅ​ក្រុង​កូឡុំបូ​ទំនងជា​អាច​ធ្លាក់​ដល់​៣០% ដោយសារតែ​ការវាយប្រហារ​ខាងលើនេះ​។

​ដោយឡែក​លោក​បាន​ប្រាប់​ទីភ្នាក់ងារសារព័ត៌មាន Reuters ថា​ស្រីលង្កា​នឹង​ប្រឈមមុខ​ជាមួយ​ការបាត់បង់​ប្រាក់ចំណូល​ពី​វិស័យ​ទេសចរណ៍​ប្រហែល​៧៥០​លាន​ដុល្លារ​ក្នុងឆ្នាំនេះ​តែម្ដង​។​ជាមួយគ្នានេះដែរ​នាយក​ប្រតិបត្តិ​ក្រុមហ៊ុន​SriLankan Airlines លោក​VipulaGunatilleka​ក៏​ប្រាប់ Reuters ដែរ​ថា​ក្រុមហ៊ុន​លោក​បានទទួល​ការលុបចោល​ការហោះហើរ​កើន​ដល់​១០%​កាលពី​សប្ដាហ៍​មុននេះ​ហើយ​រំពឹងថា​នឹង​បន្ត​ការកើនឡើង​ទៀត​។​

​ការដួលរលំ​នៃ​វិស័យ​ទេសចរណ៍​ក្រោយពី​មានការ​វាយប្រហារ​ទៅលើ​ព្រះវិហារ​និង​សណ្ឋាគារ​ជាច្រើន​នឹងធ្វើ​ឱ្យ​ប៉ះទង្គិច​ធ្ងន់ធ្ងរ​ដល់​សេដ្ឋកិច្ច​នៃ​កោះ​មួយ​នេះ​ក៏ដូចជា​ទីផ្សារ​ហិរញ្ញវត្ថុ​ថែមទាំង​អាច​បង្ខំ​ឱ្យ​កោះ​នេះ​ស្វែងរក​ជំនួយ​ពី​មូលនិធិ​រូបិយវត្ថុ​អន្តរជាតិ​ទៀតផង​។​

​លោក Gomes បាន​បន្ថែមថា​ការិយាល័យ​ទេសចរណ៍​បានដាក់​ផែនការ​ទាក់ទាញ​ទេសចរ​ឱ្យបាន​២,៥​លាន​នាក់​ក្នុង​ឆ្នាំ​២០១៩​និង​មាន​ភាព​ជឿជាក់ថា​អាច​សម្រេច​ដូច​ផែនការ​បាន​ប្រសិនបើ​វិស័យ​យោធា​អាច​ពង្រឹង​និង​ធានា​ផ្នែក​សន្តិសុខ​បាន​ឡើងវិញ​៕ REUTERS
​

​

Source: Kampuchea Thmey Daily