ភ្នំពេញ ៖ សម្តេចអគ្គមហាសេនាបតីតេជោ ហ៊ុន សែន បានមានប្រសាសន៍ថា នៅថ្ងៃទិវាពលកម្មអន្តរជាតិនេះ មានកម្មករ កម្មការិនីខ្លះបានជ្រើសរើសការជួបជុំនៅតាមរោងចក្រដោយការហូបបាយរួមគ្នានិង រាំកម្សាន្ត ,មានអ្នកខ្លះជ្រើសរើសការនៅផ្ទះសម្រាក និងក៏មានអ្នកខ្លះជ្រើសរើសការ ជួបជុំដាក់ញត្តិទាមទារនេះដាក់ញត្តិទាមទារនោះ នេះគឺជាសិទ្ធិដែលបានអនុវត្តនៅក្នុងប្រទេសកម្ពុជា។
ប្រមុខរាជរដ្ឋាភិបាលបានថ្លែងបែបនេះនៅក្នុងពិធីជួបជុំហូបបាយសាមគ្គី និង រាំកម្សាន្ត ជាមួយកម្មករ កម្មការិនី និង និយោជិត នៅរោងចក្រយីដា ប្រមាណជាង ៣,៧០០នាក់ស្ថិតនៅភូមិឫស្សីស្រុក,ឃុំឈើទាលស្រុកកៀនស្វាយខេត្តកណ្តាលនាព្រឹកថ្ងៃទី ១ ខែ ឧសភា នេះ។ ស្របពេលដែលមានកម្មករ-កម្មការិនីរាប់រយនាក់ផ្សេងទៀតដែលដឹកនាំដោយលោកអាត់ ធន់ ប្រធានសហភាពការងារកម្ពុជាដង្ហែក្បួននិងដាក់ញត្តិតាមស្ថាប័នមួយចំនួន ដើម្បីទាមទារលក្ខខណ្ឌការងាររបស់ពួកគេ។ ពួកគេបានប្រមូលផ្តុំគ្នានៅមាត់ទន្លេម្តុំក្រុមប្រឹក្សាអភិវឌ្ឍន៍កម្ពុជា (CDC)។
សម្តេចតេជោនាយករដ្ឋមន្ត្រីបានទទួលទានអាហារ និង រាំកម្សាន្តសប្បាយជាមួយកម្មករ កម្មការិនី ក្នុងបរិយាកាសសប្បាយរីករាយនិងស្និទ្ធស្នាលជាទីបំផុត។បរិយាកាសនេះបានបង្ហាញអំពីភាពជិតស្និទ្ធរវាងមេដឹកនាំប្រទេសជាមួយនឹងកម្មករកម្មការិនីទាំងអស់។ ប៉ុន្តែអ្វីដែលទៅហួសពីភាពស្និទ្ធស្នាលនេះគឺសាមគ្គីភាពនៅក្នុងចំណោមកម្មករ និង មេដឹកនាំប្រទេស។
ថ្លែងទៅកាន់បងប្អូនកម្មករ កម្មការិនី និង និយោជិត ចំនួន ៣,៧០០នាក់នៅក្នុងពិធីជួបជុំនោះ សម្តេចតេជោ ហ៊ុន សែន បានមានប្រសាសន៍ថា ថ្ងៃនេះសម្តេចពិតជាមានការរីករាយហើយសូមអរគុណចំពោះលោកប្រធានក្រុមហ៊ុនយីដា ដែលបានរៀបចំកម្មវិធីសំណេះសំណាលក៏ដូចជាការជួបជុំបាយសាមគ្គីនិងរាំកម្សាន្តជាមួយកម្មករ កម្មការិនី ចំនួន ៣,៧០០នាក់នៅក្នុងឱកាសទិវាពលកម្មអន្តរជាតិខួបលើកទី ១៣៣ ឆ្នាំ។ សម្តេចតេជោបន្តថា នេះជាឆ្នាំទីពីរដែលសម្តេចបានធ្វើសកម្មភាពនៅតាមរោងចក្រថ្ងៃទីឥ១ ខែឧសភា។ សម្តេចតេជោនាយករដ្ឋមន្ត្រីក៏បានអរគុណប្រធានក្រុមហ៊ុនយីដា ដែលបានធ្វើកិច្ចការងារមួយនេះ និង អរគុណសម្រាប់ក្មួយៗកម្មករ កម្មការិនី ដែលបានចូលរួមនៅពេលនេះ។
