ភ្នំពេញ ៖ លោកវេជ្ជបណ្ឌិត លី សុវិទ្យ អនុប្រធានមជ្ឈមណ្ឌលជាតិផ្តល់ឈាមបានឲ្យដឹងថានៅក្នុងរយៈពេល៤ខែដើមឆ្នាំ២០១៩នេះមជ្ឈមណ្ឌលជាតិផ្តល់ឈាមទទួលបានអំណោយឈាមបានប្រមាណជាង២ម៉ឺនប្លោកដើម្បីត្រៀមទុកសម្រាប់ជួយសង្គ្រោះដល់អ្នកជំងឺដែលត្រូវការឈាមជាចាំបាច់។
លោកវេជ្ជបណ្ឌិតបានបន្តថា អំណោយឈាមទាំងនេះ គឺបានមកពីការចូលរួមបរិច្ចាគពីយុវជននិស្សិតនិងមន្ត្រីរាជការព្រមទាំងសប្បុរសជននានានៅតាមគ្រឹះស្ថានសិក្សានិងស្ថាប័នរដ្ឋមួយចំនួន។
តាមគម្រោងឆ្នាំ២០១៩នេះ មជ្ឈមណ្ឌលជាតិផ្តល់ឈាមត្រូវការឈាមរហូតដល់ទៅជាង៩ម៉ឺនប្លោកកើនឡើងជាងឆ្នាំ២០១៨ជាង១ម៉ឺនប្លោក ខណៈឆ្នាំ២០១៨ កន្លងទៅមជ្ឈមណ្ឌលទទួលបានអំណោយឈាមនៅទូទាំងប្រទេសចំនួន៨៣៩៨៤ប្លោក ក្នុងនោះនៅភ្នំពេញមានចំនួន៥៨៣៩៧ប្លោកនិងនៅឆ្នាំ២០១៧កន្លងទៅទទួលបានអំណោយឈាមតែ៧៦៥១១ប្លោកប៉ុណ្ណោះ។
លោកបានបន្ថែមទៀតថា ការកើនឡើងនៃចំនួនឈាមនេះគឺដោយសារតែតម្រូវការអ្នកជំងឺដែលត្រូវការឈាមមានការកើនឡើងខ្ពស់ពិសេសការពង្រីកមន្ទីរពេទ្យនានានៅទូទាំងប្រទេសក៏ជាមូលហេតុដែលនាំឲ្យមានតម្រូវការឈាមផងដែរ។ ជាក់ស្តែងក្នុង១ថ្ងៃៗតាមការប៉ាន់ប្រមាណមជ្ឈមណ្ឌលត្រូវការឈាមប្រមាណពី២០០ប្លោកសម្រាប់នៅរាជធានីភ្នំពេញនិង២០០ប្លោកនៅទូទាំងប្រទេ សដើម្បីជួយសង្គ្រោះដល់អ្នកជំងឺដែលត្រូវការឈាមដូចជាអ្នកជំងឺទាក់ទិននឹងការហូរឈាមតាមប្រដាប់រំលាយអាហារ ការវះកាត់ជំងឺបេះដូង គ្រោះថ្នាក់ចរាចរណ៍ ការហូរឈាមមិនប្រក្រតីនៅមុននិងក្រោយពេលសំរាលកូន ជំងឺខ្សោយតំរង់នោមនិងការព្យាបាលថែទាំជំងឺមហារីកជាដើម។
លោក បានជំរុញនិងអំពាវឲ្យប្រជាពលរដ្ឋនៅទូទាំងប្រទេស ជាពិសេសក្រុមយុវជនជួយបន្តចូលរួមបរិច្ចាគឈាមដើម្បីឲ្យមជ្ឈមណ្ឌលជាតិយកទៅជួយសង្គ្រោះដល់ជនរងគ្រោះ ដែលត្រូវការឈាមជាចាំបាច់ ហើយសកម្មភាពទាំងនេះពិតជាបានចូលរួម ចំណែកយ៉ាងខ្លាំង ដើម្បីត្រៀមជួយសង្គ្រោះដល់អាយុជីវិតមនុស្សឲ្យបានទាន់ពេលវេលា។
លោកវេជ្ជបណ្ឌិតបានបញ្ជាក់ថា «បើសិនជាគ្មានការចូលរួម ចំណែកពីសប្បុរសជនទាំងឡាយនោះ មជ្ឈមណ្ឌលក៏មិនអាចទ្រទ្រង់ និងផលិតឈាម បានឡើយដូច្នេះការចូលរួមរបស់បងប្អូន ពិតជាមានសារសំខាន់យ៉ាងខ្លាំង»។
លោកវេជ្ជបណ្ឌិតបានបន្ថែមឲ្យដឹងទៀតថា ការផ្ដល់សេវាផ្គត់ផ្គង់ឈាម គឺជាសេវាមនុស្សធម៌មួយ ដោយនៅក្នុងពេលបច្ចុប្បន្ន ជាបន្ទុករបស់រាជរដ្ឋាភិបាលទាំងស្រុង ក៏ដូចជាក្រសួងសុខាភិបាល ដោយសមាសភាពឈាម ទាំងអស់ត្រូវបានផ្គត់ផ្គង់ នៅតាមបណ្ដាមន្ទីរពេទ្យទូទាំងប្រទេស ដោយមិនឲ្យពល រដ្ឋបង់ថ្លៃសេវាឡើយដោយរដ្ឋជាអ្នករ៉ាប់រងទាំងអស់។
លោកវេជ្ជបណ្ឌិត បានបញ្ជាក់ថា ដើម្បីបំពេញនូវតម្រូវការឈាមនេះក្រសួងសុខាភិបាលបាននឹងកំពុងរៀបចំយុទ្ធសាស្ត្រជាច្រើនក្នុងនោះមានការបង្កើតជាស្ថានីយទទួលអំណោយឈាមឲ្យបានច្រើនកន្លែងដើម្បីផ្តល់ភាពងាយស្រួលដល់ប្រជាពលរដ្ឋចូលរួមអ្នកបរិច្ចាគឈាមខណៈបច្ចុប្បន្ននេះមានតែនៅផ្សារទំនើបអ៊ីអនទី១និងទី២ប៉ុណ្ណោះ ដែលធ្វើនៅរៀងរាល់ថ្ងៃសៅរ៍។
ជាមួយគ្នានេះដែរ មជ្ឈមណ្ឌលជាតិផ្តល់ជាតិក៏បានសហការជាមួយក្លឹបនៃក្តីស្រលាញ់របស់សហភាពសហព័ន្ធយុវជនកម្ពុជា គ្រឹះស្ថានសាកលវិទ្យាល័យនិងវិស័យឯកជនផ្សេងៗទៀតដើម្បីប្រមូលឈាមឲ្យបានច្រើនសម្រាប់ទុកជួយសង្គ្រោះដល់អ្នកជំងឺដែលត្រូវការឈាមជាចាំបាច់៕
Source: Kampuchea Thmey Daily
0 Comments