ព្រះវិហារ ៖ ឈ្មួញឈើពូកែប្រើល្បិចកល បានរៀបគម្រោងប្តូររូបភាពយកឈើខុសច្បាប់ទៅស្តុកទុកក្នុងបរិវេណវត្តអារាម ដែលជាទីគោរពសក្ការបូជា សម្រាប់ពុទ្ធបរិស័ទ ទីបំផុតនៅតែអស់លក្ខណ៍។
ឈើអារប្រមាណជាង១០០ម៉ែត្រគូប ជារបស់ឈ្មួញ ឈ្មោះ ស៊ុំ ឈុំប៊ុន ត្រូវសមត្ថកិច្ចជំនាញបរិស្ថានចុះបង្ក្រាប កាលពីថ្ងៃទី០៤ ខែឧសភា ឆ្នាំ២០១៩ថ្មីៗនេះ។
ពុទ្ធបរិស័ទចំណុះជើងវត្ត ដែលដឹងរឿងពិត បានទម្លាយថា ការយកឈើមកស្តុកទុកក្នុងវត្តបែបនេះដើម្បីបិទបាំងពីការបង្ក្រាបរបស់សមត្ថកិច្ចតែប៉ុណ្ណោះ។ ពួកគាត់ចាំថា កាលពីឆ្នាំ២០១៥ ត្រូវបានបង្ក្រាបរួចម្តងមកហើយ តែមិនបានសម្រេចដោយឈ្មួញរូបនេះយកទីវត្តអារាមមកបំភ័ន្តភ្នែកអាជ្ញាធរដែនដីដើម្បីធ្វើអាជីវកម្មស្តុកឈើខុសច្បាប់ក្នុងវត្តព្រះខ័ន ស្ថិតនៅភូមិតាសែង ឃុំរណសិរ្យ ស្រុកសង្គមថ្មី ខេត្តព្រះវិហារ។
មេឈ្មួញឈើ ឈ្មោះ ស៊ុំ ឈុំប៊ុន បានបញ្ចុះបញ្ចូលលោកសង្ឃយកទីតាំងព្រះវិហារស្តុកឈើប្រណិតតាប់ និងឈើអារប្រភេទក្តារជាង១០០ម៉ែត្រគូប ដើម្បីរកឱកាសដឹកជញ្ជូនយកទៅលក់រាជធានីភ្នំពេញ និងបណ្តាខេត្តផ្សេងទៀត។
នៅពេលនេះ លោក មាស ញឹម នាយកដែនជម្រកសត្វព្រៃបឹងពែរ សហការជាមួយកម្លាំងអាវុធហត្ថស្រុកសង្គមថ្មី ចុះទៅបង្ក្រាប តាមចម្លើយរបស់មេ ឈ្មួញ ស៊ុំ ឈុំប៊ុន ប្រាប់សមត្ថកិច្ចថា ទិញឈើទុកកសាងព្រះវិហារ តាំងពីឆ្នាំ២០១៥។ លោកឈ្មួញ ឈើ ស៊ុំ ឈុំប៊ុន ឆ្លើយយកលេសបែបតាមពិតវត្តព្រះខ័នអត់មានឈើមួយ កន្ទុយទុកកសាងព្រះវិហារសោះឡើយ។
នាយកបរិស្ថានដែនជម្រកព្រៃបឹងពែរមាសញឹមមិនលើកទទួលទូរស័ព្ទ ខណៈអ្នកកាសែតទាក់ទងសុំការបំភ្លឺ។
ប្រភពសមត្ថកិច្ចស្និទ្ធជាមួយអ្នកកាសែតបានបង្ហើបឲ្យដឹងនៅថ្ងៃទី០៥ឧសភានេះថា ពិតជាមានករណីចុះបង្ក្រាបឈើខុសច្បាប់ស្តុកទុកនៅក្នុងវត្តខាងលើប្រាកដមែននៅស្រុកសង្គមថ្មី។
សមត្ថកិច្ចដដែលបង្ហើបឲ្យដឹងថា ការឈានទៅចុះបង្ក្រាបឈើខុសច្បាប់ដ៏សន្ធឹកសន្ធាប់ទាំងនេះសង្ស័យមកពីការចរចាលុយសូកប៉ាន់ក្រោមតុមិនត្រូវរ៉ូវគ្នា ដើម្បីជាថ្នូរឲ្យឈ្មួញ ឈុំ ប៊ុន ដឹកចេញពីខេត្តព្រះវិហារនៅទីបំផុត ត្រូវកម្លាំងសមត្ថកិច្ចចុះបង្ក្រាបរឹបអូសតែម្ដង៕
Source: Kampuchea Thmey Daily
0 Comments