ពលរដ្ឋ១,៣៩៧គ្រួសារ ទទួលរងគ្រោះដោយខ្យល់កន្ត្រាក់ពីថ្ងៃទី១ ដល់២៧ បានទទួលអំណោយ និងធ្វើការជួសជុលពីអង្គភាពចំណុះកងពលតូចថ្មើរជើងលេខ៥១

បន្ទាយមានជ័យ ៖ តាមការអះអាងរបស់ លោកឧត្ដមសេនីយ៍ទោ ឈុន ម៉ៅ មេបញ្ជាការរងយោធភូមិភាគទី៥ ទទួលទិសទី១ ខេត្តបន្ទាយមានជ័យ បានប្រាប់អ្នកយកព័ត៌មានឲ្យដឹងថា ខេត្តបន្ទាយមានជ័យ ចាប់ពីថ្ងៃទី១ ដល់ថ្ងៃទី២៧ ខែមេសា ឆ្នាំ២០១៩នេះ ប្រជាពលរដ្ឋទាំង៩ក្រុង/ស្រុក ទទួលរងគ្រោះដោយខ្យល់កន្ត្រាក់ សរុបមានចំនួន១,៣៩៧គ្រួសារ រងគ្រោះធ្ងន់១៩៥ខ្នង សាលារៀន១៦ខ្នង សាលាបាលី២ខ្នង សាលាឆាន់៣ខ្នង និងកុដិ២ខ្នង ក្រោយពីប្រជាពលរដ្ឋរងគ្រោះដោយខ្យល់កន្ត្រាក់រួចមក មានអង្គភាពចំណុះកងពលតូចថ្មើរជើងលេខ៥១ ដឹកនាំលោកឧត្ដមសេនីយ៍ទោ ឈុន ម៉ៅ មេបញ្ជាការរងយោធភូមិភាគទី៥ ទទួលទិសទី១ ខេត្តបន្ទាយមានជ័យ បាននាំយកអំណោយនិងជួយធ្វើការជួសជុលជាបន្តបន្ទាប់ហើយជូនប្រជាពលរដ្ឋទាំងអស់នោះ។

លោកឧត្ដមសេនីយ៍ទោ ឈុន ម៉ៅ បានប្រាប់អ្នកយកព័ត៌មានឲ្យដឹងថា ប្រជាពលរដ្ឋរងគ្រោះដោយខ្យល់កន្ត្រាក់មាននៅស្រុកម៉ាឡៃ ព្រះនេត្រព្រះស្វាយចេក អូរជ្រៅ និង ក្រុងសិរីសោភ័ណ មាន ១.៣៩៧ខ្នង ធ្ងន់១៩៥ខ្នង ស្រាល១.២០២ខ្នង សាលារៀន១៦ខ្នង សាលាបាលី២ខ្នង កុដិ៤ខ្នង សាលាឆាន់៣ខ្នង មូលដ្ឋាន រោងដាក់ម៉ាស៊ីន និងសម្ភារៈ៦ខ្នង។

លោកបានបន្តថា ជាងនេះទៅទៀត ក៏មានរន្ទះបាញ់បណ្តាលស្លាប់មនុស្ស៥នាក់ របួស៦នាក់ និង ស្លាប់គោ១៣ក្បាល ខូចម៉ូតូ៣គ្រឿង គោយន្ត១គ្រឿង ហើយឆេះផ្ទះមួយខ្នងផង។

លោកបានបញ្ជាក់ឲ្យដឹងទៀតថា ដើម្បីឆ្លើយតប មន្ត្រីថ្នាក់ដឹកនាំ មន្ត្រីអាជ្ញាធរ កងកម្លាំងនគរបាល កងទ័ព កងរាជអាវុធហត្ថ និងក្រុមការងារផ្សេងទៀត បានចុះជួយរុះរើ សម្រួលផ្ទះ និងសំណង់ខូចខាត និងរៀបចំជម្រកបណ្ដោះអាសន្ន ផ្តល់គ្រឿងសំណង់មានស័ង្កសី ឈើជាដើម និងបានជួយជួសជុល កសាងឡើងវិញជាបណ្តើរៗវិញអស់ហើយ។

លោកបានបន្ថែមទៀតថា មន្ត្រីថ្នាក់ដឹកនាំ នៃក្រុមការងារថ្នាក់ជាតិចុះជួយខេត្តបន្ទាយមានជ័យ អ្នកតំណាងរាស្ត្រ អាជ្ញាធរដែនដី និងកាកបាទក្រហមកម្ពុជាសាខាខេត្ត បានដោះស្រាយទាន់ពេល និងចែកអំណោយជាសម្ភារៈ និងម្ហូបអាហារជាបន្តបន្ទាប់។

លោកបានបញ្ជាក់ឲ្យដឹងទៀតថា លោកសែនសោកស្ដាយជាទីបំផុត បានសម្តែងមនោសញ្ចេតនាចូលរួមរំលែកទុក្ខ និងការលំបាកចំពោះការបាត់បង់សមាជិកគ្រួសារ ផ្ទះសម្បែង ទ្រព្យសម្បត្តិក្នុងនោះ លោកបានផ្តល់កម្លាំងចិត្តឲ្យដល់បងប្អូនតស៊ូជម្នះផលអាក្រក់ពីបម្រែបម្រួលអាកាសធាតុនេះ ដោយខិតខំប្រឹងប្រែងកែលំអទីជម្រក និងស្តារជីវភាពឡើងវិញផងដែរ៕