សម្តេចតេជោនាយករដ្ឋមន្ត្រីក៏បានលើកឡើងផងដែរថា ប៉ុន្មានអាទិត្យកន្លងទៅនេះមានអ្នកនយោបាយខ្លះគេស្នើឲ្យកម្មករចាប់សម្តេច ហើយថ្ងៃនេះកម្មករកម្មការិនីពិតជាចាប់សម្តេចមែនគឺចាប់ពីអោបថើប ចាប់ថតរូបជាមួយ។ ដូច្នេះស្ថានភាពនេះក៏បានបង្ហាញពីភាពជិតស្និទ្ធរវាងថ្នាក់ដឹកនាំប្រទេសជាមួយនឹងកម្មករកម្មការិនីទាំងអស់។ ប៉ុន្តែអ្វីដែលទៅហួសពេលនេះគឺសាមគ្គីភាពនៅក្នុងចំណោមយើងទាំងអស់គ្នា។
សម្តេចតេជោនាយករដ្ឋមន្ត្រីក៏បានយកឱកាសនេះ សម្ដែងការអរគុណចំពោះរោងចក្រចំនួន ១,២៨៧ ផ្សេងទៀត ដែលបានរៀបចំនូវកម្មវិធីសំណេះសំណាលនិងការជួបជុំបាយសាមគ្គីនិងការរាំលេងកម្សាន្ដនៅតាមរោងចក្រ។ សម្តេចតេជោ ហ៊ុន សែន ឲ្យដឹងថា ឆ្នាំនេះមានរោងចក្ររហូតដល់ទៅ ១,២៨៧ រោងចក្របានប្រារព្ធពិធីជួបជុំសប្បាយរីករាយនៅក្នុងរោងចក្រ បើប្រៀបធៀបជាមួយឆ្នាំកន្លងទៅគឺកើនឡើង៣៩៤ រោងចក្រ។ សម្រាប់កម្មករវិញឆ្នាំនេះមានរហូតដល់ ៧៩ ម៉ឺននាក់ បានជួបជុំគ្នានៅតាម រោងចក្រប្រារព្ធពិធីសប្បាយរីករាយក្នុងថ្ងៃទិវាពលកម្មអន្តរជាតិ បើប្រៀបធៀបឆ្នាំកន្លងទៅគឺមានការកើនឡើង ២៦ម៉ឺននាក់។
សម្តេចតេជោ ហ៊ុន សែន បានថ្លែងអបអរសាទរជាមួយនឹងរោងចក្រកម្មករកម្មការិនីដែលបានចូលរួមនៅក្នុងកម្មវិធីកម្សាន្តនៃទិវាពលកម្មអន្តរជាតិនេះ។ សម្តេចបន្តថា ថ្ងៃនេះមានអ្នកខ្លះជ្រើសរើសការមកជួបជុំនិងបាយសាមគ្គីតាមរោងចក្រនិងរាំលេងកម្សាន្ត,អ្នកខ្លះជ្រើសរើសនៅតាមផ្ទះ,អ្នកខ្លះជ្រើសរើសទៅតាមការប្រមូលផ្ដុំដាក់ញត្តិទាមទារនេះទាមទារនោះ នេះគឺជាសិទ្ធិដែលបានអនុវត្តនៅក្នុងប្រទេសរបស់យើង។
នៅក្នុងពិធីនោះ ក្រៅពីការពិសាអាហារសាមគ្គី និង រាំកម្សាន្តសប្បាយ ប្រមុខរាជរដ្ឋាភិបាលក៏បានផ្តល់ការឧបត្ថម្ភដល់បងប្អូនកម្មករ កម្មការិនី ម្នាក់ ៥ ម៉ឺនរៀល និង សារុង ចំណែកកម្មការិនីមានផ្ទៃពោះទទួលបានប្រាក់ឧបត្ថម្ភផ្សេងទៀតបន្ថែមលើប្រាក់ ៥ ម៉ឺនរៀល។
