ចាប់​បាន​គ្រឿងញៀន​ជិត​១​គីឡូ​ទៀតហើយ​

ស្ទឹងត្រែង ៖ កម្លាំង​ការិយាល័យ​ប្រឆាំង​បទល្មើស​គ្រឿងញៀន​ នៃ​ស្នងការដ្ឋាន​នគរបាល​ខេត្ត​ស្ទឹងត្រែង​ បាន​ចុះ​ប្រតិបត្តិ​ការឃាត់ខ្លួន​ជនសង្ស័យ២នាក់ ​ប្រុស​ម្នាក់​ ស្រី​ម្នាក់ ជាមួយ​គ្រឿងញៀន​ប្រភេទ​មេ​តំ​ហ្វេ​តា​មីន​អាយ​ ម្សៅ​ក្រាម​ពណ៌​ស ​ប្រមាណ​ជិត 1 គីឡូក្រាម​ បញ្ជូន​មកកាន់​ស្នងការ​ដ្ឋាន​នគរបាល​ខេត្ត​។​
​
ប្រតិបត្តិការ​បង្ក្រាប​ការជួញដូរ​គ្រឿងញៀន​ខុសច្បាប់ បាន​ធ្វើ​ឡើង​កាលពី ថ្ងៃទី 2 ខែ​ឧសភា ឆ្នាំ 2019 វេលា​ម៉ោង 4​និង 20 នាទី​ល្ងាច​ ត្រង់ចំណុច​ផ្លូវបំបែក​ចូល​ភូមិ​ព្រះ​កិល ​ស្ថិត​ក្នុងភូមិ​សំអាង ឃុំ​សំអាង​ ស្រុក​ថា​ឡា​បរិ​វ៉ា​ត់​ ខេត្ត​ស្ទឹងត្រែង​។​
​
លោក​វរសេនីយ៍ទោ ​ចែម​ ផានិត​ នាយការិយាល័យ​ប្រឆាំង​បទល្មើស​សេដ្ឋកិច្ច​បាន​ឲ្យ​ដឹងថា ​ជន​សង្ស័យ ​ប្រុស/​ស្រី 2 នាក់ ​ជួញដូរ​គ្រឿងញៀន​ខុសច្បាប់​ ដែល​សមត្ថកិច្ច​បង្ក្រាប​មាន 1-​ឈ្មោះ សុំ សាង ​ភេទ​ប្រុស ​អាយុ 70 ឆ្នាំ ​រស់នៅ​ភូមិ​លើ​ ឃុំ​ព្រះ​រំកិល​ ស្រុក​ថា​ឡា​បរិ​វ៉ា​ត់។ 2 -ឈ្មោះ ​មុត សៃ​ភេទ​ស្រី ​អាយុ 60​ឆ្នាំ​ រស់នៅភូមិ​កណ្ដាល​ ឃុំ​ព្រះ​រំកិល ​ស្រុក​ថា​ឡា​បរិ​វ៉ា​ត់​ ខេត្ត​ស្ទឹងត្រែង​។
​
លោក​វរសេនីយ៍ទោ​នាយការិយាល័យ​ប្រឆាំង​គ្រឿងញៀន​បាន​បន្ត​ឲ្យ​ដឹង​ទៀតថា ការ​ចុះ​បង្ក្រាប​ករណី​ជួញដូរ​គ្រឿងញៀន​ខាងលើ​នេះ ​ក្រោម​ការស្រាវជ្រាវ​ និង​ស៊ើបអង្កេត​យ៉ាង​ល្អិតល្អន់​របស់​កម្លាំង​ការិយាល័យ​ប្រឆាំង​គ្រឿងញៀន ទើប​ឈាន​ដល់​ការ​បង្ក្រាប​ជនសង្ស័យ​ទាំងពីរ​នាក់​នេះ​បាន​រួមជាមួយ​គ្រឿងញៀន​ជិត 1 គីឡូក្រាម ​និង​បាន​បញ្ជូន​ខ្លួន​ទៅកាន់​ស្នងការដ្ឋាន​នគរបាល​ខេត្ត​ធ្វើការ​សាកសួរ​។​
​
ជនសង្ស័យ​ទាំង 2 នាក់​ម្នាក់​ បាន​ឆ្លើយ​សារភាព​ចំពោះមុខ​សមត្ថកិច្ច​ថា​គ្រឿងញៀន​ជិត 1 គីឡូក្រាម​នេះ​ គាត់​បាន​ស៊ីឈ្នួល​កាន់​ឲ្យ​គេ​តែប៉ុណ្ណោះ​ ហើយ​គ្រឿងញៀន​ ត្រូវបាន​ធ្វើតេស្ត​បឋម​ចំពោះ​មុខ​ជនសង្ស័យ ​និង​មានការ​ចូលរួម​ពី​លោក​ព្រះរាជអាជ្ញា​អម​សាលាដំបូង​ខេត្តស្ទឹងត្រែង ​រកឃើញថា​ពិតជា​មាន​សារធាតុ​ញៀន​ពិតប្រាកដ​មែន​។​
​
បច្ចុប្បន្ន​ ជនសង្ស័យ​ទាំងពីរ​នាក់​ កំពុងស្ថិត​ការឃាត់ខ្លួន​នៅក្នុង​ស្នងការដ្ឋាន​នគរបាល​ខេត្ត​ និង​រៀប​ចំ​សួរចម្លើយ​កសាង​សំណុំរឿង​បញ្ជូន​ទៅកាន់​តុលាការ​នៅ​រសៀល​ថ្ងៃទី 3 ខែ​ឧសភា​ ឆ្នាំ 2019 នេះ​ដើម្បី​ចាត់ការ​បន្ត​ទៅ​តាម​នីតិវិធី​៕​










​

Source: Kampuchea Thmey Daily