ព្រះវិហារ ៖ កាលពីរសៀលថ្ងៃទី០៤ ខែឧសភា ឆ្នាំ២០១៩ មានហេតុការណ៍បុរសវ័យចំណាស់ម្នាក់លង់ទឹកស្លាប់ ខណៈពេលទៅបង់សំណាញ់ចាប់ត្រី ត្រង់ចំណុចទំនប់ទឹកសីម៉ា ស្ថិតក្នុងភូមិស្វាយ ឃុំរំដោះស្រែ ស្រុកជាំក្សាន្ត។
លោក សេត សែន មេឃុំរំដោះស្រែ បានឲ្យដឹងថា ជនរងគ្រោះមាន ឈ្មោះ ភួង វិន ភេទប្រុស អាយុ៥៦ឆ្នាំ មានទីលំនៅភូមិជាំក្សាន្ត ឃុំជាំក្សាន្ត ស្រុកជាំក្សាន្ត ខេត្តព្រះវិហារ។
លោកបន្តថា យោងតាមសំដីប្រជាពលរដ្ឋ ដែលបង់សំណាញ់ជាមួយជនរងគ្រោះនិយាយថា នៅមុនពេលកើតហេតុ ជនរងគ្រោះបានដើរបង់សំណាញ់ចុះទៅក្នុងទឹកជ្រៅទាំងអស់គ្នា។ មួយសន្ទុះក្រោយមក ស្រាប់តែបាត់ជនរងគ្រោះ ហើយនាំគ្នាភ្ញាក់ផ្អើលដល់ប្រជាពលរដ្ឋ និងសមត្ថកិច្ចមូលដ្ឋានចុះជួយរាវរក បន្ទាប់មកបានប្រទះឃើញជនរងគ្រោះស្លាប់ក្នុងរណ្តៅចាស់មានជម្រៅប្រហែល៦ម៉ែត្រ ដោយរុំជាប់ជាមួយនឹងសំណាញ់។
សមត្ថកិច្ចនគរបាល បានធ្វើការពិនិត្យកោសល្យវិច័យ រកពុំឃើញមានអ្វីផ្សេង ក្រៅពីករណីលង់ទឹកស្លាប់ កម្លាំងជំនាញបានប្រគល់សពជូនគ្រួសាររងគ្រោះដើម្បីយកទៅធ្វើបុណ្យតាមប្រពៃណី៕
Source: Kampuchea Thmey Daily
0 Comments