នៅថ្ងៃនេះផងដែរ ក្រសួងការងារក៏បានរៀបចំឲ្យមានកម្មវិធីប្រឡងកញ្ញាឯក និង បុរសឯក វាយនភ័ណ្ឌឆ្នាំ ២០១៩ ផងដែរ សម្តេចតេជោនាយករដ្ឋមន្ត្រីក៏បានជូនពរឲ្យ កម្មករ កម្មការិនី ៣ រូបដែលតំណាងឲ្យរោងចក្រយីដា ទទួលបានជោគជ័យក្នុងការប្រឡង។
រោងចក្រយីដាបានចាប់ផ្តើមដំណើរការនៅក្នុងឆ្នាំ២០១៥និងមានកម្មករនិយោជិតសរុប ៣,៧០០នាក់ក្នុងនោះស្រី២,៨០៣នាក់។ រោងចក្រយីដាជារោងចក្រកាត់ដេរខោខូវប៊យ ផលិតផលដែលផលិតនៅរោងចក្រយីដាត្រូវបាននាំចេញទៅលក់នៅអឺរ៉ុបនិងសហរដ្ឋអាមេរិក។
រោងចក្រនេះ បានផ្តល់ប្រាក់ឈ្នួលនិងប្រាក់បន្ទាប់បន្សំជូនកម្មករនិយោជិតប្រមាណ ៨៦៦,៥៧០ ដុល្លារក្នុងមួយខែ។ ប្រាក់ឈ្នួលជាមធ្យមសម្រាប់កម្មករនិយោជិតម្នាក់ៗមានចន្លោះពី២២០ដុល្លារដល់២៨០ដុល្លារក្នុងមួយខែ។ ក្រៅពីប្រាក់អត្ថប្រយោជន៍ដែលកំណត់ដោយច្បាប់ហើយនោះរោងចក្រក៏បានផ្តល់នូវអត្ថប្រយោជន៍ផ្សេងៗមួយចំនួនទៀតផងដែរ។ អត្ថប្រយោជន៍ទាំងនោះរួមមានប្រាក់រង្វាន់លើកទឹកចិត្តសម្រាប់អ្នកដេរបានលឿន ចំពោះអ្នកដែលមានភាគរយចាប់ពី ៧០%ទៅ ៨៤% នឹងទទួលបាន ១០ដុល្លារ ហើយសម្រាប់អ្នកដែលមានភាគរយ ចាប់ពី៨៥%ឡើងទៅទទួលបាន៣០ដុល្លារ។ ប្រាក់រង្វាន់លើកទឹកចិត្តសម្រាប់កម្មករដែលចេះជំនាញច្រើនម៉ាស៊ីន សម្រាប់ប្រធានក្រុមដេរ ជាង ម៉ាស៊ីន អ្នកដេរគំរូ អ្នកពិនិត្យគុណភាព និង ផ្នែកផ្សេងៗទៀត ដោយការគណនាអាស្រ័យទៅលើភាគរយសរុបប្រចាំខែប្រាក់តួនាទីពេលវេលាធ្វើ ការ និងកត្តាផ្សេងៗ។ បន្ថែម ១.៥ ដុល្លារសម្រាប់អ្នកធ្វើការថែមម៉ោងចាប់ពី ១០ ទៅ ១៤ថ្ងៃនឹងចាប់ពី ២០ ថ្ងៃឡើងទៅបន្ថែម ៣ដុល្លារទៅលើ សោហ៊ុយធ្វើដំណើរ។ ប្រាក់ថ្លៃមើលថែទារកនិងទឹកដោះគោ ១០ ដុល្លារសម្រាប់កូន១ក្នុងរយៈពេល៣៦ខែ។
សូមបញ្ជាក់ថា កាលពីឆ្នាំ ២០១៨ កន្លងទៅក្នុងថ្ងៃទិវាពលកម្មអន្តរជាតិ ១ ឧសភា សម្តេចតេជោ ហ៊ុន សែន បានអញ្ជើញហូបបាយសាមគ្គីជាមួយកម្មករ និយោជិត និងរាំលេងកម្សាន្តនៅរោងចក្រ រោងចក្រមីនេបៀ (ខេមបូឌា) នៅតំបន់សេដ្ឋកិច្ចពិសេសភ្នំពេញដែលមានកម្មករ កម្មការិនី និង និយោជិតចូលរួម ៥.៥១៥ នាក់៕
Source: Kampuchea Thmey Daily
0 Comments