ឧត្តរមានជ័យ ៖ ដោយមានការណែនាំពី លោកឧត្ដមសេនីយ៍ទោ ម៉ែន លី ស្នងការនគរបាលខេត្តឧត្តរមានជ័យ លោកវរសេនីយ៍ឯក ហម ភិរម្យ អធិការនគរបាលក្រុង បានដឹកនាំកម្លាំងក្រោមឱវាទ ចុះបង្ក្រាបករណីជួញដូរគ្រឿងញៀន ១ករណី កាលពីវេលាម៉ោង២២និង០០នាទី ថ្ងៃទី៣០ ខែមេសា ឆ្នាំ២០១៩ នៅចំណុចបេនឡានក្រុងសំរោង ស្ថិតនៅក្នុងភូមិដូនកែន សង្កាត់សំរោង ក្រុងសំរោង ខេត្តឧត្តរមានជ័យ។
លោកវរសេនីយ៍ឯក ហម ភិរម្យ អធិការនគរបាលក្រុងសំរោងបានឲ្យដឹងថា ក្នុងកិច្ចប្រតិបត្តិការនេះ កម្លាំងយើង បានធ្វើការឃាត់ខ្លួនជនសង្ស័យម្នាក់ ឈ្មោះ លួន គិមលិន ភេទប្រុស អាយុ១៩ឆ្នាំ រស់នៅភូមិចុងកៅស៊ូ សង្កាត់ស្លក្រាម ក្រុងសៀមរាប ខេត្តសៀមរាប ដោយដកហូតបានវត្ថុតាងថ្នាំញៀនមេតំហ្វេតាមីនICE (ម៉ាទឹកកក) ចំនួន២កញ្ចប់ធំ និង ១កញ្ចប់តូច ស្មើនឹង១៥.៦៥ក្រាម និងទូរស័ព្ទចុចពិល ១គ្រឿង។
លោកអធិការនគរបាលក្រុងបានឲ្យដឹងទៀតថា បច្ចុប្បន្ន ជនសង្ស័យ រួមនឹងវត្ថុតាងខាងលើ ត្រូវបាននាំមកកាន់អធិការដ្ឋាននគរបាលក្រុង ដើម្បីសាកសួរ និងកសាងសំណុំរឿងតាមនីតិវិធី៕
Source: Kampuchea Thmey Daily
0 Comments