សហព័ន្ធ​កីឡាបាល់ទាត់​ប៉ា​គី​ស្ថាន កំពុងតែ​ដោះស្រាយ​ទំនាស់​ផ្ទៃក្នុង​មុន​ក្រុម​ជម្រើសជាតិ​ប៉ះ​ជម្រើសជាតិ​កម្ពុជា

ក្រុមបាល់ទាត់​ជម្រើសជាតិ​ប៉ា​គី​ស្ថាន បាន​ចាប់ឆ្នោត​ប៉ះ​ក្រុមបាល់ទាត់​ជម្រើសជាតិ​កម្ពុជា ក្នុង​វគ្គ​ជម្រុះ​បឋម​នៃ​ពានរង្វាន់​បាល់ទាត់​ជើងឯក​ពិភពលោក​ឆ្នាំ​២០២២ ដែល​ប្រទេស​កាតា​ទទួល​ធ្វើជា​ម្ចាស់ផ្ទះ (2022 Qatar FIFA World Cup) ប្រចាំ​ទ្វីបអាស៊ី បា​ន​បញ្ចេញ​បញ្ចី​ឈ្មោះ​កីឡាករ​ក្នុង​ជម្រើសជាតិ​របស់​ខ្លួន​ត្រៀម​ប្រមូលផ្ដុំ​ហ្វឹកហាត់​ចំនួន៣២​នាក់​ចុងក្រោយ ​កាល​ពី​ពេល​ថ្មីៗ ខណៈ​សហព័ន្ធ​កីឡាបាល់ទាត់​របស់​ប្រទេស​នេះ​ត្រូវការ​ពេលវេលា​ដើម្បី​ដោះស្រាយ​ជំលោះ​ផ្ទៃក្នុង​។

​ការ​កោះហៅ​កីឡាករ​ទាំង​៣២​រូប​ខាងលើ​នេះ​ ត្រូវ​បាន​ដឹង​លឺ​តែមួយ​ផ្នែក​ប៉ុណ្ណោះ ព្រោះ​សហព័ន្ធ​នៃ​ប្រទេស​មួយ​នេះ កំពុង​មាន​បញ្ហា​ចម្រូងចម្រាស​ផ្ទៃក្នុង ជុំវិញ​អំណាច​នៃ​ការគ្រប់គ្រង ដោយមាន​ប្រធាន​សហព័ន្ធ​ដល់​ទៅ​២​រូប ពោល​គឺ​បន្ទាប់ពី​មានការ​បោះឆ្នោត​ជ្រើសរើស​ប្រធាន​ថ្មី និង​សុពលភាព​នៃ​ការបោះឆ្នោត​នៅតែ​ជា​សំនួរ​មួយ​ដែល FIFA បានដាក់​ឡើង នៅ​ពេល​ដែល​ការបោះឆ្នោត​ស្ថិតនៅក្រោម​ស្ថាប័ន​តុលាការ​។

លោក Syed Ashfaq Hussain Shah ឈ្នះ​ឆ្នោត​ជា​ប្រធាន​សហព័ន្ធ​កីឡាបាល់ទាត់​ប៉ា​គី​ស្ថាន កាលពី​ឆ្នាំ​២០១៨ កន្លងទៅ ខណៈ​លោក​អនុប្រធាន Sardar Naveed Haider​មានឈ្មោះ​ក្នុង​ជួរ​រដ្ឋាភិបាល ក៏​មិន​ព្រម​ប្រគល់​អំណាច​ពេញ​លេង​ឲ្យទៅ​ប្រធាន​។ ច្បាប់​របស់ FIFA គឺ​មាន​ភាព​តឹងតែង​ក្នុង​ទំនាក់ទំនង​រវាង​រដ្ឋាភិបាល ចូលទៅក្នុង​កិច្ចការ​កីឡាបាល់ទាត់ ឬ​អាច​និយាយបាន​ថា បាល់ទាត់ គឺ​មិន​ត្រូវ​ស្ថិតនៅក្រោម​នយោបាយ ឡើយ​។

យ៉ាង​ណា​ក្តី​សហព័ន្ធ​កីឡាបាល់ទាត់​ពិភព​អន្តរជាតិ ( FIFA ) និង សហព័ន្ធ​កីឡាបាល់ទាត់​ទ្វីបអាស៊ី ( AFC ) គ្រោង​នឹង​ទៅ​ប្រទេស​ប៉ា​គី​ស្ថាន នៅ​ថ្ងៃទី​២៨ ខែឧសភា ខាងមុខ ដើម្បី​ជួប​ជាមួយ​ភាគី​ទាំងអស់​ដែល​ពាក់ព័ន្ធ និង​ស្វែងរក​មធ្យោបាយ​ដើម្បី​ដោះស្រាយ​បញ្ហា​នេះ​ឲ្យបាន​ល្អប្រសើរ​ឡើងវិញ​។

​តាម​គម្រោង​ក្រុម​ជម្រើសជាតិ​ប៉ា​គី​ស្ថាន នឹង​ជួប​ក្រុម​ជម្រើសជាតិ​កម្ពុជា នៅ​ជើង​ទី​១ នៅ​ថ្ងៃទី​០៦ ខែមិថុនា លើ​ទឹកដី​កម្ពុជា ខណៈ​ជើង​ទី​២ ត្រលប់​មក​ទឹកដី​ប៉ា​គី​ស្ថាន វិញ​នៅ​ថ្ងៃទី​១១ ខែមិថុនា ដូចគ្នា​ដើម្បី​សម្រេចសេចក្ដី​រក​ក្រុម​ឈ្នះ ដែល​ឡើង​ទៅ​ជុំ​ទី​២ នៃ​ពានរង្វាន់​បាល់ទាត់​ពិភពលោក ឆ្នាំ​២០២២ នៅប្រទេស​កាតា (២០២២ FIFA Qatar World Cup) ប្រចាំ​ទ្វីប​អាស៊ី៕


Source: Kampuchea Thmey Daily